1 Johannes 2
2
Kristus me tu popile
1Vanwandje, ovipuka hembi me mu sonekele vyo, opo hámu lundha. Iya andaa pe na nguma lundha, tu na omupopili puTate, Jesus Kristus, omuvyuuki. 2Iya oye e li ondjowo yetu. Iya hamena lyodhonkali dhetu vala, iya omena wo lyodhonkali dhouye auhe.
3Iya andaa matu takametha ovitumino vyaKalunga, okutya nyahoka tu tji i okutya tu mu i. 4Nguma tya u mu i, atjaa ye kaa takametha ovitumino vye, omuntu ngoka onkembi, muye otjatjili katji mo. 5Iya nguu takametha odhondaka dhaKalunga, ohole yaKalunga momuntu hengu otjatjili omo i li, ye yula. Iya nyahoka tu tji i okutya tu li muye. 6Nguma tya u li muye, naye wo wa thele okweenda ngaye.
Otjitumino otjipe
7Vahivilikwa, ame híme mu sonekele otjitumino otjipe, iya otjikulu, himu kala natjo okudha peutilo. Otjitumino hehi otjikulu, ondaka ndjimwa tyaa lukulu peutilo.#Joh. 13:34 8Me mu sonekele uke otjitumino otjipe, soka hitji li otjatjili muye nomun̯e wo. Et̯iku mali pu ko, otjiten̯i tjatjili matji tungatele ae.
9Nguma tya u li motjiten̯i, ye ae yele omukwawo okutya ye tee napano u li met̯iku. 10Nguu hole omukwawo, ma kala motjiten̯i, muye kamu na tja otjiputalethi. 11Iya nguu yele omukwawo, u li met̯iku, ye ma ende met̯iku, huma i, ke ku i, mena lyokutya et̯iku lya twikitha omeho e.
12Vanwandje, me mu sonekele, mena lyokutya mwa ithilwa po odhonkali dhen̯i mena lyena lyaJesus. 13Ootate, me mu sonekele, mena lyokutya ngwaa li ko okudha keutilo, mu mu i. Omatele, me mu sonekele, mena lyokutya n̯e mwa ton̯a omunauvi.
14Dhondele, me mu sonekele, mena lyokutya n̯e mu i Tate. Ootate, me mu sonekele, mena lyokutya mu i ngoka ngwaa li ko okudha keutilo. Omatele, me mu sonekele, mena lyokutya n̯e muvanankono nodhondaka dhaKalunga madhi kala mun̯e, n̯e mwa ton̯a omunauvi.
15Hámu kala amu hole ouye, n̯e hámu kala amu hole ovipuka vyomouye. Andaa pe na nguu hole ouye, ohole yokuhole Kalunga kai mo muye. 16Iya atjihe soka hitji li mouye, ngahi tji li ehalo lyountu nehalo lyomeho, nokulithela kwonkalamwenyo, kavi dhile kuKalunga, iya vya dha mouye. 17Ouye mau hulu pamo nomahalo ao, iya nguma undapa ehalo lyaKalunga, ma kala katee apehe.
Lungamenen̯i ooantikristus
18Dhondele, napano owola yathiinina, ngahi mwa tyaa okutya Antikristus me ke ya, iya napano ooantikristus ovengi ve ya. Iya nyahoka tu tji i okutya owola yathiinina. 19Ovantu hemba va dha mokati ketu, atjaa kava li owoyetu. Iya ngaile va li owoyetu, ngai va kala punt̯e. Iya napano tje liyulike okutya haavehe owoyetu.
20Iya n̯e mwa vavekwa kOmudhilikwa, nan̯e amuhe mu i otjatjili. 21Iya ame hí mu sonekelele mena lyokutya otjatjili kamu tji i, iya omena lyokutya mu tji i, n̯e mu tji i okutya motjatjili kamu dhi ovithithi.
22Onkembi aan̯i? Hanguma anya okutya Jesus oye e li Messias? Ngume litendele Kalunga Ihe nOmuna, oye e li Antikristus. 23Iya ngume litendele Omuna, me litendele naIhe, nguma tambula Omuna, ma tambula wo naIhe.
24Himwa tyaa okudha peutilo, ngatji kale mun̯e. Himwa tyaa okudha peutilo andaa matji kala mun̯e, okutya mamu kala mOmuna nomuIhe. 25Hendi olyo li li eudhiko, Kristus ndyee tu udhikila oku tu pa omwenyo waapehe.
26Mbe mu sonekele ovipuka hembi ouhunga novantu mboka mbamave mu pukitha. 27Ombepo Ondhilikwa ndjimwa pewa kuye, mai kala mun̯e, iya kaamu hepa okulongwa komuntu. Iya Ombepo ye mai mu longo ovipuka avihe, nelongo lye olyatjatjili, hakukemba, ngahi ye mu longa, kalen̯i muye.
28Vanwandje, napano kalen̯i muye, opo katango me ke ya, nt̯e tu kale neliun̯iko, opo hátu ka t̯ithwa ohon̯i, nt̯e ahamatu ka tewa po hime ya. 29Andaa mu tji i okutya Kristus omuvyuuki, mu tji i wo okutya auhe ngoka nguma undapa hitja vyuuka, wa yumukwa muKalunga.
Currently Selected:
1 Johannes 2: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.