NUMERI 4
4
Oilonga yOvalevi
1NOmwene okwa popya naMoses naAron ndee ta ti: 2“Vala omuvalu aushe wovana ovamati vaKohat womovana vaLevi pamapata avo nopamaumbo avo, 3ava va wanifa omido omilongo nhatu naava va koya po fiyo okomudo omutimilongo nhano, aveshe ava va pewa oiwanifwalonga, ve i wanife metwali leongalo.
4“Oshiyakulwalonga shovana ovamati vaKohat metwali leongalo osheshi: okukala noshisho shoinima iyapukielela. 5Onhanda ngeenge tai hanaunwa po, mokufikama opo nee Aron novana vaye ovamati ve nokuuya ndee tava kulula oshitukulifoyata ndee tava tuvike nasho oshikefa shoundobwedi; 6ndele vo nava tule kombada yasho oshikututuviko shoipa yonguluve noshiyata sha tungwa ashishe neengodi domavala sha yalwa kombada yasho, ndele ve nokuxwekela mo omitengi dokuhumbata. 7Vo ve nokuuvika oshitaafula shomingome detaliko noshiyata shomavala, nokombada yasho ve nokutula ko oiyaxa noikwatelwa nomaholo neekana doikunwayambo. Nomingome odo di nokukala ko efimbo keshe, nadi kale ko yo. 8Opo nee tava yale kombada oshiyata shapurpuri noku shi uvika noshituvikoyata shoipa yonguluve ndee tava xwekele mo omitengi dokuhumbata. 9Opo nee nava kufe oshiyata shomavala ndee tava tuvike oshikwatelwalamba pamwe neelamba dasho neengodo dasho noukopi neekana adishe domaholo asho noilongifwa aishe. 10Ndele vo ve noku shi tonyena pamwe noilongifo yasho aishe moshiyatatuviko shoipa yonguluve noku shi tula kolutala. 11Ndele ve nokuyala oshiyata shomavala kombada yoaltari yoshingoldo noku i tuvika noshiyatatuviko shoipa yonguluve nokuxwekela mo omitengi dokuhumbata. 12Vo ve nokukufa yo oilongifo aishe hava longo nayo metwali liyapuki ndee tave i tula moshiyata shomavala noku i tonyena mo moshiyatatuviko shoipa yonguluve nokuxwekela mo omitengi dokuhumbata. 13Vo nava yuke ko omute moaltari nokutula ko oshiyata shopurpuri. 14Ndele vo ve nokutula ko oilongifo aishe hava longo nayo nokutya: oikwatelwa yomakala, neenyala dombelela, nouxupulo nomaholo, noinima aishe yoaltari. Ndele vo ve nokuyala oshiyatatuviko shoipa yonguluve kombada yayo nokuxwekela mo omitengi dokuhumbata. 15Aron novana vaye ovamati ngeenge va mane okutuvika etwali liyapuki noinima aishe yetwali, opo nee ovana ovamati vaKohat nave uye va ka humbate. Ndele vo vaha kume oinima iyapuki, opo vaha fye. Oinima oyo tuu oyo yetwali leongalo ovana ovamati vaKohat ve nokuhumbata. 16Ndele Eliaser, omona womupristeli Aron na kale noshisho shomahooli oshikwatelwalamba noitwiminifo yedimba liwa neendjayambo defiku keshe nomaadi okuvaeka. Ye e nokukala noshisho shetwali alishe liyapuki naaishe i li mo: etwali liyapuki noinima aishe yalo.”
17Ndele Omwene okwa popya naMoses naAron ndee ta ti: 18“Taleni, epata laKohat liha dimwe po kongudu yomapata Ovalevi. 19Va ningileni hano ngaha, opo va shiive okukala nomwenyo mokweehena kwavo koinima iyapukielela. Aron novana vaye ovamati nava ye oku va tula, keshe umwe, moshilonga shaye nokuhumbata oshihumbatwa shaye. 20Ndelenee vo vaha ye mo okutala oinima iyapuki nande papakumo leisho, vaha fye.”
21Ndele Omwene okwa popya naMoses ndee ta ti: 22“Vala omuvalu aushe wovana ovamati vaGerson pamaumbo avo nopamapata avo. 23U noku va vala okudja kwaava va wanifa omido omilongo nhatu naava va koya po fiyo okomido omilongo nhano, aveshe ava ve nokulonga vo va yakule moilonga yetwali leongalo.
