YouVersion Logo
Search Icon

Yoan 21

21
Yesu ivot to mbiwa tooni liim ve ru izi nari to yaa naliu Galilaia
1Murei ra, Yesu ila ivot to mbiwa tooni muul izi nari to yaa naliu Tiberias. #21:1 Tiberias, ene yaa naliu Galilaia eeza ite. Ila ivot toozi itaghon eez tauvene. 2Simon Petrus, Tomas tau eeza ite Didimus na, Natanael to nugh Kana tau igheen izi Galilaia na, ve Zebedi natŋa ru, tomania mbiwa ru paam yesŋa tilepleep. 3Simon Petrus iburig, ve isaav pa zeetŋa tawe ighe: “Yau naghe navot nala nasik puugh.”
Zeetŋa tana tisaav pani tighe: “Yei paam, itiŋa tavot tala.” Tauvene yes tisov tila tizaa waaŋ, ve tivot tila. Mboŋ tana, tiwaswaas le nughizau. Eemon tigham iigh eta mako. Lu 5:4+
4Ndoroome geeg, ve matazi iloŋ ila le tighita Yesu iyozyooz izi nari. Eemon tighilaalo mako. 5Yesu iboob ila pazi ighe: “Ou geegeu, agham iigh eta, ma mako?”
Yes tiyol aliiŋa tighe: “Waii, nigham eta mako kat.”
6Tauvene i iboob ila pazi muul ighe: “Ighe vene, o asik puugh ila pa waaŋ ziige tau igheen ila pa tapir na. O agham iigh.” Tauvene tisik puugh toozi izila muul. Saawe tau tighe tiyauu izaa, titoova le tirao mako. Pasaa, iigh katini tighoon ila puugh le ivon kat.
7Mbiwa tau Yesu loolo igheen tooni kat na, ighita gabua tana, ve isaav pa Petrus ighe: “Ewe aat Tiina toit!” Saawe tana, Simon Petrus izuzuum nonoghiiŋa tooni to ŋgoaaŋ izi, ve ighamgham uraat. I ilooŋ saveeŋ tana, ve rekia mon inonogh ghi muul, ve iyaat izila yaa, gha iwai iloŋ ila pa nari. 8Yes tipot tigharau nari, irau 100 mita ma vene. Tauvene mbiwa siriv tau tileep ila waaŋ na, tigherev puugh tomania iigh, ve titaghon Petrus gha tiloŋ tila pa nari. 9Tilooŋ kurukia ve tiyaat tizi, ve tighita mberet tomania iigh ighengheen izala yav ŋgilaaŋi.
10Yesu isaav pazi ighe: “Iigh tau ŋgarig gha agham zi na, agham siriv ilam imoz.”
11Tauvene Simon Petrus ivot muul ila gha izala waaŋ, ve igherev puugh tomania iigh ilooŋ ilam taan. Iigh tighoon tila puugh le ivon kat. Eemon imotmot mako. Iigh geegeu mako. Tintinazi mon. Tinin zi le irau ndiŋndiŋ ee, aavo tamoot ru saŋavul, ve geege tol (153).
12-13Yesu isaav pazi muul ighe: “Mboŋoozo wa. Alam aghan lemim aniiŋ.” I isaav tauvene, ve niima ila pa mberet tomania iigh tawe, ve ireii pazi. Mbiwa tooni eta aavo pakia gha ighasoni ighe: “Yo sei?” ene mako. Tiroi pa ghasoniiŋni. Pasaa, tighilaalo tighe i Tiina toozi. Mbaŋ 10:41
14Yesu iburig pa mateegh, ve ivot to mbiwa tooni pai ru ila wa. Ve ite tane imin tol pani.
Yesu ighur Petrus pa uraat muul
15Yes tighan le isov, ra Yesu ighason Simon Petrus ighe: “Aa Simon, Yoan naatu, mindai? Yo lolom payau kat iliiv zetamŋa siriv tane, ma mako?”
Petrus iyol aliiŋa ighe: “Vee! Tiina, yo uwatagh, yau lolog payo.”
Yesu isaav pani ighe: “Upan sipsip tsiau paghpaaghu.” Mbaŋ 20:28; 1Pe 5:2
16Ra Yesu ighasoni muul imin pai ru ighe: “Aa Simon, Yoan naatu, yo lolom payau kat, ma mako?”
