MATEUS 17

Okuvemifwa kwaJesus

(Mark. 9:2-13; Luk. 9:28-36)

1Ndele eshi pita omafiku ahamano, Jesus okwa kufa Petrus naJakob nondenge yaye Johannes, ndele okwe va twala komhunda ile unene, ve ke likalele. 2Ndele okwa shituka moipafi yavo, noshipala shaye sha vema ngaashi etango, noikutu yaye oya yela ya fouyelele. 3Ndele tala, Moses naElia ve va holokela, va kundafana naye. 4Ndele Petrus okwa hovela okupopya ndele ta ti kuJesus: Omwene, apa opawa nokukala; ngeenge wa hala, ohandi ka dika apa omatwali atatu, limwe oloye, limwe olaMoses nalimwe olaElia. 5Hano fimbo a li ta popi, tala, oshilemo shiyela oshe va tuvikila; ndele tala, ondaka ya dja moshilemo, ndele tai ti: “Ou Omona wange omuholike, onde mu hokwa; mu udeni.” 6Ndele ovalongwa eshi ve shi uda, ova wilika oipala yavo poshi ndele ova tila unene. 7Ndele Jesus okwe uya, e va kuma ndele ta ti: “Pendukeni, inamu tila.” 8Eshi va petula omesho avo, inava mona vali nande omunhu, Jesus Oye aeke.

Okuuya kwaElia

(Mark. 9:9-13)

9Ndele eshi va li tava londoloka komhunda, Jesus okwe va anda ko: “Emoniko eli inamu li hepaululila nande omunhu, Omona wOmunhu fimbo ina nyumuka koufi.” 10Ndele ovalongwa vaye ove mu pula tava ti: “Ovanongo vomishangwa otava ti ngahelipi hano, Elia e nokuuya tete?” 11Ndele Ye okwa nyamukula ndele ta ti: “Heeno, Elia ote uya nota ka wapaleka vali aishe. 12Ndelenee ohandi mu lombwele, Elia okwa ile mo, ndele vo inave mu koneka, nove mu ningila eshi va hala. Osho tuu Omona wOmunhu ota ka hepekwa kuvo.” 13Opo nee ovalongwa va uda ko nee, nokutya, ote va lombwele Johannes Omushashi.

Jesus ta velula omunashinhona

(Mark. 9:14-29; Luk. 9:37-43a)

14Ndele eshi va fika kongudu yovanhu, omulumenhu umwe okwe uya kuye, a twa eengolo koshipala shaye 15ndele ta ti: “Omwene, fila onghenda, omumwange omumati e noshinhona ndele ta hepekwa unene, osheshi luhapu ota wile momundilo nomomeva. 16Ndele ame onde mu eta kovalongwa voye, ndele vo va nyengwa oku mu velula.” 17Jesus okwa nyamukula ndele ta ti: “Woo, ove epupi lihe neitavelo nola pilalala, ofiyo onaini ndi nokukala punye? Ndele ofiyo onaini ndi noku mu lididimikila? Mu eteni kwaame.” 18Jesus okwe mu hanyena, opo ondemoni ya dja mo muye, nomumati okwa veluka efimbo tuu olo.

19Eshi ve likalela, ovalongwa ve uya kuJesus tava ti: “Oshike hano twa nyengwa oku i ta mo?” 20Ndele Ye ta ti kuvo: “Omolweitavelo leni linini, osheshi oshili handi mu lombwele, ngeno okwa li mu neitavelo li fike pombuto yoshinapi, ngeno otamu dulu okulombwela omhunda ei: ‘Lilundulula po apa, ove u lundulukile kwinya, ngeno tai lilundulula po, ndele kaku noshinima tashi mu nyenge.’ 21Ndelenee oludi eli ihali tewa mo koshinima shimwe, okeilikano nokelidiliko alike.”

Jesus ta popi vali okuhepekwa kwaye

(Mark. 9:30-32; Luk. 9:43b-45)

22Ndele eshi va li tava endaenda pamwe muGalilea, Jesus ta ti kuvo: “Omona wOmunhu ota ka yandjwa momake ovanhu, 23ndele vo otave mu dipaa, ndele efiku etitatu ota nyumuka. Ndele vo va nyika unene oluhodi.”

Oimaliwa yotembeli

24Ndele eshi va fika kuKapernaum, ovashivi veesekeli dotembeli ove uya kuPetrus tava ti: “Omuhongi weni iha futu oimaliwa yotembeli?” 25Oye ta ti: “Oha futu.” Ndele ye eshi a ya meumbo, Jesus okwa tetekela oku mu pula ta ti: “Oto ti ngahelipi, Simon? Eehamba dokombada yedu otadi pula kulyelye ofuto yokeengaba noifuta? Okovana ile okovanailongo?” 26Ndele ye eshi a tya: “Okovanailongo”, Jesus ta ti kuye: “Hano ovana ihava futu sha. 27Ndelenee opo tuhe va handukife, inda hano komunghulo wefuta ove u ekele mo ondjolo. Kufa oshi ei to yulu tete, ndele ngeenge wa makula okanya kayo, oto mono mo osekeli yoshisiliveli. Shi kufa mo u shi va pe omolwetu naave.”

Currently Selected:

MATEUS 17: OKYB

Highlight

Copy