Popular Bible Verses from Ovilinga 1

Share

Iya n̯e mamu ka pewa odhonkono katango Ombepo Ondhilikwa himai ya mun̯e, iya n̯e mamu ka ila odhombangi dhandje moJerusalem nomoJudea atjihe nomoSamaria katee mouye auhe.”

Ye we ve heela ha tyaa: “Hatjipuka tjen̯i okwiiwa odhotembu nodhowola Tate ndhaa twaa po kodhonkono dhe omwene.

Iya hiaa li aa ongana nawo, we ve heela ha tyaa: “Hámu dhi mo moJerusalem, iya kevelelen̯i, mu pewe eudhiko ndyoka Tate ndyee mu udhikila, hendi ndimbe mu heela. Johannes wa tjatja nomeva, iya kon̯ima yomatango omanunu n̯e mamu ka tjatjwa nOmbepo Ondhilikwa.”

Kon̯ima yomatatetho net̯o lye, Jesus we liyulika movipuka ovingi okutya u na omwenyo. Oule womatango omilongo vine, Jesus we liholololela wo, ye he ve hipululile ovipuka vyotjilongo tjaKalunga.

Iya kon̯ima hiee ve heele odhondaka hendhi, wa yelwa peulu movipathi vyawo, ekaka hali mu holeke, wo ahamave mu mono uke.

Iya tainkolo va li amava tala keulu hima i, dhivadhiva puwo pa kulamene ovalumentu vavali mbava li ava dhala omidhalo omipembadhi, iya hava tyaa: “Valumentu n̯e Ovagalilea, iya mwa kulamene tji otjo mamu tala keulu? Jesus hengu ngwaa ithwa po pun̯e okuya meulu, otjo ma ka tjuna ngahi mwe mu mono hima i meulu.”