2 Petrus 1
1
1Omukanda hembu mau dhi kwaame Simon Petrus, omupika nomuyapostoli waJesus Kristus.
Me sonekele mboka mbava pewa eitavelo ewa ngolyetu mena lyouvyuuki waKalunga ketu nowOmuhupithi Jesus Kristus.
2Et̯ilonkenda nouwa owingi ngau kale nan̯e, mena lyokutya mu i Kalunga naJesus Muhona wetu.
Okwiithanwa nokuholowolwa kuKalunga
3Odhonkono dhe dhopaukalunga dhe tu pa ovipuka avihe mbitu hepa, opo tu kale nomwenyo nontilokalunga. Hehi matji tjiiwa, mena lyokutya nt̯e napano Kalunga tu mu i. Oye e tu ithana netumbalo nouwa we. 4Iya mena lyovipuka hembi, we tu pa otjali omaudhiko omanene ngae na okalu. Amwe e tambula mamu ulu okwiinkola elundhako ndii li mouye hembu mena lyehalo evi, hamu pewa mo monkalo yopaukalunga. 5Iya mena lyokutya Kalunga we tu undapela wo ovipuka ovinene hembi avihe, kondjen̯i nodhonkono adhihe, eitavelo lyen̯i li yulike ouwa, ouwa u yulike odhondunge, 6odhondunge dhi yulike okuliyunga nokulikambulithila, okulikambulithila ku yulike ontilokalunga, 7ontilokalunga i yulike ohole okukala au hole ovakriste ovakwen̯i, okukala au hole ovakriste ovakwen̯i ku yulike okukala au hole ovantu avehe. 8Ovipuka hembi andaa mu na vyo, havi ile ovingi mun̯e, mavi mu itha ondende, havi mu twala movilinga mbyoka mbimavi eta ovinyango okwiiwa kwen̯i Muhona wetu Jesus Kristus. 9Iya nguhe na tja ovipuka hembi, omupot̯i, ke ku mono, wa dhimba okutya odhonkali dhe dhalukulu dha ithwa po.
10Vakwetu, kondjen̯i unene, koleken̯i eitavelo neholowolo lyen̯i himwa ithanwa kuKalunga, mena lyokutya andaa otjo mamu ningi nyahoka, kaamu putala nokanunu. 11Iya nyahoka mamu ka pewa oluvedhe oluwa ndwaa hulu okuya motjilongo tjaapehe tjaMuhona wetu, Omuhupithi, Jesus Kristus.
12Iya me kala ame mu thipalukitha ovipuka hembi apehe, nandaku tiwa n̯e ovene mu vi i, nahimwa pamekelwa motjatjili himu na tjo. 13Ame me lipula okutya tja vyuuka ndji mu thipalukithe ovipuka hembi, tainkolo ndji na omwenyo. 14Iya ame ndji tji i okutya et̯o lyandje li li popedhi, ngahi mba heelwa kuMuhona wetu Jesus Kristus. 15Me kondjo oku mu yulikila ondjila, opo katango me dhi po mu tjiiwe wo apehe okuthipaluka ovipuka hembi.
Odhombangi dhelaimo lyaKristus
16Hitwe mu heela odhonkono nokutjuna kwaMuhona wetu Jesus Kristus, katu popile odhongano ndhii tewa kovantu. Iya nt̯e twa mona nomeho etu ovene odhonkono dhe odhonene. 17Kalunga Ihe we mu pa etumbalo nelaimo. Ondaka yetumbalo lyokombandambanda ye ya kuye, hai tyaa: “Hengu oye e li omunwandje omuhivilikwa ngumba hopa.”#Mat. 17:1-5; Mark. 9:2-7; Luk. 9:28-35 18Ondaka hendji ndjaa dha meulu, nt̯e ovene twe i tyaa, hitwa li naye kondundu ondhilikwa.
19Nt̯e tu na etumwalaka lyouprofeti ndyaa kola unene. Mamu ningi nawa amamu litwaa mo nawa, mena lyokutya lyo li ngala olamba amai tungatele met̯iku, katee maku tji, ngonyothi yomomahuka amai tungatele momitima vyen̯i. 20Komeho yovipuka avihe, kalen̯i amu tji i okutya kape na tja omuntu nguma ulu okuthitulula nodhondunge dhe ouprofeti waKalunga mbuu li mOmisonekwa, 21mena lyokutya kaku na tja ouprofeti mbwaa etwa kehalo lyomuntu, iya ovantu va popya soka hiva pewa kuKalunga, hava viyulwa kOmbepo Ondhilikwa.
Dhimba New Testament © Bible Society in Namibia, 2010.