Petrus iyol aliiŋa ighe: “Vee! Tiina, yo uwatagh: Yau lolog payo.”
Yesu isaav pani ighe: “Uŋgin poghania sipsip tsiau.”
17Ra Yesu ighasoni muul imin pai tol ighe: “Aa Simon, Yoan naatu, yo lolom payau, ma mako?”
Petrus ilooŋ Yesu igham ghasoniiŋ tana pani imin pai tol, le loolo ipataŋan. Tauvene iyol aliiŋa ighe: “Vee! Tiina, yo uwatagh gabua naol isov. Yo uwatagh, yau lolog payo.”
Yesu isaav pani ighe: “Upan sipsip tsiau. Lu 22:61+
18Onoon kat, yau nasaav payo: Saawe tau yo paghum, taum ukat kawaal tsio izaa ve upuus ghom. Ve nugh sindei tau yo ughe ula pani, na ula mon. Eemon murei, saawe tau umin kooŋ, ene pale uraraav nimam, ve ŋeer ite ikat kawaal tsio izaa ve ipuus ghom. Ve nugh tau yo ughe ula pani mako, i pale igham ghom ula pani.” 19Saveeŋ tane, Yesu isavia izaa to eez tau Petrus pale imaat, ve ipaghazoŋai Maaron eeza tiina. #21:19 Sinaiŋ muŋganazi siriv tisaav tauvene: Murei, Petrus ila ileep izi nugh tiina Rom. Saawe tana, kinik to Rom ighur pataŋani naol pa yes Kristen, ve irav tamtamon toozi katini timatmaat. Eemon Petrus iroi mako. Iyooz ariaaŋ, ve ivovotia vaaru poia le irau yes Roma tikisi, ve tiravu izala ai pambarooŋ. Eemon Petrus loolo pa imaat raraate imin Krisi mako. Tauvene isaav pa yes zaaba gha tiravu daaba izi, ve aaghe izaa. Ve Yesu isaav pani muul ighe: “Utaghon ghau!” Mk 1:16+; 2Pe 1:14
Mbiwa tau Yesu loolo igheen tooni kat
20Petrus yesuru Yesu tilaagh tila, ve Petrus itoor ghi, ve maata imuul le ighita mbiwa tau Yesu loolo igheen tooni kat na, itaghon zi gha ilam. Muuŋ, saawe tau tilup zi pa ghanghaniiŋ to Pasova, ŋeer tawe ta ipaak Yesu, ve ighasoni pa sei ta pale ighuru ila koiŋa nimazi. Yo 13:23+
21Petrus ighita mbiwa tana, ve ighason Yesu pani ighe: “Tiina, mindai pa i tau ilam ne?”
22Yesu iyol aliiŋa ighe: “Matam ila pani sov. Isaav ighe yau naghe i ileep le irau namuul nalam, ene yo gabua tsio mako. Ene igheen to yau taug. Yo aat matam iŋgal taum, ve utaghon ghau.” 23Yesu isaav pani tauvene, tauta murei ra saveeŋ ilaan le irau yes toŋvetaz naol tau tighur ila to Krisi na, ve tighe pa mbiwa tooni tau i loolo igheen tooni kat na, irau imaat mako. Eemon Yesu isaav tauvene mako. Isaav mon tauvene: “Ighe yau naghe i ileep le irau namuul nalam, ene yo gabua tsio mako.”
24Mbiwa tawe, ta ighit katin gabua isov tana, ve ibodeer zi ila rau tane. Leso ipariaaŋ saveeŋ to Yesu, ve tamtamon tighur ila tooni. Ve yei niwatagh: Saveeŋ tooni, ene onoon kat. Yo 19:35
Saveeŋ tau ipasov rau tane
25Yesu igham uraat katini. Eemon tibood zi tisov ila rau mako. Tibood eŋaeŋa mon. Ve imin ta tibood uraat tooni isov ila rau, kanaŋ rau tana ivot imin ndiŋndiŋ ndiŋndiŋ le ipavon taan isov, ve siriv lezi niazi mako! Yo 20:30

Currently Selected:

Yoan 21: tucNT

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy