2 Ovatessalonika 2
2
Muhona me ya uke
1Iya napano matu popi ouhunga naMuhona wetu Jesus Kristus hime ya uke nouhunga nokwoongedhwa kwetu pamo, tu kale puye. Vakwetu, matu mu heele okutya#1 Tes. 4:15-17 2hámu ngwangwanekwa dhiva, n̯e hámu tilithwa nokanunu kombepo ne kondaka ne komukanda mbumau ngala wa dhi kunt̯e ngambumau tya etango lyaMuhona lye ya. 3Hámu pukithwa komuntu nokanunu, mena lyokutya okutjuna mon̯ima oko maku ya olutenga, omuntu omulundhi, ngwaa thele okukeka ma ka hololoka, 4ma ka kondjetha odhombepo adhihe ne ovikalunga avihe mbyoka ovantu mbiva tumbaleka. Me ke linomena ovipuka avihe, ha ka kala motempeli yaKalunga, he liluku Kalunga.#Dan. 11:36; Hes. 28:2
5Kaamu thipaluka himbe mu heelele ovipuka mbika, tainkolo hitwa li nan̯e? 6Iya napano mu tji i, himatji mu tjaele okuya, tainkolo oluvedhe lwe haluye thika. 7Otjiholekwa tjoulundhi tji li ae movilinga, atjaa kaatji ningwa, tainkolo ape na ngume tji tjaele. 8Omunauvi ma ka hololoka, iya Muhona Jesus me ke mu dhipaa nomuku womotjinyo. Okuhololoka kwaJesus hime ya, ma ku ka han̯auna po omunauvi.#Jes. 11:4 9Omunauvi me ke ya novilinga vyaSatana nodhonkono adhihe novilingatangan̯eko novilingakumithi vyovithithi,#Mat. 24:24 10me ya nokulilungametha huhaku vyuukile okupukitha mboka mbamava ka keka, mena lyokutya kava tambulile ohole yatjatjili yoku ve hupitha. 11Iya Kalunga me ve tumine epukitho enene, opo va itavele ovithithi. 12Iya avehe mboka mbahava itavelele tjatjili, mbava hopa ouvi, mava ka koywa.
Mwa holowolwa mu hupithwe
13Vakwetu ovahivilikwa vaMuhona, nt̯e twa thele okupandula Kalunga apehe mena lyen̯i, mena lyokutya Kalunga we mu holowola pomautilo mu hupithwe, ye we mu ninga ovantu ve ovadhilikwa kodhonkono dhOmbepo, nahimwa itavela otjatjili. 14Kalunga otjo e mu ithanena wo okupitila mondaka ombwa ndjitwe mu teethela, opo mu mone etumbalo lyaMuhona wetu Jesus Kristus. 15Vakwetu, pamen̯i, n̯e mu kambulithe odhonteto ndhitwe mu longa momateetho nomomikanda vyetu.
16Muhona wetu Jesus Kristus omwene naKalunga Tate, u tu hole. Ye omuwa, we tu pa ket̯ilonkenda lye etendeleko lyaapehe neliun̯iko ewa. 17Kalunga nge mu vandhipaleke, mu popye n̯e mu undape ovilinga oviwa.
Currently Selected:
2 Ovatessalonika 2: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.