Ovaheberi Omuhangu
Omuhangu
Omukanda mbwaa sonekelwa Ovaheberi, matji tya wa sonekelwa engundwa lyovakriste Ovajuda, mbava li amava kondjethwa okutya va yethe eitavelo lyawo lyoukriste. Omusoneki we ve vandhipaleka okutya ahamava yetha eitavelo lyawo ndiva longwa pomautilo, he ve yulikile okutya Jesus Kristus oye e li tjatjili eliholololo lyaKalunga lyathiinina. Omusoneki ma popi unene ovipuka vitatu. Otjolutenga: Jesus OmunwaKalunga, ye owaapehe, nguu tyaa tjatjili kwiIhe. Iya we likambulithila, ha pitile momaudheu. Jesus omunene okupon̯a ovaprofeti womEtestamende Ekulu novaengeli naMoses. Otjityavali: Kalunga wa popya okutya Jesus omuyambethi waapehe, ye omunene okupon̯a ovayambethi womEtestamende Ekulu. Otjityatatu: Omwiitaveli ma hupithwa kodhonkali, kontilo noket̯o okupitila muJesus. Iya Jesus nguu li omuyambethi omunene, ma yandja ehupitho lyatjatjili, ndihamali yelekwa nandyoka ndyaa li vala otjidhidhimbe tjomayambo ovipako novipuka mbii ningwa meundapelokalunga lyOvajuda mEtestamende Ekulu.
Omusoneki hiaa yandja otjiholelwa tjovaitaveli mbava tumbala mOtjihipululo tjOvaisraeli, (eyandjwa 11) wa kumba ovatangi womukanda we, va kale ovaliun̯ikwa. Meyandjwa 12 we ve heela, va kambulithe eitavelo lyawo katee pomaandelo, nomeho ngamaa tala kuJesus, ve likambulithile, nandaku tiwa mava vadhwa komatatetho nokomaudheu. Omukanda wa tetulwa nodhondaka dhomapukululo nomalondolo.
Otjilimo
Etwalomo: Kristus oye e li eliholololo lyaKalunga ndyaa pwa (1:1-3)
Kristus wa pon̯a ovaengeli (1:4--2:18)
Kristus wa pon̯a Moses naJosua (3:1--4:13)
Kristus omuyambethi omunene ngwaa pon̯a ovayambethi avehe (4:14--7:28)
Ewaneneno lyaKristus lya pon̯a omawaneneno aehe (8:1--9:22)
Eyambo lyaKristus lya pon̯a omayambo aehe (9:23--10:39)
Eitavelo (11:1--12:29)
Okuthevelwa Kalunga (13:1-19)
Ealikano lyokutetula (13:20-21)
Omaandelo (13:22-25)
Currently Selected:
Ovaheberi Omuhangu: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.