OMAPSALOME 106
106
Oudiinini wOmwene
1Halleluya!
Hambeleleni Omwene, osheshi Oye omuwa,
ouwanghenda waye tau kala po fiyo alushe.
2Olyelye mbela ta dulu okutonga
oinenelonga yOmwene, e i fikife po,
ye a shiivife ngeno efimano laye alishe?
3Ovanelao ovava, va dama mouyuki,
ndele tava kala alushe nokuwanifa ouyuki.
4Omwene, dimbulukwe nge molwefilonghenda
eli ho ningile oshiwana shoye.
Talele nge po nekwafo loye.
5Opo ndi shiive okutala elao lovahoololwa voye,
nondi nyakukilwe ehafo loshiwana shoye,
ame ndi litange pamwe noshitukulwafyuululwa shoye.
6Fye nootate, atushe otwa nyona,
twe livilikita ndele twa longa oidinifikalunga.
7Ootate yetu muEgipiti
inava koneka oikumwifalonga yoye,
inava dilakana ouhapu
womaningilo ouwanghenda woye,
va tumhakana mwoou wOkombadambada
pEfuta Litilyana;
8ndelenee Ye okwe va xupifa molwedina laye,
okuholola eenghono daye.
9Okwa aneka Efuta Litilyana:
ndele opa holoka oukukutu,
ndele te va pitifa momeva ngaashi ometunda.
10Osho nee ngaha okwe va xupifa momake ovataataai,
ndele te va kulile meenghono domutondi.
11Omeva okwa tuvika ovafininiki vavo:
inapa xupa nande umwe womuvo.
12Opo va itavelela eendjovo daye,
ndele tava imbi efimano laye.
13Ndelenee inava kalela kudimbwa
oinenelonga yaye,
nomhangela yaye inave i telamena;
14mofuka ove liyandja mokahalu kavo,
ndele va yeleka Kalunga mombuwa.
15Opo nee ye e va pa eshi ve shi pula,
ndelenee okwa tuma muvo oudu mudjuu.
16Opo nee monhanda ova ngongotela Moses
naAron, omupiyayapuki wOmwene;
17opo tuu opo edu ola akama okanya
ndele tali pona po Datan,
ndele tali tuvike etanga laAbiram,
18nomundilo owa xwika ongudu yavo,
omitemo oda mana po ovakolokoshi.
19KuHoreb, oko ove li ningila oshiyelekela shokatana
ndele tava tu eengolo kefano loshivela la hambulwa.
20Noshinge shavo ove shi tekuka
ndele tava tekukile oshiyelekela shomhedi,
ei tai li omwiidi.
21Okwa li va dimbwa Kalunga, Omuxupifi wavo,
ou a ningile oinima inene muEgipiti,
22noikumwifa medu laHam,
noitilifalonga pEfuta Litilyana.
23Opo Ye a uka oku va hanauna po,
ndelenee e shi efifwa kuMoses, omuhoololwa waye,
ou a ile kuye, oku va popila,
Ye a pungulule po puvo ehandu laye loku va kanifa.
24Opo nee va dina oshilongo shinya shiwa unene,
neendjovo daye inave di itavela.
25Ndelenee va ngongota meenhanda davo,
ndele inava dulika kondaka yOmwene.
26Opo nee Ye e va yelulila eke laye,
e va mane po mofuka,
27noludalo lavo e li lihanifile movapaani
noku li nipila moilongo.
28Opo nee ove lipaka kuBaal-Peor,
nova lya omayambo aai ihe nomwenyo
29ndele tave mu tondifa noilonga yavo.
Opo nee eshi pa tukuluka eefya mokati kavo,
30Pinehas okwa fikama ndele ta wanifa etokolo;
neefya oda kanghekwa.
31Eshi osha talwa ko sha yuka notashi ka dimbulukiwa
koludalo noludalo fiyo alushe.
32Opo va tikukifa Kalunga pomeva omuMeriba,
ndele Moses a monifwa oixuna molwavo.
33Osheshi vo, eshi va li va hanyena
Omhepo yaKalunga,
oshe mu livondifa okupopya nomilungu daye.
34Oiwana yoilongo inave i hanauna po,
ngaashi va lombwelwa kOmwene.
35Ndelenee ova lumbakana mumwe novapaani,
ndele tave liikifa eenghedi davo.
36Ndele tava longele oikalunga yavo;
yo oye va pundukifa nokuli.
37Heeno, ovamati vavo noukadona vavo
ove va fiyawilile keendemoni,
38ndele va tilashi ohonde ihe netimba
yovamati noyoukadona vavo,
ava ve va fiyawilila oikalunga yaKaanan,
nedu ola nyatekelwe komatimba.
39Osho ve linyateka noilonga yavo
nova kala moukwaipala.
40Opo ehandu laKalunga ola xwama
kombada yoshiwana shaye,
nokwa nyonyodola ovafyuululifwa vaye.
41Okwe va yandja momake ovapaani,
novatondadi vavo ove va pangela.
42Ovatondi vavo ove va inda unene moshipala,
fiyo ve va findila momhango yavo.
43Luhapu okwe va mangulula,
ndelenee vo va anyena melundakano lavo,
va ninginifwa mo kowii wavo.
44Ndelenee Ye okwe va yavelela moudjuu wavo,
alushe ngeenge a uda ekemo lavo,
45nokwe va dilakanena ehangano laye navo,
nokwe va kenukila pauwanghenda waye munene,
46nokwe va filifa onghenda kwaaveshe,
ava ve va kwata oupika.
47Omwene, Kalunga ketu, tu kwafa,
tu kongolola mo moiwana,
opo fye tu hambelele edina loye liyapuki,
noku li tanga molwefimano loye.
48Omwene, Kalunga kaIsrael na hambelelwe
alushe fiyo alushe!
Noiwana aishe nai tye: “Amen!”
Halleluya!
EMBO ETITANO
(Omapsalome 107—150)
Currently Selected:
OMAPSALOME 106: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
