OILONGA YOVAYAPOSTOLI 1
1
1Mehepaululo lange lotete, omukwetu Teofilus, onde ku hepaululila aishe Jesus a hovela oku i longa noku i ninga, 2fiyo okefiku olo a twalwa meulu, eshi a pa tete ovayapostoli, ava e va hoolola, oipango yaye mOmhepo Iyapuki; 3konima yomahepeko aye okwe ve lihololela yo nomadidiliko mahapu nokutya, Oye omunamwenyo, eshi e ve limonifila omafiku omilongo ine ndele te va hepaululile oinima youhamba waKalunga.
Jesus ta i meulu
4Ndele eshi a kala pamwe navo okwe va lombwela vaha dje mo muJerusalem, ndelenee va teelele ewanifo leudaneko laXe, olo mwe li uda kwaame, ngaashi a tya. 5Osheshi Johannes okwa shashele nomeva, ndele nye otamu ka shashwa nOmhepo Iyapuki omafiku amwe eshi a pita po.
6Opo nee vo eshi va li va ongala, ve mu pula tava ti: “Omwene, opefimbo tuu eli to tungululile Israel ouhamba?” 7Ye okwe va nyamukula, ta ti: “Kashi fi sheni okushiiva omafimbo ile eetundi edi Tate e di tula po meenghono daye mwene, 8ndelenee nye otamu pewa eenghono, Omhepo Iyapuki ngeenge tai uya munye, ndele tamu ka ninga eendobwedi dange muJerusalem nomuJudea ashishe nomuSamaria nofiyo okominghulo dounyuni.” 9Opo nee eshi a tonga eendjovo edi, okwa yelulwa pombada moipafi yavo, noshilemo she mu kufa po momesho avo.
10Ndele fimbo va li tava lyaamene keulu, eshi ta i, tala, ovalumenhu vavali va djala oikutu itoka ova fikama puvo, 11ndele tava ti: “Ovalumenhu nye Ovagalilea, oshike mu li ofika ndele tamu tale keulu? Jesus tuu ou e mu kufwa a ya meulu, osho tuu ngaha ta aluka ko, ngaashi mwe mu mona a ya meulu.”
Ovayapostoli mokwoongala nomokwiilikana kwavo
12Ndele ova shuna kuJerusalem va dja komhunda ya ifanwa Omhunda yEemono i li popepi naJerusalem, pe noshinano shi fike pondjila yEshabata. 13Ndele eshi ve uya ko, ova ya kondjuwo ei yokombada omo hava kala mo yo shito: oPetrus naJohannes naJakob naAndreas naFilippus naTomas naBartolomeus naMateus naJakob yaAlfeus naSimon omuladi naJudas yaJakob. 14Ndele ovo aveshe ova kala nomutima umwe va diinina mokwiilikana pamwe naMaria, ina yaJesus, novakainhu oovakwao pamwe novamwaina vaJesus ovalumenhu.
Okuhoololwa kwaMatias
15Ndele momafiku enya ovanhu ve fike pefele limwe nomilongo ivali eshi va li va ongala, Petrus okwa fikama mokati kavo ndele ta ti: 16“Ovalumenhu nye ovamwatate, eshangelo eli oli nokuwanifwa Omhepo Iyapuki e li tongifa nale okanya kaDavid, a tonga Judas, ou a ninga omukwatelikomesho waavenya va kwata Jesus. 17Osheshi okwa li a valulilwa mongudu yetu, ndele a pelwe oshipewa shoshilonga eshi. 18Nepya e li lilikolela nondjabi yokunyona kwaye, ei e i pewa; nokwa wa ko, a wila poshi ndele a topa pokati, nomandjadja aye aeshe a wa mo. 19Noshinima eshi osha shiivika kOvajerusalem aveshe, onghee epya eli la pewa edina melaka lavo Akeldama, otashi ti epya lohonde. 20Osheshi mOmapsalome omwa shangwa:
‘Eumbo laye nali ninge eputu
muha kale nande omunhu;
umwe na tambule oufitalonga waye.’
21Hano umwe womovalumenhu ava va li va endaenda nafye efimbo alishe, eshi Omwene Jesus kwa li he uya mo ndele ha di mo mokati ketu, 22okudja keshasho laJohannes fiyo efiku olo a kufwa mufye, a ya meulu, na ninge ondobwedi yenyumuko laye pamwe nafye.” 23Ndele ova hoolola mo vavali: Josef a ifanwa Barsabas, edina laye likwao Justus, naMatias, 24opo nee va ilikana tava ti: “Omwene, Oove ou wa shiiva omitima daaveshe, tu ulikila elipipo mwaava vavali we mu hoolola, 25a pewe onhele meyakulolonga eli nomouyapostoli, omo Judas e liteeka mo nokwa ya ponhele yaye mwene.” 26Vo ove va pa oihoololifo, noshihoololifo osha kwata Matias, ye okwa valulilwa movayapostoli venya omulongo naumwe.
Currently Selected:
OILONGA YOVAYAPOSTOLI 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.