JOB 6
6
Job te lihalele okufya
1Ndelenee Job okwa nyamukula ndele ta ti: 2“Akutu, ngeno ouyehame wange u yelekwe, nomupya wange u tulwe ngeno moshiyelekifo pamwe nao! 3Osheshi oo mudjuu u dule eheke lopefuta. Onghee eendjovo dange tadi puka. 4Osheshi oikuti yOmunaenghono adishe i li mwaame, omhepo yange ya nwa oudiyo womuyo. Omatilifo aKalunga taa fininike nge. 5Ofino otai kwena tuu pomatondokelo omeva, ile ongobe tai dimine tuu peendja dayo? 6Eendja domumya tadi liwa tuu dihe nomongwa ile outokele wei u nounyenye? 7Omwenyo wange tau anye oku di kuma; odo da fa eendja da nyata kwaame.
8“Akutu ngeno Kalunga a ude omaindilo ange, naKalunga a wanife eteelelo lange! 9Kalunga na teyaule nge, na nanene eke laye okuteta nge po ngeno! 10Ngeno ndi kale ndi nehekeleko lange, nondi nhuke nehafo koshi youdjuu kau nolukeno, shaashi inandi lidimbika eendjovo dOmuyapuki. 11Eenghono dange odashike ndi teelele sha vali, nexulilo lange olilipipo, ndi lididimike vali? 12Eenghono dange da pama mbela ngaashi emanya? Nolutu lange mbela oshikushu? 13Ame nghi na vali ekwafo ngeno; exupifo onde li kufwa mbela?
14“Okaume e nokufila onghenda ou ehe nekwafo, nande a kale a efa etilo lokutila Omunaenghono adishe. 15Vakwetu ve liholola omakoto avo ngaashi etondokelo lomeva, ngaashi omilonga tadi pwiinine po. 16Do oda laulikwa keandu nokoikangwa, omo eemhawe tadi hondama mo; 17nomefimbo loupyu womutenya tadi pwinine ndele tadi kombwa po komutenya meenhele dado. 18Eendjila dekungulukilo dado tadi ngolyoka, tadi i kombuwa ndele tadi xulu po. 19Oyeendo yokuTema ye di lengalenga, ovaendanandjila vokuSheba ve di teelela. 20Ova fifwa ohoni mokulineekela kwavo; va fika ko, ndelenee va limbililwa. 21Osho nanye yo ovongahoelela kwaame. Tamu mono ehaluko ndele tamu tila. 22Ame nde mu lombwela mbela: Pei nge sha? Ile: Etelei nge omulongelo womoinima yeni? 23Ile: Xupifei nge momake omutondi? Ile: Kulilei nge meke lomufininiki?
24“Longei nge, naame ohandi ka mwena; ndele hololelei nge apa nda puka. 25Eendjovo doshili tadi longo neenghono. Ndelenee omatangunino eni taa longo shike mbela? 26Mwa hala mbela okuhandukila eendjovo? Ndelenee eendjovo daau ehe nelineekelo, otadi i omhepo! 27Heeno, ofiye otamu i umbile oshihoololifo, nakaume keni tamu mu lande po. 28Ndelenee paife, vakwetu, taalelei nge: Mu shii ame onde mu fufya apa moipafi yeni. 29Alukeni, paha ningwe osho inashi yuka! Heeno, alukeni, natango tuu odoshili ndi di na. 30Ope na mbela oukolokoshi kelaka lange? Ile ondakona yange itai tongola osho sha nyata?
Currently Selected:
JOB 6: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
