JOB ETWALEMO
ETWALEMO
Embo laJob olo ehokololo lomulumenhu muwa oo a hepekwa koiponga ihapu. Okwa kanifa ovana aveshe, ndee ta kanifa omaliko ndele ta yehamekwa komukifi u nyanyalifa. Momisholondodo dopatatu deenghundafana da nyika oshitevo, omunyoli ota ulike nghee ookaume kaJob naJob ye mwene tava nyamukula koixuna ei. Pexulilo, Kalunga ye mwene ou ha longo nounhu, okwe liholola kuJob ndee ta ningi oshitukulwa sha fimana sheenghundafana.
Ookaume kaJob ova kala tava fatulula omahepeko aye paudeko lopamufyuululwakalo wopaitavelo. Ova kala tava ti, molwaashi Kalunga oha nyakukilwa alushe ouwa noha handukile owii, omahepeko aJob otaa ti ashike kutya okwa nyona. Omatomheno aeshe oo kuJob okwa li a nafangwa unene, ke wete e lilongela ehandukilo, osheshi okwa kala omulumenhu muwa sha pumba nomuyuki. Job okwa li ta nyengwa oku shi uda ko, Kalunga ta efa owii u fike opo u ningilwe omunhu ngaye, ndele te litu omukumo a taalele Kalunga nomapulo. Job ina kanifa eitavelo laye, ashike okwa kala a djuulukwa a yukipalifwe koshipala shaKalunga noku alulilwe efimano laye ongomulumenhu muwa. Kalunga ina nyamukula komapulo aJob, ndele okwa nyamukula kombinga yeitavelo laye moku mu pwipwikila koshi yefano leenghono daye dopaukalunga nounongo. Nena Job okwe lixupipika ndee ta hepaulula kutya Kalunga Oye omunongo nomunene nokwe lidilulula keendjovo daye dopaukalunga nounongo. Exulifo loshinyolwa otali hokolola Job nghee a shunwa konghalo yaye yoshito oyo nokuli ya yambekwa i dule yotete. Kalunga okwa pukulula ookaume kaJob molwaashi va nyengwa okuuda ko omahepeko aJob eshi taa ti. Job oye aeke a kala e na eudeko kutya, Kalunga ngaashi e mu ulika, oye munene e dule omayeleko noudjuu aushe, ou wa hanga Job. Oinima yaye aishe oya nyonauka po, nokwa hangika komikifi didjuu. Ovanhu ova kala have uya kuye noku mu sheka a efe Kalunga kaye. Osho va kala tava ningi. Ndele Job okwa diinina eitavelo laye. Kalunga mwene okwa li ta popi naye.
Elandulafano loshikalimo
Etwalemo 1:1—2:13
Job nookaume kaye 3:1—31:40
a. Etanguno laJob 3:1-26
b. Eenghundafana dotete 4:1—14:22
c. Eenghundafana eenhivali 15:1—21:34
d. Eenghundafana eenhinhatu 22:1—27:23
e. Efimaneko lounongo 28:1-28
f. Ehokololo laxuuninwa laJob 29:1—31:40
Oipopiwa yaElihu 32:1—37:24
Omwene ta nyamukula Job 38:1—42:6
Exulifo 42:7-17
Currently Selected:
JOB ETWALEMO: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.