JOB 42
42
Job te lidilulula Ookaume kaye tava filwa onghenda Kalunga ta nangeke Job noupuna
1Opo nee Job a nyamukula Omwene ndele ta ti: 2“Ame ndi ku shii nokutya, keshe eshi to shi dulu ndele iho nyengwa okuwanifa omhangela yoye keshe. 3Olyelye ta holeke omadiladilo ange, ke nounongo? Osho ngaha hano nda popya ndihe neendunge; nda popya oinima tai nyenge nge eendunge, ndihe i shii. 4Pwilikina tuu hano, nda hala okupopya. Ame ohandi ku pula, ove u longe nge! 5Nde ku udile ashike omatwi, ndelenee paife omesho ange nde ku mona ko. 6Onghee hano handi alula eendjovo dange ndele handi lidilulula mondwi nomomute.” 7Ndelenee Omwene eshi a lombwela Job eendjovo tuu odo, Omwene ta ti kuElifas, Omuteman: “Ehandu lange le ku xwamena nookaume koye vavali yo. Shaashi nye inamu popya nge eendjovo da yuka ngaashi omupiya wange Job. 8Kufeni hano paife eengobe heyali deemhedi needi heyali deemhedi, mu ka ye komupiya wange Job nye mu twale exwikiloyambo leni, omupiya wange Job ne mu ilikanene. Osheshi molwaye aeke, opo ndi ninge osho e shi hokwa, itandi mu handukile noku mu fifa ohoni, osheshi nye inamu popya nge eendjovo da yuka ngaashi omupiya wange Job.” 9Opo nee Elifas, Omuteman, naBildad, Omusuhi, naSofar, Omunaamati, va ya ndele osho va ninga ngaashi Omwene e va lombwela. NOmwene okwa fila Job onghenda. 10NOmwene okwa alulula oluhepo laJob, ye eshi a ilikanena ookaume kaye, nOmwene okwa alulila Job aishe, kwa li e i na noku i hapupalifa luvali i dule inya yotete.
11Ovamwaina aveshe ovalumenhu novakainhu novashiivikile vaye aveshe ve uya kuye ndele va kala poshililo pamwe naye meumbo laye, ndele ve mu pendula noku mu hekeleka molwomupya waye aushe, Omwene e mu tuminine. Ndele keshe umwe womuvo okwe mu pa ombongo imwe nongodo yoshingoldo. 12NOmwene okwa nangeka noupuna okukalamwenyo kwaxuuninwa kwaJob noupuna uhapu u dule winya wopehovelo. Ndele ye okwa li e needi omayovi omulongo naane, eengamelo omayovi ahamano, eengobe deendjoko omayovi avali neendongi eenghadi eyovi limwe. 13Nokwa li e novana ovamati vaheyali noukadona vatatu. 14Nokwa luka okakadona kotete Jemima nomutivali Kessia nomutitatu Kerenhappuk. 15Ndele moshilongo ashishe inamu monika ovakainhu vawa va wapala ngaashi ovana oukadona vaJob. Naxe yavo e va pa oshitukulwafyuululwa pamwe novamwaina ovalumenhu.
16Ndele Job okwa kala e nomwenyo natango omido efele nomilongo nhee nokwa mona ovana novatekulu vomapupi ane. 17Opo nee Job a fya a kulupa nokukuta okukalamwenyo.
Currently Selected:
JOB 42: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
