Ovilinga 19
19
Paulus moEfeso
1Iya Apollos tainkolo a li moKorinto, Paulus wa yatakana movilongo vyomalukonko katee e ya koEfeso. KoEfeso wa vadha ko ovaitaveli vamo, 2he ve pula ha tyaa: “Mwa pewa Ombepo Ondhilikwa himwa ninga ovaitaveli?”
Wo ve mu yaka hava tyaa: “Aai, nt̯e nkee twa dhile katuya tyaa okutya ku na Ombepo Ondhilikwa.”
3Paulus we ve pula ha tyaa: “Iya nan̯i mwa tjatjwa etjatjo patji?”
Ve mu yaka hava tyaa: “Nt̯e twa tjatjwa etjatjo lyaJohannes.”
4Iya Paulus we ve heela ha tyaa: “Johannes wa tjatja ovantu mboka mbave liteyulula kodhonkali dhawo, he ve heele okutya ngava itavele mungoka ngume ya kon̯ima ye, okutya ngava itavele muJesus.”#Mat. 3:11; Mark. 1:4,7-8; Luk. 3:4,16; Joh. 1:26-27
5Iya ovantu hiva tee otjipuka soka hitja popiwa kuPaulus, va tjatjelwa mena lyaMuhona Jesus. 6Iya Paulus we ve tendeka omawoko, Ombepo Ondhilikwa hai ya muwo. Va uta okupopya momalaka ngahae iwe, otjo mava teetha odhondaka dhaKalunga. 7Ovalumentu mboka avehe kumo va li omulongo navavali.
8Paulus wa ya kosinagoga, ha tompola nawo, ha kondjo oku ve teethela nouvandhi ouhunga notjilongo tjaKalunga oule womiedhi vitatu. 9Ovantu vamo ve likukutika, hava anya okwiitavela eteetho lyaPaulus, hava penye ondjila yaMuhona Jesus movipathi vyovantu avehe. Iya Paulus we ve thiaa po, ha holowola mo ovaitaveli, ha i nawo kondongetho yaTirannus. Nahi owo a tompola nawo etango alihe 10oule wodhombula mbali, katee Ovajuda nOvagreka avehe moAsia va tee odhondaka dhaMuhona.
OomunkwaSkeva
11Iya Kalunga wa pa Paulus odhonkono okuundapa ovilingankono ovinene, 12nangahi tji li wo omalesu novitopa mbyaa t̯in̯ine kolutu lwaPaulus, hive vi tendeke kovavedhi, ovavedhi hava veluka, nodhombepo odhombi hadhi dhi mo movavedhi. 13Ovajuda vamo ovaendaendi ovimbanda va uta oku ka itha mo odhombepo odhombi, amava undapetha ena lyaMuhona Jesus. Va heela odhombepo odhombi hava tyaa: “Me mu anetha okutya mena lyaMuhona Jesus nguu teethwa kuPaulus, piten̯i mo momuntu hengu!” 14Mokati kovantu mbava ninga ovipuka hembi mwa li ovadhantu epanduvali womuyambethi omunene Omujuda nguu tiwa oSkeva.
15Ombepo ombi ye ve yaka hai tyaa: “Jesus ndji mu i, naPaulus mbe mu tyaa. Iya n̯e, on̯e oowaan̯i?”
16Omulumentu ngoka ngwaa li nombepo ombi, we ve lombokela, he ve tono. Monganda va taula mo, hava ka inkola nyahinya ava kulaumuka. 17Ovajuda nOvagreka avehe mbava kala moEfeso, hive tji tee, va kambulwa kontilo, hava tumbaleke unene ena lyaMuhona Jesus. 18Iya ovengi owomuwo mbava ninga ovaitaveli ve ya, hava hipulula, wo hava hololola ovilinga vyawo. 19Iya ovantu ovengi owomuwo va li ava undapetha oumpule wawo, va eta omambo awo oumpule, have e hike po movipathi vyovantu, ondando yao hiya havelwa kumo, ya ninga odhombongo dhotjisilveri#19:19 odhombongo dhotjisilveri: Ombongo yOvaroma ndjii tiwa uke ondenari ndjii thutwa omuundapi metango limo. omayovi omilongo vitano. 20Iya odhondaka dhaMuhona dha handjana, hadhi kala nodhonkono.
21Kon̯ima yovipuka avihe mbyaa ningwa ko, Paulus wa tokola okuyatakana moMakedonia naAkaia hima i koJerusalem. Ye wa popya ha tyaa: “Hime dhi ho, me tha okuya koRoma.” 22Paulus wa tuma ovapopili ve vavali Timoteus naErastus koMakedonia, ye tainkolo me tji kala kanunu koAsia.
