JOB 9
9
Job ta nyamukula
1Ndelenee Job okwa nyamukula ndele ta ti: 2“Oshili, ondi shi shii, oyo oyoshili. Omunhu ota dulu ngahelipi okumonika omuyuki koshipala shaKalunga. 3Omunhu ngeno a hala okutwa eemhata naye, ngeno ita dulu oku mu nyamukula nande ondjovo imwe yomeendjovo eyovi. 4Ye omunongo weendunge nomunaenghono weenghono. Olyelye ou e mu twila ondubo, ndelenee ina handukilwa ngeno? 5Oye ta dikulula eemhunda, vo inave shi shiiva. Mehandu laye te di hanauna po. 6Ye ota kakamifa edu, tali di po ponhele yalo neengudi dalo tadi dekweta. 7Oye ta lombwele etango, lo itali piti, ndele ta idile po eenyofi noshihako shaye. 8Ye aeke ta yale omaulu ndele ta lyataula omakufikufi efuta. 9Oye a ninga onyofi yaBeer nOkalimba nOmbwa nOshofi neenduda dokoumbuwanhu. 10Oye ta ningi oilonga inene tai nyenge okukonakonwa noikumwifa kai shi kuvalwa.
11“Tala, Ye ota ende po pwaame ndelenee kandi mu wete. Ye ta telaana ta koya nge po, ndelenee ame itandi mu dimbulukwa. 12Tala, Ye ota kufa oihakanwa, olyelye ta dulu oku mu kelela? Olyelye te mu pula: Ove to ningi shike? 13Kalunga ita mwena mehandu laye. Noonakupopila Rahab ve nokulixupipika koshi yaye. 14Ongahelipi hano ame handi dulu oku mu nyamukula, nokuhoolola eendjovo dange tu twe eemhata naye? 15Nande ndi kale ndimuyuki, handi nyengwa okunyamukula. Ame ndi nokwiindila omutokoli wange a file nge onghenda. 16Nande ndi mu ifane ndele Ye a nyamukule nge, inandi itavela Ye a tambula momatwi aye onghuwo yange. 17Osheshi Ye ota taataa nge po noshikungulu shaye, ndele ta hapupalifa oipute yange oshimha. 18Ye ita itavelele nge okufudifa nande omufudo, ndelenee ta yadifa nge nouyehame ulula. 19Ngeenge taku pulwa eenghono domunaenghono, Ye ta ti: Aame ou! Ndelenee ngeenge ouyuki tau pulwa, ta ti: Olyelye ta dulu okuhokololifa nge? 20Nande ndi kale ndimuyuki, okanya kange mwene taka pe nge oushima. Nande ndi kale ndihe nombedi, Ye ota mono owii mwaame. 21Kandi nombedi. Ihandi yavala omwenyo wange; okukalamwenyo kwange onde ku dina. 22Ashishe shimwe! Onghee handi ti: Ye ota xulifa ou ehe nombedi naau e nombedi. 23Ongola ngeenge tai dipaa po ohangelela, Ye ota sheke eliekelelo laau ehe noushima. 24Edu ola yandjwa mepangelonghono lovakolokoshi, Ye ota uvike oipala yovatokoli vaye. Ngeenge haye, olyelye hano?
25“Heeno, omafiku ange e nonhapo e dule eenhondoki, taa i onhapo itaa mono elao; 26tae litetuka nokweendelela ngaashi eewato deembungu, ngaashi onhwa tai kolokele poshihakanwa. 27Ngeenge handi ti: Nda hala okudimbwa oluhodi lange, nda hala okulundulula oshipala shange nokunyakukwa, 28opo nee handi haluka molwouyehame wange, ondi shi shii, Ove ito pe nge ounongo. 29Ondi nokukala ndi noushima omolwashike handi lihepeke oshimha? 30Nande ndi likoshe noshitwime, ndele ndi yelife omake ange nofewa, 31natango tuu to ninginifa nge melambo leenyata, oikutu yange tai nyonyodola nge.
32“Osheshi Ye ke fi omunhu ngaashi ame, ndi shiive oku mu nyamukula, tu shiive ngeno okuya pamwe koihokolola. 33Kape nomutokoli pokati ketu naye, ou ta dulu okutenheka eke laye kufye vavali. 34Na kufe po oshiti shaye pwaame, omahalukifo aye aha tilife nge, 35opo ame ohandi popi, ndele itandi mu tila vali, osheshi ame hasho ndi li.
Currently Selected:
JOB 9: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
