JESAJA ETWALEMO
ETWALEMO
Embo laJesaja ola lukilwa omuxunganeki a fimana oo a li muJerusalem pexulilo letata lefelemudo etihetatu, Kristus manga ina dalwa. Embo eli ola tukulwa moitukulwa itatu inene:
(1) Omatukulwa 1—39 okwa dja kefimbo linya eshi Juda, oshilongo shouhamba shokoumbuwanhu, sha li sha shololekwa koshilongo oshinanghono Asiria. Jesaja okwa dimbulukwa kutya oshiponga shakula sha taalela Juda kasha li unene eenghono daAsiria, ndelenee okunyona nokuhadulika kwoshiwana, sho shihe na elineekelo muye. Mokupopya nomoilonga ya yela, omuxunganeki ota lombwele ovanhu novawiliki vavo va kale ovayuki vo kave na onhondo, note va londwele kutya ngeenge itava dulika kuKalunga, otashi ke va etela omupya nexulepo. Jesaja okwa xunganeka yo efimbo lombili younyuni nolokuholoka kwomona waDavid, oo ohamba a teelelwa.
(2) Omatukulwa 40—55 okwa dja kefimbo ovanhu vahapu vomuJuda va li moupongekwa muBabilon, va li va dengwa pedu novehe na eteelelo lasha. Omuxunganeki okwa udifa kutya Kalunga ota ka mangulula ovanhu vaye note ke va alulila keumbo kuJerusalem, va tameke onghalamwenyo ipe. Enenediladilo li yela moitukulwa ei otali ti kutya Kalunga Oye mwene wondjokonona (onakudiwa nonakwiiwa younyuni). Ediladilo laye kombinga yOvaisraeli, ola kwatela mo etumo lavo mokati koiwana imwe. Abraham okwa lombwelwa kutya mwoove ovanhu aveshe otava ka nangekwa noupuna (Gen 12:1). Otashi ti, muAbraham otamu ka dja omuxupifi wovanhu aveshe kombada yedu, Jesus Kristus. Eetekisti odo tadi popi “Omupiya wOmwene” odo da fimana unene membo omu.
(3) Omatukulwa 56—66 okwa tumbulilwa ovanhu ovo va aluka nale moupika nove li muJerusalem. Ova pumbwa okushilipalekwa kutya Kalunga ota ka wanifa omaudaneko aye koshiwana. Oshisho shinene osha li apa kutya moshiwana mu monike ouyuki ndele hanhondo, okudiinina Eshabata, omayambo neilikano. Otekisti i na okukonekwa oyo 61:1-2, omo mu na eendjovo odo da longifwa kuJesus petameko loilonga yaye opo a fatulule eifano laye.
Elandulafano loshikalimo
Omalondwelo nomaudaneko 1:1—12:6
Oiwana tai handukilwa 13:1—23:18
Kalunga ta pangula ounyuni 24:1—27:13
Omalondwelo natango nomaudaneko 28:1—35:10
Ohamba yaJuda naAsiria 36:1—39:8
Omatumwalaka e na eudaneko neteelelo 40:1—55:13
Omalondwelo nomaudaneko 56:1—66:24
Currently Selected:
JESAJA ETWALEMO: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.