OMAPSALOME 132
132
Sion onhele yOmwene Ohamba yaSion Omuvaekwa wOmwene
Eimbilo lomolweendo lokuya kouyapuki.
1Akutu, Omwene, dimbulukila David
omalipyakuduko aye aeshe,
2ou a li nale e lianena Omwene
ndele ta udanekele Omunaenghono,
Kalunga kaJakob, ta ti:
3“Metwali lomonhanda yange itandi i mo nande,
ile ndi ka nangale momutala wange,
4nomesho ange itandi a efa a fye eemhofi,
neemhafu dange di fifikine,
5fimbo inandi monena Omwene omutumba,
onhele yOmunaenghono waJakob.”
6Tala, otwe shi uda muEfrata,
notwe shi mona mehenene laJaar:
7Tu yeni moukalelo waye,
fye tu ka tweni eengolo poshilyatelo sheemhadi daye.
8Omwene, fikama, u uye komutumba woye,
Oove mwene noshikefa sheenghono doye.
9Ovapristeli voye nave lidike ouyuki,
novakoshoki voye nava nyakukwe.
10Molwomupiya woye David
ino likandula oshipala shomuvaekwa woye;
11Omwene okwa anena David eano lashili,
ite li lundulula, a tya:
“Umwe womoludalo loye,
onda hala oku mu paka omutumba
kolukalwapangelo loye.
12Ovana voye ovamati,
ngeenge tava diinine ehangano lange navo,
ehepaululo eli handi longo,
opo nee ovana ovamati vavo
otava kala yo kolukalwapangelo loye fiyo alushe.”
13Heeno Omwene okwa hoolola Sion,
okwe shi lihoololela, shi ninge onhele yokukala kwaye.
14“Onhele ei oyo yokutulumukilwa kwange fiyo alushe;
moima omu, omo handi kala,
shaashi onda djuulukwa mo.
15Oipalwifa yasho onda hala oku i punika i hapupale,
Ame ndi palule omapongo amo neendja.
16Ovapristeli vasho ohandi va djaleke exupifo,
novayuki vasho nava nyakukifwe pombada.
17Omo onda hala okukulifila mo eenghono daDavid,
nonda longekidila mo omuvaekwa wange oshiminikilifo.
18Ovatondi veni ohandi va dike odino,
ndelenee oshishani shokomutwe waye,
nashi kale tashi vilima.”
Currently Selected:
OMAPSALOME 132: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
