Ovagalati 4
4
1Iya me mu heele okutya ompinga tainkolo ae li ompepe, pokati kawo nomupika koo pungu po, nandaku tiwa oye e li omwene wovipuka avihe. 2Iya tainkolo ae li omununu, ma kala ama yungwa, ha t̯ilwa otjiho katee potembu ndjoka ndjaa tuwa po kuIhe. 3Iya nant̯e wo hitwa li odhompepe, twa li kohi youpika wonkalo youye hembu, katee etango ndyoka twa ninga ovanene. 4Iya otembu ombwa hiye thiki, Kalunga wa tuma Omuna, ha yumukwa komukadhintu, ha kala kohi yoveta yOvajuda, 5opo e tu yowole kohi yoveta, nt̯e tu tjiiwe okwiila odhondele dhaKalunga.#Rom. 8:15-17
6Iya mena lyokutya mudhondele dhaKalunga, Kalunga wa tuma Ombepo yOmuna momitima vyetu. Ombepo ndjoka i tu heela hai tyaa: “Abba! Taa!” 7Ove kumupika uke, iya undele yaKalunga. Iya andaa undele yaKalunga, Kalunga me ke ku pa epingo.
Paulus wa li notjiho nOvagalati
8Iya himwa li ahamu i Kalunga, mwa li ovapika vamboka mbahave thi ookalunga katjatjili. 9Iya napano himu i Kalunga, unene tuu himu iwe kuKalunga, mamu ulu vi okutjuna uke kodhonkalo dhalukulu ndhihadhi na otjilinga, dho ndhihadhi na odhonkono, mu ninge uke ovapika vadho? 10Mu tangan̯eka omatango nomiedhi nomaluvedhe nodhombula. 11Ame ndji na otjiho nan̯e. Pamo ovilinga vyandje mbimbe mu undapela vya yonaka.
12Vakwetu, me mu kumbu mu ngale ame, ngaame wo hindji ngala n̯e. Kamu ndjihamethele nokanunu. 13Mamu thipaluka okutya olutenga himbe mu teethela ondaka ombwa, omena lyokutya nahi ndji vela. 14Nandaku tiwa mwa mona omaudheu mena lyonkalo yandje, n̯e kamu ntombele ne okundjekelahi, iya mwa ntambula ngomweengeli waKalunga, ngaKristus Jesus. 15Mwe hulukilwe, iya napano mwa ningwa tji? Ame ndji na oumbangi okutya ngaile mwa li amamu tji ulu, ngai mwa dhoola mo omeho en̯i, hamu e mpa. 16Iya mba ninga ondjedhi yen̯i, himbe mu heela otjatjili?
17Ovantu vamo mboka va vandhipala unene mena lyen̯i, atjaa ontanto yawo hambwa. Va hala oku mu itha ko kunt̯e, opo mu ve ningile ngawo hive mu ningila. 18Okukala odhombandhi apehe movipuka oviwa otjiwa, hakukala vala odhombandhi andji li pun̯e. 19Vanwandje, ame ndji na oviihamo ngedhimo amali kweya, katee mamu ngala Kristus. 20Me hala unene ndji kale nan̯e napano, opo ndji popye nan̯e nondaka ndjii lili, mena lyokutya mbe mu limbililwa.
Hagar naSara
21Ntjeela ndjen̯i iya, n̯e hemba mbamu hala okukala kohi yoveta, oveta kamu i yuvite himai popi? 22Iya kwa sonekwa okutya Abraham wa li novana vavali ovadhantu, umo wa yumukwa komukadhintu omupika, umo wa yumukwa komukadhintu nguhe thi omupika.#Gen. 16:15; 21:2 23Iya ondele yomupika wa yumukwa ngahi tji yumukwa odhondele, ondele yanguhe thi omupika wa yumukwa ngahi tja udhikilwa Abraham kuKalunga. 24Otjipuka hehi tja popiwa meeli. Iya ovakadhintu hemba vavali omawaneneno avali. Ewaneneno limo lyokondundu yaSinai ndii yumuka ovapika, olyo li li Hagar. 25Iya Hagar ma yelekwa nondundu yaSinai ndjii li muArabia, ye oye ma yelekwa naJerusalem tjanapano, hitji li moupika pamo novantu vatjo avehe. 26Iya Jerusalem tjokombanda hitja kutuluka otjo tji li meme. 27Iya kwa sonekwa haku tiwaa:
“O, hulukwa,
mpange ove nguho yumuka,
linyandaela,
ove nguho mwene oviihamo
vyedhimo amali kweya.
Iya odhondele dhompange ovengi
okupon̯a povangwaa huukilwa
komulumentu.”#Jes. 54:1
28Vakwetu, iya n̯e mudhondele dheudhiko ngaIsak. 29Iya ngahi tja li pomatango hengenya, ngwaa yumukwa ngahi tji yumukwa odhondele, wa lamba ngwaa yumukwa ngahi tja udhikwa kOmbepo, iya nanapano wo otjo tji li.#Gen. 21:9 30Iya Omusonekwa mau tya vi? Mau tyaa: “Taata mo omukadhintu omupika nomuna, mena lyokutya omuna omudhantu womukadhintu omupika kaa ulu okupingana pamo nomuna omudhantu womukadhintu nguhe thi omupika.”#Gen. 21:10 31Vakwetu, iya nt̯e katudhondele dhomukadhintu omupika, iya tudhondele dhomukadhintu nguhe thi omupika.
Dhimba New Testament © Bible Society in Namibia, 2010.