MATEUS 20

Ovalongi vepya lomiviinyu

1“Osheshi ouhamba wokeulu wa fa omushamane, a meneka a ka shivile epya laye lomiviinyu ovalongi. 2Ndele eshi va udafana novalongi odenari imwe efiku limwe, okwe va tuma kepya laye lomiviinyu. 3Ndele ye okwa pita mo pokafimbo okatitatu, nokwa hanga ko vamwe ve li ofika ashike pomalandelo; 4nokwa tya kuvo: ‘Nanye yo indeni kepya lange lomiviinyu, ndele handi mu pe osho, she mu yeleka.’ 5Ndele vo ova ya ko. Oye okwa pita mo vali potundi onhihamano nopotundi onhimugoi ndele ta ningi ngaashi a ningile. 6Ndele eshi a pita mo potundi onhimulongo naimwe, okwa hanga po vali vamwe ve li ofika, ndele ta ti kuvo: ‘Oshike tamu kala ofika apa omutenya aushe?’ 7Ovo tava ti kuye: ‘Osheshi kaku na ou e tu shiva.’ Oye ta ti kuvo: ‘Nanye yo indeni kepya lange lomiviinyu, ndele tamu mono eshi sha yuka.’

8“Ndele onguloshi eshi ye uya, mwene wepya lomiviinyu okwa lombwela elenga laye: ‘Ifana ovalongi ove u va fute ondjabi yavo, hovela kwaava vaxuuninwa fiyo okwaava votete.’ 9Ndele ava kwa li ve uya potundi onhimulongo naimwe eshi ve uya, ova pewa keshe tuu umwe odenari imwe. 10Hano venya votete eshi ve uya, ova li ve shii tava pewa shihapu ve dule venya; ndele keshe tuu womuvo a pewa odenari imwe. 11Ndele eshi ve i pewa, ova ngongotela omushamane 12ndele tava ti: ‘Ava vaxuuninwa ova longa otundi imwe aike, ndele ove we va yeleka nafye ava twa humbata oudjuu womutenya noupyu.’ 13Ndelenee ye okwa nyamukula umwe waava ndele ta ti: ‘Kaume, inandi ku kotokela; fye naave, hamba, inatu udafana odenari imwe? 14Kufa po ei yoye, ove u ye. Ndele ame onda hala okupa ou omuxuuninwa i fike pwaai yoye. 15Hamba nda kelelwa okulongifa oinima yange ngaashi ame mwene nda hala. Ile ou na efupa shaashi ame ndi na onghenda?’ 16Hano osho, ovaxuuninwa otava ningi votete, novotete ovaxuuninwa, osheshi ovaifanwa ovahapu, ndele ovahoololwa ovanini.”

Jesus ta hololulula okuhepekwa kwaye

(Mark. 10:23-34; Luk. 18:31-34)

17Ndele Jesus eshi a ka londa a ya kuJerusalem, okwa kufa ovalongwa omulongo navavali va kale ve likalela, nomondjila okwa tya kuvo: 18“Tala, fye ohatu yeni kuJerusalem, nOmona wOmunhu ota yandjwa momake ovapristeli ovakulunhu novanongo vomishangwa, ndele vo otave mu pe etimba lokufya 19ndele tave mu yandje kovapaani okushekwa nokudengwa nokuvalelwa, ndelenee mefiku etitatu ota nyumuka.”

Jesus ta pukulula ovalongwa vaye

(Mark. 10:35-45)

20Opo nee ina yovana vaSebedeus okwe uya kuye novana, ndele te mu twile eengolo a hala oku mu indila sha. 21Ndele ye okwa tya komwalikadi: “Owa hala shike?” Ou ta ti kuye: “Itavela ovana vange ava vavali va ka kale omutumba, umwe kolulyo loye nomukwao okolumosho loye, mOuhamba woye.” 22Ndelenee Jesus okwe mu nyamukula ndele ta ti: “Onye kamu shi shii eshi mwa hala. Otamu dulu tuu okunwa eholo olo handi ke li nwa?” Ovo va tya kuye: “Ohatu shi dulu.” 23Ndele Ye okwa tya kuvo: “Eholo lange otamu ke li nwa, ndele okukala omutumba kolulyo lange nokolumosho lange haame handi ku pangele, ndele otaku pewa ovo, ve ku longelwa kuTate.”

24Ndele venya omulongo eshi ve di uda, ova umanena ovamwaina ava vavali. 25Ndelenee Jesus okwe va ifana kuye ndele ta ti: “Onye omu shi shii, ovapangeli voiwana ohave i pangele, novanaenghono ohava longifa eenghono davo kuyo. 26Ndelenee hasho nashi kale mokati keni, ndelenee ou womunye a hala a ninge munene mokati keni, ye na kale omuyakuli weni, 27naau womokati keni a hala a kale wokomesho, ye na kale omupiya waaveshe; 28ongaashi nOmona wOmunhu ine uya okuyakulwa, ndele okuyakula nokuyandja omwenyo waye u ninge oikulila yavahapu.”

Ovapofi vavali

(Mark. 10:46-52; Luk. 18:35-43)

29Ndele eshi va dja mo muJeriko ongudu inene ye mu shikula. 30Ndele tala, ovapofi vavali va kala omutumba momunghulo wondjila; naashi va uda Jesus ta ende po, ova popya mokule ndele tava ti: “Omwene, Omona waDavid, tu fila onghenda!” 31Ndele ovanhu ove va hanyena va mwene, ndele vo ova diinina okwiingida mokule, tava ti: “Omwene, omona waDavid, tu fila onghenda!” 32Opo Jesus okwa kanghama, e va ifana kuye, ndele ta ti: “Omwa hala ndi mu ningile shike?” 33Ovo va tya kuye: “Omwene, omesho etu a pashulwe.” 34Ndele Jesus okwe va udila olukeno, okwa kuma omesho avo, nopo tuu opo va pashuka ndele tave mu shikula.

Currently Selected:

MATEUS 20: OKYB

Highlight

Copy