JOB 15
15
Omupya wodinokalunga
1Opo nee Elifas, Omuteman, a nyamukula ndele ta ti: 2“Omulumenhu omunandunge ota nyamukula tuu nokudenga omhepo, ndele ta yadifa tuu onhulo yaye nomhepo yokoushilo? 3Ote lipopile tuu neendjovo dihe noshilonga, neendjovo itadi kwafa sha? 4Heeno, ove to hanauna po etilokalunga loovene ndele to nyono po elimweneno lokoshipala shaKalunga. 5Osheshi owii woye tau longo okanya koye ndele to hoolola eendjovo dovakengeleli. 6Okanya koye mwene take ku tokola, haame. Heeno, omilungu doye mwene tadi ku pe oushima.
7“Ove ngeno omudalwa wotete mokati kovanhu ile wa shitwa, wa tetekela oikulundudu? 8Ove wa li tuu omupwilikini meenghundafana daKalunga? Oto diladila kutya oove auke omunandunge? 9Ou shii shike, osho fye tuhe shii? Ou udite shike, osho inatu shi koneka? 10Mokati ketu yo omu novanhu ve neenghwakutoka, ve nomafiku mahapu e dule omafiku ooxo. 11Ho dini ehekeleko laKalunga neendjovo daye de ku popifa nolukeno? 12Omolwashike omutima woye tau i noixwa? Nomolwashike omesho oye taa ningi manene ngaha, 13nehandu loye to li yukifile Kalunga ndele to pitifa mo mokanya koye eendjovo da tya ngaha? 14Omunhu ta dulu okukala ngahelipi a yela, ou a dalwa komukainhu ota dulu ngahelipi okukala omuyuki? 15Tala, Ye ite lineekele nande ovayapuki vaye, nomaulu yo inaa yela komesho yaye, 16ngahelipi hano omunhu omunyonyodolwa nomunyonwa, ou ta nu owii ngaashi ta nu omeva?
17“Ame nda hala oku ku pukulula. Pwilikine nge. Handi hepaulula osho nde shi mona, 18ovanongo osho tave shi holola, osho ve shi pewa kooxe, itave shi holeke, 19kwaavo va pewa edu ovo aveke, nomunailongo ina enda mokati kavo. 20Ovakolokoshi hava kala alushe ve noumbada, omido odo dinini omufininiki e di sheyelwa. 21Eendaka dehalwifo di li momatwi aye. Mokati kefimbo lombili omuhanauni te mu nhukile. 22Ye ita itavele, kutya ta xupifwa momulaulu, ndele a sheyelwa eongamukonda. 23Ye ota elaela nokukonga omungome: openi u li? Ye oku shi shii nokutya, efiku lomulaulu le mu longekidilwa, li li popepi naye. 24Noudjuu noumbada tau mu halukifa, tau mu tilifa ngaashi ohamba ya tandela olwoodi ombinga, 25shaashi a nana eke laye a lwife Kalunga nokwe linenepekifa koshipala shOmunaenghono adishe. 26Okwa lotoka oku mu kondjifa nehalo laye la kola meameno loikelelifo ihapu ya pama, 27osheshi oshipala shaye e shi ondola nomaadi, eembwetule daye e di ondola di nomakaadi.
28“Nokwa tula moilando ya hanaunwa po, meengulu da shilikwa okunangalwa ndele da tokolwa di kale eenduba domakuma, 29onghee hano ye ita ningi oshipuna, noupuna itau kalelele, noilya yaye itai petamene poshi. 30Ye ita i onhapo omulaulu, elaka lomundilo tali kukutike oitutumine yaye, ye ta nyonwa po komufudo womokanya kaKalunga. 31Na kale ite lineekele oshinima shongaho; ote limbebeleke, osheshi eliko laye otali ka kala olongaho. 32Netango laye fimbo inali fika, otashi mu shakeneke; noluvale laye itali talala vali. 33Ye okwa fomuviinyu tau yaumukifa eenhemo domangongwa ao, nongaashi olumono tali yaumukifa eenhemo dalo. 34Osheshi ongudu yovahenakalunga onhimba, nomundilo tau lafa po etwali laau a tambula ombubo. 35Vo ve noufimba woupyakadi ndele tava dala ehanauno. Nomadimo avo taa longekida ekengelelo.”
Currently Selected:
JOB 15: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
