JOSUA 2
2
Eendadi mbali tadi tumwa di ka lave Kaanan naJeriko
1Opo nee Josua yaNun okwa lekela muSittim ovalumenhu vavali ngaashi eendadi meholeko ndele ta ti: Indeni mu ka lave oshilongo naJeriko. Vo ova ya ndele ve uya mo mongulu imwe yombwada edina layo Rahab, ndele omo va nangala. 2Ohamba yaJeriko eshi ya lombwelwa: Tala, ovalumenhu va dja movana vaIsrael ove uya mo oufiku, va lave oshilongo, 3ohamba yaJeriko oya tuma ko kuRahab ve mu lombwele: “Ovalumenhu venya ve uya kwoove mongulu yoye, va yandja. Osheshi ve uya va lave oshilongo.” 4Ndelenee omukainhu okwa kufa ovalumenhu ovo vavali nokwe va holeka. Ndele ye okwa tya: “Oshili, ovalumenhu ve uya kwaame, ndelenee inandi shiiva apa va dja. 5Ndele oshivelo shoshilando eshi shi nokwiidilwa po onguloshi, ovalumenhu ova dja mo. Ame nghi shii ovalumenhu apa va yuka. Va shikuleni diva, osheshi tamu ke va hanga.” 6Ndelenee ye okwe va londeka kombada yongulu nokwe va holeka koshi yomwiidi ou wa ongelwa konduda yaye. 7Ovalumenhu ve va shikula nondjila yokuJordan fiyo okoshau. Ndele va idila po oshivelo, ovashikuli vavo eshi va dja mo. 8Ndele vo fimbo inava ka nangala, ye okwa londa kombada yongulu 9ndele ta ti kovalumenhu: “Ame ondi shi shii, Omwene okwa yandja kunye edu eli, ndele tu kwetiwe komahaluhalu omolweni, noonakukala moshilongo otave mu kakama; 10osheshi fye twa uda nhumbi Omwene e mu pwiininifila omeva omEfuta Litilyana komesho yeni fimbo mwa dja mo muEgipiti, naashi mwe shi ningila eehamba mbali dOvaamori, Sihon naOg, kombada yaJordan, nye eshi mwe di hanauna po. 11Fye eshi twe shi uda, omutima wetu wa limbililwa, opo nee kape na vali nande umwe e nonyati oku mu lwifa. Osheshi Omwene Kalunga keni, Oye Kalunga komeulu pombada noposhi kombada yedu. 12Anenei nge hano paife kOmwene, ame eshi nde mu ningila ouwa, nanye yo tamu ka ningila eumbo lange ouwa. Pei nge edidiliko li shii okulineekelwa, 13nokutya nye otamu ka xupifa omwenyo watate nowameme nowovamwameme ovamati nowovamwameme oukadona naashishe shavo nokuxupifa eemwenyo detu mokufya.” 14Opo nee ovalumenhu tava ti kuye: “Omwenyo wetu nau fye ponhele yeni, nye ngeenge itamu shiivifa oshinima eshi shetu, Omwene ngeenge te tu pe edu eli, opo nee fye ohatu mu ningile ouwa noudiinini.” 15Opo nee okwe va kulukifila nongodi mekende. Osheshi ongulu yaye oya tungilwa mohotekuma yoshilando, osho ngaha ye a kala mohote. 16Ndele ye okwe va lombwela: “Indeni keemhunda, ovashikuli veni vehe mu hange, ndele kaleni mwa hondama omafiku atatu fiyo ovashikuli veni va aluka. Opo nee tamu dulu okuya.” 17Opo nee ovalumenhu ve mu lombwela: “Eano, we li tu anifa, otali xulile apa, 18fye ngeenge hatu uya moshilongo, ove u nokumangela pekende ongodi ei itilyana, we i tu kulukififa, ndele ove u nokwoongela pwoove mongulu yoye xo nanyoko, ovamwaxo novamwanyoko neumbo loye alishe. 19Keshe umwe ou ta piti mo moshivelo shongulu yoye, ohonde yaye nai kale kombada yaye, ndele fye katu netimba, ndelenee keshe umwe ou e li pwoove mongulu, ohonde yaye tai ka kala kombada yetu, ngeenge eke lomunhu tali mu kumu. 20Ndelenee ove ngeenge to holola oshinima eshi shetu, fye otwa mangululwa meano eli ove we tu anifa.” 21Ndele ye okwa tya: “Heeno, nashi kale ngaashi mwa popya!” Ndele ye e va lekela ndele va ya. Ndele ongodi itilyana okwe i mangela pekende. 22Ova ya hano, ndele va fika keemhunda, ndele oko va kala omafiku atatu fiyo ovashikuli vavo va aluka. Osheshi ovashikuli va li va ka konga mondjila aishe, ndelenee inava mona sha. 23Opo nee ovalumenhu venya vavali va londoloka keemhunda ndele va tauluka omulonga ndele ve uya kuJosua yaNun, ndele ve mu hepaululila ashishe ve shi mona. 24Vo ova lombwela vali Josua, tava ti: “Oshili, edu alishe Omwene okwe li tu pa momake etu. Osheshi oonakukalamo aveshe ohava kakama nokutila molwetu.”
Currently Selected:
JOSUA 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.