Ovaroma 3

1Omujuda u na tji okupon̯a punguhe thi Omujuda? Ne okupita etanda maku popile tji? 2Iinga, okupita etanda maku popile movipuka ovingi. Olutengatenga Ovajuda owo va pewa odhondaka dhaKalunga. 3Iya ovi, andaa vamo kava itavelele? Hihava itavelele, matji ningitha okutya Kalunga ma ulu okukala ahe thi omuliun̯ikwa? 4Kaatji tjiiwa nokanunu! Kalunga u popya otjatjili, iya omuntu auhe ka popi otjatjili, omusonekwa ngahi mau popi himau tyaa:

“Amo popi, u popya hitja vyuuka

amo koywa, u ton̯a.”#Eps. 51:4

5Iya andaa oulundhi wetu mau yulike okutya Kalunga omuvyuuki, matu tya vi? Matu tya Kalunga u undapa hitja puka, hiee tu yumaneka? (Hempa me popi monkalo yountu.) 6Aai, nokanunu. Kalunga ma ulu vi okukoya ouye andaa ye hamuvyuuki?

7Iya andaa otjatjili tjaKalunga hitji mu tumbaleketha, matji holololwa kovithithi vyandje, omena lyatji me koywa uke ngomulundhi? 8Omena lyatji hihame tyaa: “Tu undapen̯i ouvi, opo mu dhe ouwa”? Iya ovantu vamo va mpenya, hava nkuminine okutya mba popya hinyahi. Mava ka koywa hitji lithike povilinga vyawo.

Kaku na tja omuntu omuvyuuki noumo

9Iya tji li vi? Nt̯e Ovajuda, ont̯e tu li ovawa okupon̯a ovantu vamo? Aai, nokanunu. Twe tji yulika ae lukulu okutya Ovajuda nOvagreka avehe ve li kohi yodhonkono dhoulundhi, 10omusonekwa ngahi mau popi himau tyaa:

“Kaku na tja omuvyuuki noumo,#Eps. 14:1-3; 53:1-3

11ko kaku na tja noumo nguu yuvite,

ko kaku na tja noumo nguma taendha Kalunga.

12Ovantu avehe va yetha Kalunga.

Avehe va puka.

Kape na tja noumoumo nguma undapa ouwa.

13Ovinyo vyawo vi ngala ombila

ndjaa yuhama,

omalaka awo e na ovineya.

Movinyo vyawo mu dha odhondaka odhombi

ndhii ngala oudhioo wonyoka.#Eps. 5:9; 140:3

14Movinyo vyawo mwe yula omatuka omanene.#Eps. 10:7

15Odhompadhi dhawo dhi kanyauka okutilahi ombindhi.#Jes. 59:7-8

16Mpava enda, pa kala ehan̯auko novihuna.

17Ondjila youwa kave i i.

18Okutila Kalunga kave tji i.”#Eps. 36:1

19Napano tu tji i okutya atjihe soka oveta himai popi, mai tji heele mbave li kohi yoveta, opo omuntu auhe a patwe otjinyo, nouye auhe u kale au na onkali kotjipala tjaKalunga. 20Kape na tja omuntu noumo nguma ile omuvyuuki kotjipala tjaKalunga, hima hwithile po soka himatji pulwa koveta, mena lyokutya oveta i lile po okuheela omuntu okutya ye omulundhi.#Eps. 143:2; Gal. 2:16

Ouvyuuki womeitavelo

21Iya napano Kalunga wa hololola po ondjila yokuninga omuntu a ile omuvyuuki, hátji na tja noveta, oveta novaprofeti nawo ve tji hipulula. 22Kalunga otjipuka hehi me tji ningile ovantu avehe mbava itavela muJesus Kristus. Me ve ningile tjo, hápe na tja okapungulula.#Gal. 2:16 23Iya ovantu avehe va lundha, kave na tja elaimo lyaKalunga. 24Mava ningwa ovavyuuki otjali ket̯ilonkenda lye, mena lyokutya Kristus Jesus we ve yowola. 25Kalunga wa twaa po Kristus a ile omuwan̯en̯eki okupitila mombindhi ye kumboka mbamava itavele muye, opo a yulike ouvyuuki we. Iya mena lyolweembya lwe Kalunga wa yetha odhonkali dhovantu ndhaa ningwa lukulu ahame ve yumaneke. 26Iya napano Kalunga ma yulike okutya ye omuvyuuki, hima ningi omuntu nguma itavele muJesus, a ile omuvyuuki.

27Iya matu ulu okulitangela tji? Omena lyokutya tu tyaa oveta? Aai, iya omena lyahitwa itavela. 28Iya matu tya omuntu ma ningwa omuvyuuki mena lyeitavelo, hamena lyokuhwithila po oveta. 29Ne Kalunga okOvajuda vala aveika? Hakovapaani wo? Iinga, okovapaani wo. 30Kalunga yuumo vala nguu ninga ovantu mbava pita etanda nambahava pitile etanda, va ile ovavyuuki mena lyeitavelo.#Deut. 6:4; Gal. 3:20 31Oveta matu i itha po mena lyeitavelo? Aai, nokanunu, oveta matu i koleke.

Currently Selected:

Ovaroma 3: DBNT

Highlight

Copy

Compare