Ovaroma 6
6
Tu na omwenyo mena lyaKristus
1Iya ngatu tye vi? Ngatu twikile okukala moulundhi okutya et̯ilonkenda lyaKalunga li ile en̯ingi? 2Hátjo nokanunu! Nt̯e mbatwa dha moulundhi, matji tjiiwa vi uke tu kale mo? 3Ne kamu tji i okutya nt̯e atuhe mbatwa tjatjelwa muKristus Jesus, twa tjatjelwa met̯o lye? 4Hitwa tjatjwa, twa t̯a, nt̯e hatu pakwa pamo naKristus, ngaKristus hiaa imunwa kout̯e kodhonkono dhelaimo lyaIhe, nant̯e tu tjiiwe okweenda monkalamwenyo ompe.#Kol. 2:12
5Iya andaa tu na oukumo naKristus met̯o lye, matu kala wo noukumo naye meimuko lye kout̯e. 6Tu tji i okutya ountu wetu oukulu wa papelwa pamo naKristus komutjaakano, opo olutu lwoulundhi lu han̯aunwe po, ahamatu kala uke ovapika woulundhi, 7mena lyokutya auhe ngwaa t̯a, wa kutululwa koulundhi. 8Iya napano andaa twa t̯a pamo naye, twa itavela wo okutya tu na omwenyo pamo naye. 9Iya tu tji i okutya Kristus hiaa imunwa kout̯e, kaa t̯i uke. Et̯o kaali mu tumine uke. 10Et̯o ndyaa t̯a, wa t̯ila oulundhi otjikando tjimo vala. Iya omwenyo mbwee na wo, ma kalele Kalunga. 11Iya nan̯e wo ngatjo mu lihava okutya mwa dha mo moulundhi, mu na omwenyo okukalela Kalunga muKristus Jesus.
12Iya hámu yetha omalutu en̯i ngamaa ka t̯a, a tuminwe koulundhi, opo hámu landula omahalo ao omavi. 13Hámu yandja ovin̯ipo vyen̯i koulundhi, vi ile oviundapethwa vyovipuka ovivi, iya ovene liyandjen̯i kuKalunga, mu liyandje, otjovantu mbamwa ithwa met̯o, hamu etwa momwenyo. Liyandjen̯i kuKalunga, opo e mu undapethe hitji li mondjila. 14Iya oulundhi háu mu tumine. N̯e kamu li kohi yoveta, iya mu li kohi yet̯ilonkenda lyaKalunga.
Ovapika wovilinga vyouvyuuki
15Iya tji li vi? Ngatu lundhe, mena lyokutya katu li kohi yoveta, tu li kohi yet̯ilonkenda? Hátjo nokanunu! 16Kamu tji i okutya andaa mamu liyandja komuntu, mu ile ovapika ve wokutyaa kuye, mamu ile ovapika vangoka humamu tee? Andaa mamu liyandja okuundapa oulundhi, omaandelo atjo et̯o, iya andaa mamu tee kuKalunga, okutyaa hoka maku mu ningi ovavyuuki kotjipala tjaKalunga. 17Iya Kalunga nga tumbalekwe, mena lyokutya n̯e hemba mbamwa li ovapika woulundhi mwa itavela nomitima vyen̯i otjatjili himatji moneka melongo moka mumu li. 18N̯e mwa kutululwa moulundhi, mwa ila ovapika wovilinga vyouvyuuki. 19Me popi ngondele mena lyoungone womalutu en̯i. Lukulu mwa yandjele ovin̯ipo vyen̯i okuundapa ovipuka vyovupika mbyaa sila nokuundapa ovipuka ovivi. Iya napano yandjen̯i ovin̯ipo vyen̯i moupika wovilinga vyouvyuuki, opo mu ile ovadhilikwa.
20Iya himwa li ovapika woulundhi, mwa kutulukile, kamwa li amu na ko natja nouvyuuki. 21Ouwa mbumwa mona owatji, himwa undapa ovipuka vyoku mu t̯itha ohon̯i? Ovipuka hembi mavi mu etele et̯o. 22Iya napano mwa kutululwa moulundhi, mwa ila ovapika vaKalunga. Ouwa mbumamu mono monkalamwenyo yen̯i hoowombu okutya mwa ila ovadhilikwa, komaandelo mamu ka mona omwenyo waapehe. 23Ondjambi youlundhi et̯o, iya otjali tjaKalunga omwenyo waapehe muKristus Jesus, Muhona wetu.
Currently Selected:
Ovaroma 6: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
