JOB 30
30
Job a ninga omudinwa nomushekwa kovanhu vongahoelela
1“Ndele paife ovanyasha ovo ndi va dule omido, ohava yolo nge, ooxe nde va dina, ndi va tule ngeno keembwa doimuna yange. 2Neenghono domake avo otadi kwafa nge shike, osheshi eenghono davo dounyasha oda manwa po koluhepo. 3Vo ova pwa po koluhepo nokondjala. Vo ohava kunya edu likukutu momulaulu wombuwa nowetokeko, 4vo ohava toola po oimeno ilula poixwa, neendja davo odo omidi doshixwa shaGinster. 5Vo otava tewa po movanhu; omolwavo ovanhu tava kuu onghuwo ngaashi molwomulunga. 6Vo ove nokukala momafilu matilifa eemhunda nomomakwena nomomakololo omamanya. 7Hava xwema mokati koixwa nomokati koulilifa ohava ongala kumwe, 8ovo oludalo longaho kalu noshilonga, ovanhu vehe nefimano, va tewa mo moshilongo. 9Ndele paife ame nda ninga eimbilo lavo lesheko noshipopiwa shavo. 10Ame ohandi nyonyodolwa kuvo, hava kala ofika kokule naame, itava yavala okufiila nge momesho omate. 11Osheshi Kalunga a yululula ofipa youta wange nokwa ninipika nge, omiya doshitomo ve di efela nge koshipala shange. 12Kolulyo taku litumbu ongudu yoidudu. Eemhadi dange otave di kandula po ndele tava umbile nge eendjila davo dehanauno. 13Vo otava hanauna po elila lange, ohava kwafa okumana nge po, nande kape na ou te va pameke vali. 14Vo otave uya va fa tava di momufya womekuma; tava alangata mo tava di meenduba domakulukuma. 15Omahalukifo taa tale nge moshipala. Etumbalo lange tave li kombo po ngaashi omhepo, nongaashi oshilemo elao lange la pepuka po. 16Onghee hano omwenyo wange tau diya mo mwaame, omafiku oluhepo a kwata nge. 17Oufiku otau tyuula omakipa ange; nouyehame tau kunya nge, itau tulumukwa nande. 18Keenghono dinene daye oshikutu shange sha lunduluka shihe na vali olupe, otashi pondo nge ngaashi ofingo yohema yokoshi. 19Ye okwa ekela nge monyata, naame nda ninga ngaashi ondwi noshimhu shongaho.
20“Ame ohandi ku kuwile ekwafo, ndelenee Ove ito nyamukula nge. Ame handi kala apa, ndele Ove ho dakamene nge omesho. 21Ove wa shitukila nge omukukutu uhe nonghenda. Omolweenghono deke loye Ove ho haula nge ngaashi omutondadi. 22Ove to yelula nge momhepo ndi londe kuyo. Ame handi nyonwa po koshihomo shoshikungulu. 23Osheshi ndi shi shii: Ove wa hala okutwala nge mefyo nokongulu muyo aveshe ava ve nomwenyo tava ongala. 24Kape na ou e li koshi yoingumaukilemanya ita djuula mo okwooko a xupifwe, ile momupya waye okukuwa exupifo? 25Ile inandi lilila ngeno ou kwa li e nomafiku madjuu? Omwenyo wange inau humbatela omukwanaluhepo oshisho? 26Heeno, onda teelela elao, ndelenee omupya wa hanga nge. Nda nangela ouyelele, ndelenee omulaulu we uya! 27Omandjadja ange taa fuluka, omafiku oluhepo a hanga nge. 28Ame handi ende noshikutu sheefya, ndihe netango. Ame ohandi penduka ndele handi ingida mongudu yovanhu. 29Ame nda ninga omumwaina wokavandje nakaume komho. 30Oshipa shange sha laula, ndele sha ninga omakoko ndele tashi natuka, nomakipa ange a pya kepupyu. 31Osho ngaha hano okushika okaxumbafeta kange kwa shituka okulila eefya, nondaka yepoli lange ya shituka omutambo.
Currently Selected:
JOB 30: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
