Ovakolossa 2
2
1Ame me hala ndji mu heele ekondjo lyandje ndindji kondja mpali lithike okutya ndji mu popile n̯e novantu womoLaodikea, novakwawo avehe mbahaveya mbona keho. 2Me tji ningi, opo ohole i ve kute kumo, va kale nouvandhi okwiiwa ovipuka avihe. Wo mava ka iwa okutya Kristus oye e li otjiholekwa tjaKalunga. 3MuKristus mwa holekwa ouhona auhe wounongo nowodhondunge.
4Hehi me mu heele tjo, opo hámu pukithwa komuntu nokanunu, e mu hekele nodhondaka odhombwa. 5Iya nandaku tiwa ame hí li pun̯e, omwenyo wandje u li pun̯e. Mbe hulukwa hindji lwete onkalo yen̯i neitavelo lyen̯i hilya kola, himwa itavela Kristus.
Ehwilopo lyomwenyo muKristus
6Iya ngahi mwa tambula Kristus Jesus, Muhona, kalen̯i muye. 7Twamen̯i muye, n̯e mu litungile muye, mu likolethele meitavelo, ngahi mwa longwa, n̯e mu kale nompandu unene.
8Lungamen̯i, ahamamu pukithwa komuntu nokanunu ne kodhondunge dhoufilosofi wountu novikembo vala. Odhondunge ndhoka dha kulama modhonteto dhovantu nomodhombepo ndhoka ndhii tumina mouye, kadhi dhile muKristus. 9MuKristus, mountu we mu na ehwilopo lyoukalunga auhe. 10N̯e mwa hwithilwa po muKristus. Ye oye e li omutwe wovatumini avehe nowomatumino aehe.
11Mwa pitithwa etanda muKristus, hatanda hendi ndii undapwa nomawoko, iya hoolyondi olyokulidhula olutu lwountu, olyo li li etanda lyomuKristus. 12Iya himwa tjatjwa mwa pakwa pamo naKristus. Metjatjo lyatjo ndyoka, mwa imunwa kout̯e pamo naKristus mena lyahimwa itavela odhonkono dhaKalunga, ngoka ngwaa imuna Kristus kout̯e.#Rom. 6:4 13N̯e mwa t̯ile mena lyodhonkali dhen̯i nomena lyahihamu landula oveta yaKalunga. Iya napano Kalunga we mu pa omwenyo pamo naKristus, hiee tu ithila po odhonkali adhihe.#Efes. 2:1-5 14Wa dhima po embo lyodhongele dhetu adhihe ndhitwa thele okuthuta, we li itha po, he li papele komutjaakano.#Efes. 2:15 15Wa nyeka ovatumini nomatumino omauta, ha yulike oukata wawo poluhandja. We ve ton̯a nomutjaakano.
16Iya hámu itavele okupewa ombedhi komuntu nokanunu okutya mamu li tji ne mamu nu tji ne ouhunga nomatango omanene ovipito ne otjipito tjomwedhi awa tendama ne ouhunga nEsabati.#Rom. 14:1-6 17Hembi vi li ngotjidhidhimbe tjovipuka mbimavi ya, iya otjatjili oKristus. 18Ondjambi yen̯i youton̯i hámu i nyekwa komuntu nokanunu, nguu hala okulinunupika nokuundapela ovaengeli nokulitumbalekela omamoneko nokulithelela odhondunge dhe dhountu. 19Ye wa yetha okukulama muKristus, ngoka nguu li omutwe wolutu aluhe. Mena lyokutya kohi yetumino lyaKristus olutu aluhe malu tekulwa, halu kambulilwa kumo kodhongolo nomithipa, halu kulu ngahi matji hala Kalunga.#Efes. 4:16
Okut̯a nokukala nomwenyo muKristus
20N̯e mwa t̯a pamo naKristus, modhombepo ndhii tumina mouye hembu mwa kutuluka mo. Omena lyatji mwa ngala mamu hala okutyaa movipuka mbimavi tyaa: 21“Hó kambula! Hó lolo! Hó t̯in̯i!” 22Hembi avihe mavi undapethwa, havi pu po. Ovipuka hembi avihe nodhonteto hendhi adhihe dha ningwa kovantu. 23Iinga, ovipuka hembi mavi ngala vi na ounongo amave lin̯in̯ikidha okutumbaleka ovaengeli nokulinunupika kwovithithi, nokutatetha navi omalutu awo. Iya hembi avihe kavi na otjilinga ouhunga nokutumina omahalo omapuko awo.
Dhimba New Testament © Bible Society in Namibia, 2010.