1 Petrus 2
2
1Iya yethen̯i ovipuka avihe ovivi, ovithithi, okulinoma, onki nomalwaambo. 2Ngoupepe hiuu yama omahini, nan̯e kalen̯i nonyota yomahini opambepo ngoka ngae li odhondaka dhaKalunga, e mu kulithe, mu hupithwe. 3Omusonekwa ngahi mau popi himau tyaa: “N̯e mwa koneka okutya Muhona omuwa.”#Eps. 34:8
Ewe enamwenyo nomuhoko mbwaa holowolwa
4Indjen̯i kuMuhona, kewe enamwenyo ndyaa yekelwahi kovantu. Kalunga we li holowola, li na otjilinga otjinene. 5Ngomawe omanamwenyo, tungithwen̯i onganda yopambepo, mu ile ovayambethi ovadhilikwa wokuyamba omayambo opambepo ngamaa tambulwa kuKalunga okupitila muJesus Kristus. 6Iya Omusonekwa mau tyaa:
“Taa tuutuu, ame me twaa moSion ewe
ndyaa holowolwa, ndii na otjilinga otjinene.
Nguma itavele muye, kaa ka t̯ithwa ohon̯i.”#Jes. 28:16
7Ewe hendi kun̯e mbamwa itavela, li na otjilinga otjinene. Iya kumbahava itavelele, Omusonekwa mau tyaa:
“Ewe ndyoka ovatungi ndiva yekelahi,
lya ninga ewe ndyaa tumbala okupon̯a omawe aehe.”#Eps. 118:22
8Omusonekwa omukwawo mau tyaa:
“Ewe lyokuputaletha ovantu,
noluwaa lyoku ve withitha.”
Mava putala, mena lyokutya kava itavelele ondaka yaKalunga, ngahi va li amava halelwa.#Jes. 8:14-15
9Iya n̯e mumuhoko mbwaa holowolwa, ovayambethi wombala, otjiwan̯a otjidhilikwa, ovantu vaKalunga omwene mbamwa holowolwa, mu hipulule ovilinga vye ovinene. Kalunga we mu ithana mo met̯iku, mu ye motjiten̯i tje otjikumithi.#Eks. 19:5-6; Deut. 4:20; 7:6; 14:2; Jes. 43:20-21; 9:2; Tit. 2:14 10Nahi lukulu kamwa li ovantu vaKalunga, iya napano mwa ninga ovantu ve. Nahi lukulu kamwa li amu i et̯ilonkenda lyaKalunga, iya napano et̯ilonkenda lye mu li i.#Hos. 2:23
Ovapika vaKalunga
11Vahivilikwa, me mu pukulula, mu li ngovayenda nodhongendi mouye hembu. Litjaelen̯i komahalo aehe ountu ngaa kondjetha omwenyo. 12Kalen̯i nonkalo ombwa mokati kovapaani, iya andaa mave mu kuminine okutya mu undapa ouvi, va koneke ovilinga vyen̯i oviwa, va hive Kalunga katango me ya.
13Mena lyaMuhona tyeen̯i ketumino alihe lyountu, kutya nee okohamba nguu li omutumini wovantu avehe, 14ne kovatumini mbava tumwa komutumini wotjilongo okuya okuyumaneka mbava undapa ouvi nokupandula mbava undapa ouwa. 15Iya Kalunga ma hala okutya ovipuka mbimu undapa oviwa, vi tutuvaleke omapopyo omawoova. 16Kalen̯i amwa kutuluka, ekutuluko lyen̯i hámu li undapetha okutjikila ouvi wen̯i, iya kalen̯i ngovapika vaKalunga. 17Tumbaleken̯i ovantu avehe. Kalen̯i amu hole ovaitaveli vakwen̯i. Tilen̯i Kalunga, n̯e mu tumbaleke omutumini.
Kristus otjiholelwa tjambava tatethwa
18Vaundapi, tyeen̯i kovahona ven̯i, n̯e mu ve tumbaleke. Hámu tee vala kumbave li nawa, iya nokumbave na onya. 19Kalunga me ke mu pa otjiwa, andaa mamu likambulithile omatatetho, n̯e ahamu na himwa ningi, mena lyelityoo lyen̯i kotjipala tjaKalunga. 20Matji popile tji, andaa mamu likambulithile, nan̯i n̯e amwa tonenwa okuundapa ouvi? Iya andaa mamu likambulithile omatatetho, amamu undapa ouwa, okutya Kalunga me ke mu pa otjiwa. 21Iya otjipuka hitji li hinyahi, Kalunga otjo e mu ithanena, mena lyokutya Kristus naye wo wa tatethwa mena lyen̯i, we mu thiila otjiholelwa, opo mu landule modhompadhi dhe. 22Ye ka lundhile nokanunu. Kape na tja omuntu noumo ngwee mu tyaa ama popi ovithithi,#Jes. 53:9 23mbave mu penya, ke ve penyene, hiaa tatethwa, ka yumanene. We liun̯ika muKalunga ke nguu koya nawa hitja vyuuka.#Jes. 53:7 24Kristus wa tjinda odhonkali dhetu molutu lwe komutjaakano, opo tu kutuluke koulundhi, tu kale amatu undapa hitja vyuuka. N̯e mwa velulwa koviwalo vye.#Jes. 53:5-6 25Iya n̯e mu ngala odhondhu ndhaa keka, iya napano mwa tjuna komut̯ita nomutekuli womienyo vyen̯i.
Currently Selected:
1 Petrus 2: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.