NEHEMIA 9
9
Elidilululo lovanhu
1Ndele mefiku etimilongo mbali netine lohani ei ovana vaIsrael va ongala ndele ve lidilika va djala oikutu yeefya ndele ve liunda edu komitwe davo. 2Noludalo laIsrael le likufa mo movanailongo aveshe li likalele, ndele va kala ofika tava hepaulula omatimba avo noulunde wooxe. 3Ndele va kala ofika peenhele davo ndele va leshelwa membo lomhango yOmwene Kalunga kavo mokafimbo okatine komefiku, ndele va hepaulula omatimba nokwiilikana Omwene Kalunga kavo mokafimbo okatine komefiku. 4Ndele mOvalevi Josua naBani, Kadmiel, Sebanja, Bunni, Serebja, Bani, Kenani va londa keenhele dOvalevi opo pa tumba ndele va indila nondaka yopombada Omwene Kalunga kavo. 5NOvalevi Josua naKadmiel, Bani, Hasabneja, Serebja, Hodia, Sebanja, Petahja tava ti: “Kaleni ofika! Hambeleleni Omwene Kalunga keni alushe fiyo omoukwaalushe! Edina loye la fimana nali hambelelwe, lo ola yeluka kombada omapandulo nomahambelelo aeshe!”
6Esra okwa ti: “Oove auke Omwene, Ove wa ninga eulu, eulu lopombadelela neengudi dalo adishe, nedu naaishe i li ko, nefuta naaishe i li mo, naaishe oyo Ove to i diinine i kale nomwenyo, nomatanga omeulu tae linyongamene koshipala shoye. 7Oove Omwene Kalunga, wa hoolola Abram ndele we mu kufa mo muUr shomuKaldea ndele we mu lukulula Abraham. 8Ndele wa mona omutima waye wa li omudiinini koshipala shoye, ndele wa ninga naye ehangano, nokutya u pe oludalo laye edu lOvakaanan nOvaheti nOvaamori nOvaperesi nOvajebusi nOvagirgasi; ndele wa wanifa eendjovo doye, osheshi Ove omuyuki.
9“Ndele wa mona oluhepo lootate muEgipiti nowa uda onghuwo yavo pEfuta Litilyana. 10Ndele Farao novapiya vaye aveshe novanhu aveshe vomoshilongo shaye we va ningila omadidiliko noikumwifalonga. Osheshi wa li u shi shii, nokutya vo ove va hepeka mokulinenepeka, Ove we liningila edina ngaashi li li nena eli. 11Owa tukula efuta komesho yavo, onghee va tauluka efuta va enda poukukutu. Ndelenee ovataatai vavo we va ekela moule mwi, ngaashi emanya momeva manene. 12Ndele we va kwatela komesho omutenya moluudi loshilemo ndele oufiku moluudi lomundilo u va minikilile ondjila nayo va li ve nokweenda. 13Ove wa londoloka komhunda yaSinai ndele we va popifa, owe va pa omalombwelo a yuka neemhango di shii kulineekelwa, eenghedimhango diwa noipango. 14Owe va shiivifila Eshabata loye liyapuki ndele we va pefifa omupiya woye Moses, oipango neenghedimhango. 15Mondjala yavo Ove we va pa omungome tau di keulu, ndele menota lavo we va kungulukifila omeva taa di memanya, nowe va lombwela va ye va ka nangale oshilongo osho we shi va udanekela neano u shi va pe. 16Ndelenee venya, nokutya ootate, va li va shishimana nova kukutika eefingo davo ndele inava dulika koipango yoye, 17heeno, va anya okudulika noinava dimbulukwa oikumwifalonga yoye, oyo we i va longela mokati kavo. Ndelenee va kukutika eefingo davo ndele moku ku twila ondubo ve lihoololela omukulunhu va shune moupika muEgipiti. Ndelenee Ove Kalunga ho dimi po omatimba, u nonghenda nolune, u nonheni ndele Oove omunene mouwanghenda: Ove wa li ino va ekelashi. 18Nande ve li ningila onhana ya telekwa monhelekelo ndele tava ti: ‘Kalunga koye oyoo, e ku pitifa mo muEgipiti!’ Nande va ninga oinima inene yoixuna yokusheka Kalunga, 19Ove omolwefilonghenda loye linene ino va efa mombuwa. Oluudi loshilemo inali kanduka po puvo omutenya, le va endifa nondjila, noluudi lomundilo yo oufiku le va minikilila ondjila vo va li ve nokweenda nayo. 20Ndele we va pa Omhepo yoye iwa, i va longe, omakanya avo ino a anyena omanna, ndele we va pa omeva menota lavo. 21Nomido omilongo nhee we va kalela noshisho mombuwa. Vo inava hepa sha. Noikutu yavo inai kulupa neemhadi davo inadi dinda.
