2 Petrus 3
3
Okutjuna kwaKristus
1Vakwetu ovahivilikwa, hembu omukanda wandje omutyavali, mbume mu sonekele. Momikanda avyeevali mba kondjo okupathumuna omalipulo en̯i movipuka hembi, mu kale nomalipulo ngaa kohoka. 2Ame me hala oku mu thipalukitha odhondaka ndhaa popilwe lukulu kovaprofeti ovadhilikwa notjitumino hitja dha kuMuhona Omuhupithi, okupitila movayapostoli ven̯i. 3Olutengatenga mwa thele okwiiwa okutya omatango athiinina maku ke ya ovapenyi wokupenya, mava ka kala amava ende ngahi matji hala omahalo awo omavi.#Jud. 18 4Mava ka tyaa: “Ye wa udhika okutya me ya? U li pi? Ootate va t̯a lukulu, atjaa ovipuka vi li vala ngahi vya li lukulu okudha komautilo ouye!” 5Mave lidhimbitha wina otjipuka hehi ngambahave tji i okutya lukulu Kalunga wa popya nondaka, hape ya eulu. Ohi ya tungwa okudha momeva, hai tungwa nomeva.#Gen. 1:6-9 6Iya omeva atjo ngoka, Kalunga oo a undapetha hiaa han̯auna po ouye walukulu nethundja.#Gen. 7:11 7Eulu nohi mbii li po napano vya kalekwa po kondaka ndjoka yaKalunga, opo mavi ka han̯aunwa po nomulilo. Eulu nohi vya ungulilwa etango ndyoka, mbahave na ko natja naKalunga, himava ka koywa, hava han̯aunwa po.
8Iya n̯e, vahivilikwa vandje, hámu dhimbi otjipuka hehi okutya kuMuhona atjihe itjimo, pokati ketango limo nodhombula eyovi. Avyeevali kotjipala tjaKalunga vye litha.#Eps. 90:4 9Muhona ka ombelele okuhwithila po soka hiaa udhika, ovantu vamo ngahi va soka. Kalunga we likambulithila n̯e, mena lyokutya ka hala ku keke omuntu noumo, iya u hala okutya ovantu avehe ve liteyulule.
10Iya etango lyaMuhona mali ya ngotjimpulu. Etango ndyoka eulu mali ka ithwa po nomutitimo omunene, ovipuka vyokeulu mavi ka pya po nomulilo, nohi novipuka vyayo avihe mavi ka lungwina.#Mat. 24:43; Luk. 12:39; 1 Tes. 5:2; Ehol. 16:15 11Ovipuka avihe otjo mavi ka han̯aunwa nyahoka, n̯e ovantu mwa thele okuvadhwa amu li vi? Kalen̯i amu na ko natja naKalunga, mu kale ovadhilikwa, 12himamu kevelele etango lyaKalunga kondjen̯i ngahi mamu ulu okutya etango lyaKalunga li ye dhiva. Etango lyatjo ndyoka mali ka eta ehan̯auno lyeulu, novipuka avihe mavi ka hengumunwa komulilo 13Matu kevelele soka Kalunga hiaa udhika ngahi tji li: Eulu epe nohi ompe, mumamu kala ouvyuuki.#Jes. 65:17; 66:22; Ehol. 21:1
14Vakwetu ovahivilikwa, tainkolo mamu kevelele etango ndyoka, kondjen̯i mu kale amwa kohoka, ahamu na tja ombedhi, mu kale naye nouwa. 15Talen̯i okutya okulikambulithila kwaMuhona matji tya ehupitho kun̯e, ngomukwetu wo omuhivilikwa, Paulus, hiaa pewa ounongo, he mu sonekele. 16Hehi otjo a popya momikanda vye avihe. Muvyo mu na ovipuka vimo, mbii thitululwa pontyo kovantu mbahave na hive i, ngahi va ninga pomaluvedhe amo omisonekwa. Iya nyahoka mave lietele okuhan̯aunwa po ovene.
17Iya vakwetu, ovahivilikwa, otjipuka hehi mu tji i ae lukulu. Kalen̯i amwa lungama, opo hámu twalwa momapuko kovantu mbahave na oveta. Híme hala mu dhe monkalo yen̯i ombwa, ndjaa kola. 18Kalen̯i amamu kulu met̯ilonkenda lyaKalunga, mu iwe Muhona wetu, Omuhupithi Jesus Kristus. Ye nga tumbalekwe ndino katee apehe. Amen.
Dhimba New Testament © Bible Society in Namibia, 2010.