EHOLOLO 1
1
1Ehololo laJesus Kristus, eli Kalunga e li mu pa okuulikila ovapiya vaye ei i nokuningwa diva. Jesus okwe i shiivifila Johannes, omupiya waye nokutuma omweengeli waye kuye. 2Johannes ota hepaulula ondjovo yaKalunga nehepaululo laJesus Kristus, naaishe oyo e i mona. 3Omunelao oyou, ta lesha eendjovo domaxunganeko ou naava tave di pwilikine nokudiinina eshi sha shangelwa mo, osheshi efimbo oli li popepi. 4Johannes komaongalo aheyali muAsia:
Efilonghenda kunye nombili kwaau e li po, nokwa li po ndee te uya, nokeemhepo odo heyali hadi kala kolukalwapangelo laye, 5nokuJesus Kristus, omuhepaululi omudiinini, Shiveli shomovafi nOmupangeli weehamba dedu.
Ou okwa li e tu hole nokwe tu mangulula momatimba etu nohonde yaye, 6nokwe tu ninga ouhamba novapristeli vaKalunga novaXe; efimano olaye neenghono odaye alushe fiyo alushe! Amen.
7Tala, Ye ote uya moilemo, nomesho aeshe otae ke mu mona, naava yo ve mu tyuula; nomapata aeshe okombada yedu otaa ka lilaana, eshi tae mu mono. Heeno, Amen.
8“Aame Alfa naOmega,” nokutya, ehovelo nexulilo, Omwene Kalunga osho ta ti, Oye ou e li ko nokwa li ko ndele te uya, omunamapangelo aeshe.
Jesus te lihololele Johannes konhunhu yaPatmos
9Aame Johannes, omumwaxo omukweni mouyehame nomouhamba nomelididimiko muJesus Kristus; onda li konhunhu yaPatmos omolwondjovo yaKalunga nomolwehepaululo laJesus Kristus. 10Mefiku lOmwene onda li mOmhepo, ndele nda uda konima yange ondaka inene ya fa enghuma, 11ya tya: “Eshi to shi mono, shi shanga membo, ove u li tumine omaongalo enya aheyali omuAsia: kuEfeso nokuSmirna nokuPergamo nokuTiatira nokuSarde nokuFiladelfia nokuLaodikea.”
12Ame onda punguluka ndi tale ondaka ei ya popifa nge; eshi nda punguluka, onda mona oixwekelwashela iheyali yoshingoldo, 13nomokati koixwekelwashela onda mona mo umwe, a fa Omona wOmunhu a djala oshikutu shile sha twa keemhadi, nekwamo loshingoldo ponhulo. 14Omutwe waye neexwiki oda li ditoka to, ngaashi olududi litoka, nongaashi omongwa utoka to nomesho aye ongaashi omalaka omundilo, 15neemhadi daye oda li da fa outale voshikushu sha hanyifwa, nondaka yaye oya fa epopolo lomeva manenenene. 16Nomeke laye lokolulyo okwa li e kwetele mo eenyofi heyali, nomokanya omwa dja eongamukonda leemhemokuvali la twa, noshipala shaye osha li sha fa etango la yela neenghono dalo.
17Ndelenee eshi nde mu mona, onda wila keemhadi daye nda fa nda fya. Ndele Ye a tenheka nge eke laye lokolulyo ndele ta ti: “Ino tila, Aame ou, omutete nomuxuuninwa, 18ondi nomwenyo, onda file, ndele tala, ondi nomwenyo fiyo alushe; ndele ondi neeshapi defyo nodoshovafi. 19Shanga hano ei wa mona, naashi shi li po, naashi tashi ke uya komesho. 20Oshiholekwa sheenyofi odo heyali we di tala meke lange lokolulyo, noshoixwekelwashela ei iheyali yoshingoldo otashi ti ngaha: Eenyofi odo heyali odo ovaengeli vomaongalo aheyali noixwekelwashela ei iheyali oyo omaongalo aheyali.
Currently Selected:
EHOLOLO 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.