SAKARIA 10
10
Omwene ta filonghenda oshiwana shaye
1Indileni kOmwene odula pefimbo lodula yokulombo. Omwene ta tumu oushelu moshikungulu, ndele te va pe omuloka noimeno mepya lakeshe omunhu. 2Osheshi oiketi hai popi eendjovo doipupulu, novanongo hava mono oipupulu, ndele hava udifa eendjodi dongaho nomahekeleko avo ongaho. Onghee va ya ngaashi oufita weedi, hava fi oluhepo, osheshi vehe nomufita.
3Ehandu lange ola xwamena ovafita novapangeli, Ame ohandi ke i handukila. Osheshi Omwene womatanga ovakwaita ota kalele oufita waye noshisho, nokutya eumbo laJuda, ndele te li ningi onghambe i nefimano moita. 4Mulo tamu di emanya lekanghameno, ombosha yomekuma, outa woita novapangeli aveshe. 5Ndele ohava ka kala ngaashi ovaladi ava hava lyataula onhata yomomapandavanda moita, ndele vo otava ka lwa, osheshi Omwene oku li pamwe navo, novalondi veenghambe tava ka fifwa ohoni. 6Ndele ohandi ka pameka eumbo laJuda, nokukwafa eumbo laJosef, ndele handi va shunifa kedu lavo, osheshi Ame handi va file onghenda. Ndele vo otava ka kala ngaashi inandi va ekelashi nande, osheshi Aame Omwene Kalunga kavo ndele Ame ohandi ke va uda. 7Ndele Efraim tashi ka kala ngaashi omuladi nomitima davo tadi ka hafa ongaava va nwa omaviinyu, novana vavo tave ke shi mona, ndele tava hafe, nomitima davo tadi nyakukwa mOmwene. 8Ame ohandi va ifana nomwilwa noku va ongela. Osheshi Ame nde va kulila, ndele vo otava ka hapupala unene ngaashi va li nale. 9Nge handi va halakanifa mokati koiwana otava ka dimbulukwa nge meenhele dokokule. Ndele vo pamwe novana vavo tava ka kala ve nomwenyo, ndele tava ka alukila kedu lavo. 10Ohandi ke va alula mo medu laEgipiti. Ndele handi ke va kongolola muAsiria, ndele handi va eta koshilongo shaGilead nokuLibanon. Ndelenee vo itava ka wana mo. 11Ndele otava ka tauluka noudjuu, ndele Omwene ta denge omakufikufi efuta, noule aushe womulonga Nil otau ka kukuta. Elinenepeko laAsiria tali natwa po nodibopangelo yaEgipiti tai di po. 12Ndelenee Ame ohandi ke va pameka mOmwene, nedina laye tali kala elitango lavo, Omwene ta ti.”
Currently Selected:
SAKARIA 10: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