Oudheu womoEfeso
23Potembu ndjoka pe ya oudheu ounene mena lyondjila yaMuhona Jesus. 24Iya omuhambuli umo wotjisilveri nguu tiwa oDemetrius, nahi u hambula motjisilveri omathano otempeli yaArtemis.#19:24 Artemis: Otjikalungakadhona tjOvagreka muva itavela okutya tji yandja oluyumuko. Otjilinga soka tja etela ovanongo vakwawo mbava undapa pamo naye emona en̯ingi. 25Demetrius wa ongedha ovantu avehe mboka mbava undapa pamo naye nambava undapa otjilinga ngotjawo, ha tyaa: “Vakwetu, mu tji i okutya ouhona wetu tu u mona movipuka hembi. 26Iya napano mwe tji mono naa nawa, n̯e mu tji yuvite omulumentu hengu Paulus ovipuka mbima ningi. Ye u tya ookalunga mbava undapwa nomawoko ovantu haookalunga, wa hekela ovantu ovengi, he ve ameke kuye, hamomuno vala moEfeso, iya omotjilongo atjihe tjaAsia. 27Pe na oudheu okutya ovilinga vyetu mavi ka tombwa, hatjo vala atjiika, iya notempeli yakalungakadhona Artemis mai ka kala vala. Ovantu kaava ka tumbaleka uke kalungakadhona Artemis, nguu tumbalekwa moAsia nomouye auhe.”
28Ovantu hive tji tee va li ava yumana, hava wololoka peulu hava tyaa: “Artemis kalungakadhona kOvaefeso, oye e li omunene!” 29Otjuuyila hehi tja handjana notjitungwalongo atjihe. Ovantu avehe va lombokela Ovamakedonia vavali, Gaius naAristarkus, mboka mbava endele pamo naPaulus, have ve lambele kontanga yovidhano. 30Paulus wa li ama hala okupopya komeho yowingi wovantu, atjaa ovaitaveli kave tji itavelele. 31Ovanene vamo uke wotjilongo, mboka mbava li omapanga aPaulus, ve mu tumina elaka have mu kumbu okutya há i ko kontanga yovidhano. 32Kontanga kwa li vala ovantu mbava ngwangwana, otjo mava wolauluka, amava popi otjontumba notjongandi. Owingi kawa li au tji i okutya va onganene tji. 33Ovajuda hiva yundulile Aleksander komeho yovantu, ovantu vamo va li amava tya pamo oye a etetha otjuuyila. Aleksander wa nyimitha ovantu nokuwoko kwe, mena lyokutya wa li ama hala okupopila Ovajuda komeho yowingi wovantu. 34Ovantu hiva mono okutya Aleksander Omujuda, va uta okuwololoka peulu ngomuntu umo oule wodhowola mbali hava tyaa: “Artemis kalungakadhona kOvaefeso, oye e li omunene!”
35Kon̯ima omusonekelipo wotjitungwalongo wa nyimitha ovantu, he ve heele ha tyaa: “Vaefeso n̯e, ovantu avehe ve tji i okutya otjitungwalongo tjOvaefeso otjaameni tjotempeli yakalungakadhona omunene Artemis, noyewe edhilikwa ndyoka ndyaa wa meulu. 36Kape na tja noumo nguma tetha ombata ovipuka hembi. Iya nyimen̯i, hámu undapa ovipuka mbihavya thele okuningwa. 37N̯e mwa eta ovalumentu hemba huno, nandaku tiwa wo kava vakele mo ovipuka ovidhilikwa vyomotempeli, wo kava penyene kalungakadhona ketu nokoholo. 38Demetrius novaundapi vakwawo andaa ve na oudheu watja nomuntu wontumba, omatango ngaa tuwa po ovikoya oko e li, nambava koya opo ve li, ngako va ka tangunina hoka. 39Andaa pe na uke tjimo himamu hala, iya tja thele okutompolwa motjoongi tjotjiwan̯a moveta yotjilongo. 40Iya otjipuka hehi hitja ningwa ndino, matji tu moneketha okutya nt̯e matu ngwangwaneke ovantu, nandaku tiwa hatjo. Kaatu ulu uke okulipopila otjuuyila tjotjipuka hehi.” 41Iya hiaa mana okupopya otjipuka hehi, wa heela ovantu ve liyapauke.
Currently Selected:
Ovilinga 19: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