22“Ndele mepangelo lavo wa yandja oilongo noiwana Ove we i taulila eengaba. Ovo ova nangala oshilongo shaSihon, heeno, oshilongo shohamba yaHesbon, noshilongo shaOg, ohamba yaBasan. 23Novana vavo we va hapupalifa ve fike peenyofi dokeulu. Ndele we va twala mo moshilongo, osho we shi lombwela ooxe nokutya, vo va ye mo ve ke shi nangale. 24Novana va ya mo ndele va nangala oshilongo noonakukalamo moshilongo, Ovakaanan, we va taataa komesho yavo, ndele we va yandja meke lavo, neehamba davo ngaashi yo ovanhu voilongo, ve va ningile ngaashi va hala. 25Ndele va nangala oilando i neehotekuma nedu liwa, nova tinha eengulu di yadi oinima iwa i lili nai lili, eendungu da pandwa memanya, oikokola yomiviinyu nomiti domalumono nomiti dihapu doiimati. Ova lya ndele va kuta ndele va ondoka nova kala ve noshishipo omolwouwa woye munene. 26Ndele inava dulika vo ve ku twila ondubo nova ekela omhango yoye kombuda yavo. Novaxunganeki voye ovo ve va londwela, ve va alulile kwoove, ve va dipaa ndele va ninga oinima inene yoixuna yokusheka Kalunga. 27Onghee hano Ove we va yandja momake ovatondadi vavo, ndele ovo ve va fininika. Ndelenee alushe ngeenge va kuwa kwoove mefimbo loudjuu wavo, Ove we va uda meulu omolwefilonghenda loye linene, we va pa ovaxupifi, ve va xupife momake ovatondadi vavo. 28Ndelenee shamha va mono etulumuko, va ninga vali owii koshipala shoye, ndele Ove we va yandja momake ovatondadi vavo, vo ve va pangele. Vo eshi ve ku ifana vali, Ove we va uda meulu, ndele omolwefilonghenda loye we va xupifa luhapu. 29Ndele Ove we va londwela va aluke komhango yoye, ndelenee ve linenepeka ndele inava pwilikina oipango yoye, ndele va nyona keenghedimhango doye, nande: omunhu ou te di diinine, ota ka kala e nomwenyo molwado. Ndelenee vo ove ku pilamena, ve ku pa ombuda ndele va kukutika eefingo davo ndele inava pwilikina. 30Nomido dihapu wa li u nolukeno navo ndele we va londola nOmhepo yoye nomakanya ovaxunganeki. Ndelenee vo va li inava hala okuuda. Onghee hano we va yandja momake oiwana yoilongo. 31Ndelenee omolwefilonghenda loye linene Ove ino va mana po sheke ndele ino va efa, osheshi Oove Kalunga u nefilonghenda nonghenda.
32“Hano paife Kalunga ketu, munene, omunamapangelo, Kalunga onakutilika, ou ho diinine ehangano loye nouwanghenda woye: oupyakadi oo aushe, uhe u tale oo unini, we tu hanga ko neehamba detu novakulunhu vetu novapristeli vetu novaxunganeki vetu, ootate novanhu voye aveshe, okudja komafimbo eehamba daAsiria fiyo okefiku eli. 33Ndelenee Ove omuyuki mwaashishe she tu hanga, osheshi Ove wa li omudiininini moilonga yoye, ndelenee fye twa li ovahenakalunga. 34Neehamba detu novakulunhu vetu novapristeli vetu nootate vetu inava wanifa omhango yoye ndele inava dulika koipango yoye nokeendobwedi doye we tu londola nado. 35Ndele nande va kala moshilongo shavo vene nomouyadi weeshali doye, odo we di va pele, ndele va kala medu la tandavela noli nouwa, vo inava aluluka moilonga yavo ii. 36Paife fye ovapika. Moshilongo tuu osho we shi pele ootate vetu, vo va lye oiimati noipewa yasho, moshilongo tuu osho tu nokukala fye ovapika. 37Oshishipo shasho tashi pewa eehamba odo we di tula po di tu pangele omolwomatimba etu, ndele do otadi pangele omalutu etu noimuna yetu pahalo lavo, ndele fye otu li moudjuu munene.”
Ovanhu tava ningi ehangano naKalunga
38Ndelenee molwoinima aishe ei ohatu ningi ehangano la pama ndele hatu li pameke mokushanga omadina etu. Momushangwa wa hakwa ovakulunhu vetu nOvalevi vetu novapristeli vetu va shanga.
Currently Selected:
NEHEMIA 9: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
