MATEUS 4
4
Jesus ta hongaulwa
(Mark. 1:12-13; Luk. 4:1-13)
1Ndelenee Jesus okwa twalwa kOmhepo mombuwa a ka hongaulwe kuSatana. 2Ndele eshi a ninga ko omitenya omilongo nhee nomaufiku omilongo nhee ina lya sha, okwa hangika kondjala. 3Ndele omuhongauli okwe uya kuye ndele ta ti kuye: “Oove ngeenge Omona waKalunga, lombwela hano omamanya aa a shituke omingome.” 4Ndelenee Ye okwa nyamukula ndele ta ti: “Okwa shangwa: ‘Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.’ ”
5Opo nee Satana e mu twala koshilando shiyapuki ndele te mu londeke koxulo yotembeli 6ndele ta ti kuye: “Oove ngeenge Omona waKalunga, nhukila poshi, osheshi okwa shangwa: ‘Oye ote ku lombwelele ovaengeli vaye, ndele otave ku humbata momaoko avo, uhe lipume omhadi yoye kemanya.’ ” 7Jesus okwa tya kuye: “Okwa shangwa yo: ‘Ino shinda Omwene Kalunga koye.’ ”
8Satana okwe mu kufa ko vali a ya naye komhunda ile unene, ndele te mu ulikile omauhamba aeshe omounyuni nefimano lao, 9ndele ta ti kuye: “Aishe ei ohandi i ku pe, ngeenge to twile nge eengolo ndele to linyongamene nge.” 10Jesus okwa tya kuye: “Dja po, Satana, osheshi opa shangwa: ‘Omwene Kalunga koye u noku mu twila eengolo, noye aeke u noku mu kalela.’ ”
11Satana okwe mu efa, ndele tala, ovaengeli ve uya kuye, ve mu yakula.
Jesus ta hovele okuudifa
(Mark. 1:14-15; Luk. 4:14-15)
12Ndele Jesus eshi a uda Johannes a tulwa modolongo, okwa shuna kuGalilea. 13Ndele Ye okwa tembuka muNasaret ndele ta ka tula muKapernaum shi li pefuta, omomikunda daSebulon nodaNaftali; 14opo di wanifwe odo da tongwa komuxunganeki Jesaja, ta ti:
15“Edu laSebulon nedu laNaftali lopefuta,
langhele kwinya yaJordan, Galilea yovapaani!
16Ndele oshiwana osho sha li omutumba momilaulu,
osha mona ouyelele uhapu,
naavenya va li va kala omutumba moshilongo nomomudidimbe wefyo,
ouyelele we va yelela.”
17Ndele okefiku olo Jesus okwa hovela okuudifa nokutya: “Lidilululeni, osheshi ouhamba weulu owa ehena popepi.”
Jesus ta ifana ovalongwa
(Mark. 1:16-20; Luk. 5:1-11)
18Ndele eshi kwa li ta kunghula nefuta laGalilea, okwa mona ko omunhu namumwaina, Simon, ha ifanwa Petrus, nondenge yaye Andreas, va li tava ekele oshiyulifo mefuta; osheshi vo va li ovayuli veeshi. 19Ndele ta ti kuvo: “Shikuleni nge, Ame ohandi ke mu ninga ovayuli vovanhu.” 20Ndele vo ova fiya po diva oiyulifo yavo ndele tave mu shikula.
21Ndele mokweehena komesho, okwa mona ko ovamwainafana vavali, Jakob yaSebedeus, nondenge yaye Johannes, mowato pamwe naxe Sebedeus, tava vandeke oiyulifo yavo. Ndele Ye okwe va ifana. 22Opo vo ova fiya po diva owato naxe, ndele tave mu shikula.
Jesus ta velula ovanaudu
(Luk. 6:17-19)
23Ndele Ye okwa endaenda muGalilea ashishe, ndele ta longo meeshinagoga davo, ndele ta udifa evaengeli lOuhamba, ndele ta velula oudu keshe noungone aushe movanhu. 24Ndele etumbalo laye la udika muSiria ashishe, ndele ovo va eta kuye aveshe va li ve noudu u lili nau lili, nouyehame, naava ve neendemoni, novanashinhona, oonakuvela ombada, nokwe va velula aveshe. 25Ndele ovanhu vahapu unene ovo vomuGalilea novomuDekapolis, novomuJerusalem novomuJudea novokoilongo yalanghele kwinya yaJordan, ove mu shikula.
Currently Selected:
MATEUS 4: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.