24“Oiwanifwalonga yomapata Ovagerson mokuyakula nomokuhumbata oyei: 25Vo ve nokuhumbata eefailayata detwali, netwali leongalo noshikututuviko shalo shoipa yeedi noshikututuviko shoipa yonguluve, eshi shi li kombada yalo kombada yaaishe noshiidilifoyata shetwali leongalo, 26noiyata ya kambakanifwa kehale lokomesho noshiidilifoyata shoshivelo shehale lokomesho eli tali dingilile etwali liyapuki noaltari, neengodi dasho noilongifo aishe tai longifwa moilonga yomulo. Vo nava longe oilonga aishe i nokulongwa mulo. 27Eyakulwalonga alishe lovana ovamati Ovagerson nokutya, aishe ei ve nokuhumbata, noilonga yavo aishe oi nokuwanifwa palombwelo laAron novana vaye ovamati. Ndele ava nave va shiivifile aishe ei ve noku i humbata nokukala noshisho shayo. 28Oshiwanifwalonga shopetwali leongalo shovana ovamati vaGerson osheshi hano. Naashi ve noku shi kalela noshisho ve noku shi diinina nokupashukilwa kwaItamar, omona omumati womupristeli Aron.”
29Ovana ovamati vaMerari u noku va vala pamapata avo nopamaumbo avo. 30U noku va vala okudja kwaava va wanifa omido omilongo nhatu naava va koya po, fiyo okomido omilongo nhano. Aveshe ava ve nokulonga vo va yakule moilonga yetwali leongalo.
31Oinima ei ve noku i kalela noshisho mokuhumbata kwavo meyakulwalonga lavo petwali leongalo oyei: oipilangi yetwali liyapuki neenhikifo dayo neengudi dalo noikwatelwamhadi yado 32neengudi dehale lokomesho keembinga adishe noikwatelwamhadi yado neendungu dado neengodi dado, heeno, oilongifo aishe naashishe eshi tashi pumbiwa mokuyakulwa mulo. Noilongifo ei tai yandjwa kuvo ve i humbate, i nokutumbulwa kunye. 33Eshi hano eyakulwalonga lomapata ovana ovamati vaMerari, oilonga yavo aishe mokuyakula petwali leongalo paulikilo laItamar, omona omumati womupristeli Aron.
Okuvalwa kwOvalevi
34Ndele Moses naAron novakulunhu veongalo ova vala ovana ovamati vaKohat pamapata avo nopamaumbo avo, 35okudja kwaava va wanifa omido omilongo nhatu naava va koya po fiyo okomido omilongo nhano, aveshe ava ve nokulonga vo va yakule moilonga yetwali leongalo. 36Ndele ava va valwa pamapata avo ova li ve fike pomayovi avali nomafele aheyali nomilongo nhano. 37Oo hano omuvalu waava va valwa vomomapata Ovakohati, aveshe ava va yakula petwali leongalo, ava va valwa kuMoses naAron palombwelo lOmwene ye e li lombwela Moses.
38Ndele ovana ovamati vaGerson ava va valwa pamapata avo nopamaumbo avo, 39ava va wanifa omido omilongo nhatu naava va koya po fiyo okomido omilongo nhano, aveshe ava va li ve nokulonga vo va yakule moilonga petwali leongalo. 40Omuvalo waava va valwa pamapata avo nopamaumbo avo wa li u fike pomayovi avali nomafele ahamano nomilongo nhatu. 41Ovo hano va valwa vomomapata ovana ovamati vaGerson aveshe ava va yakula moilonga petwali leongalo ava va valwa kuMoses naAron palombwelo lOmwene ye e li lombwela Moses.
42Ndele ovana ovamati vaMerari ava va valwa pamapata avo nopamaumbo avo, 43ava va wanifa omido omilongo nhatu naava va koya po fiyo okomido omilongo nhano, aveshe ava va li ve nokuyakula moilonga petwali leongalo, 44omuvalu waava va valwa pamapata avo ou fike pomayovi atatu nomafele avali. 45Oo hano omuvalu waava va valwa vomomapata ovana ovamati vaMerari, ava va valwa kuMoses nokuAron palombwelo lOmwene, Moses e li lombwelwa.
46Ovalevi aveshe ava va valwa kuMoses naAron novakulunhu Ovaisraeli pamapata avo nopamaumbo avo, 47ava va wanifa omido omilongo nhatu ile va koya po fiyo okomido omilongo nhano, aveshe ava va li ve nokuyakula moilonga petwali leongalo ile mokuhumbata, 48omuvalu wavo wa li u fike pomayovi ahetatu nomafele atano nomilongo ahetatu. 49Palombwelo Moses e li lombwelwa kOmwene, keshe umwe wavo a ulikilwa eyakulwalonga laye noshilonga shaye mokuhumbata. Okuvala oko Moses e ku wanifa ngaashi Omwene e mu lombwela.
Oshikwanyama Bible Revised © Bible Society of Namibia, 2008, 2012.