Ovaefeso 6
6
Ovanene nodhondele
1Dhondele, tyeen̯i kovanene ven̯i ngaMuhona hima hala, mena lyokutya hehi otjo tja vyuuka.#Kol. 3:20 2“Tumbaleka iho nanyoko,” otjitumino hehi tjolutenga tji na eudhiko ndimali tyaa:#Eks. 20:12; Deut. 5:16 3“opo u kale nelao nomwenyo omule kombanda yohi.” 4Valumentu, hámu yumanetha odhondele dhen̯i, ve tekulen̯i, mu ve longe n̯e mu ve kulithe muMuhona.#Kol. 3:21
Ovapika novahona
5Vapika, tyeen̯i kovahona ven̯i wokombanda yohi nontilo noku ve tumbaleka, tji ningen̯i nomwenyo auhe ngahi mamu ningile Kristus.#Kol. 3:22-25 6Hámu tji ningi vala mena lyovahona ven̯i ave mu lwete oku ve hulukitha, iya undapen̯i nomwenyo auhe soka himatji hopwa kuKalunga ngovapika vaKristus. 7Undapen̯i ovilinga vyen̯i nehuluko ngambamamu undapele Muhona omwene, havantu. 8Thipaluken̯i okutya Muhona ma ka thuta omuntu auhe ngoka nguma undapa ouwa kutya nee omupika ne onguhe thi omupika. 9Ovahona nan̯e wo ngatjo mu ve ningila, yethen̯i oku ve tilitha. Iya thipaluken̯i okutya n̯e amuhe mu na Muhona wen̯i meulu nguu koyela ovantu avehe hitji lithike.#Deut. 10:17; Kol. 3:25; 4:1
Omauta omukriste
10Iya me mu heele uke, mu likolethele muMuhona nomodhonkono dhe odhonene. 11Kalen̯i nomauta aehe ngoka Kalunga ngame mu pa, opo mu tjiiwe okuliamena kovineya vyomudiapoli. 12Iya nt̯e kaatu kondjetha ovantu, iya matu kondjetha ovatumini novanene, ovanankono vet̯iku hendi lyouye nodhonkono dhombepo ombi movyomeulu. 13Iya kalen̯i nomauta aehe ngoka Kalunga ngame mu pa, etango evi himali ya, mu tjiiwe okuvadhwa amwe lilongekedhele ovipuka avihe. 14Kalen̯i amwe lilongekedha, dhalen̯i otjatjili, tji kale omuvya modhondhalelo dhen̯i. Dhalen̯i ouvyuuki, u kale omudhalo wokodhontulo dhen̯i wotjivela woku mu amena.#Jes. 11:5; 59:17 15Okudhala odhongaku otjo tji li okulilongekedha okuteetha ondaka ombwa youwa.#Jes. 52:7 16Movipuka avihe kalen̯i notjiyakulilo tjeitavelo, opo mu tjiiwe okudhimitha natjo omidhi mbyaa tema omulilo vyomunauvi. 17Tambulen̯i ehupitho li ngale osapeu yotjivela nodhondaka dhaKalunga dhi ngale eonga ndimamu pewa kOmbepo Ondhilikwa.#Jes. 59:17 18Hehi tji ningen̯i nomaalikano nokukumba akuhe nokukumba apehe mOmbepo Ondhilikwa, iya kalen̯i amwa pathumuka noutakamethi auhe nokukumbila ovantu ovadhilikwa avehe. 19Nkumbila ndjen̯i ndji pewe kuKalunga odhondaka ndhoka ndhimba thele okupopya poluvedhe ndoka, opo ndji popye nouvandhi otjiholekwa hehi tjondaka ombwa. 20Iya ame ndjimukalelepo wondaka ombwa nandaku tiwa napano ndji li momalyenge. Iya nkumbila ndjen̯i, opo hime teetha ndji popye nouvandhi ngahi mba thele okupopya.
Omaandelo
21Tikikus, omukwetu omuhivilikwa, omuliun̯ikwa motjilinga tjaMuhona, me mu hipululile ovipuka avihe ouhunga naame, opo mu iwe hindji li po, nahime undapa.#Ovil. 20:4; 2 Tim. 4:12 #Kol. 4:7-8 22Iya ame me mu tumu kun̯e mena lyotjipuka hehi, opo mu iwe hitu li po, ye a tendeleke omitima vyen̯i. 23Vakwetu, Kalunga Tate naMuhona Jesus Kristus nge mu pe ouwa, ohole neitavelo. 24Et̯ilonkenda lyaKalunga ngali kale nawo avehe mboka mbave hole Muhona wetu Jesus Kristus, mbave mu hole nohole ndjihai anda.
Dhimba New Testament © Bible Society in Namibia, 2010.