HOSEA 2
2
Israel ta handukilwa ndee ta filwa onghenda
1Ovamwaxo ovamati ifaneni: Ammi, nokutya Oshiwana shange, novamwanyoko oukadona: Ruhama, nokutya Omufilwanghenda!
2Tweni eemhata nanyoko, heeno, tweni eemhata. Osheshi ye ke fi omwalikadi wange, naame yo nghi fi omulumenhu waye. Ye na fete koshipala shaye ohole yoipala nomavele aye koluhaelo, 3opo ndihe mu dule a kale hamunghele, opo ndihe mu tule po ngaashi a li mefiku lokudalwa kwaye, ndele aha ningwe ngaashi ombuwa, heeno, ndihe mu ninge ngaashi edu la kukuta nondi mu efe a fyenota. 4Ndele Ame ihandi ka filonghenda ovana vaye, osheshi ovo ovana va dalelwa moukumbu. 5Osheshi ina yavo a kala ta haelwa nonaku va dala okwe lififa ohoni, osheshi ye a tile: “Nda hala okulambalala ovaholike vange ava, tava pe nge omungome wange nomeva ange, nolududi leedi nomundele wange nomaadi ange noikunwa yange.” 6Onghee tala, ondjila yoye ohandi ke i fitikifa omano, ndele handi mu dingililifa ohotekuma opo ye aha mone eendjila daye. 7Ndele ye ota ka lambalala ovaholike vaye, ndelenee ye ite va hange ko. Ndele ye ote va kongo, ndele ite va mono. Opo nee ye ota ka tya: “Ame nda hala okwaalukila komulumenhu wange wonale, osheshi okukala kwange kwomafiku enya kwa li ku dule kwopaife.” 8Heeno, oye ina shiiva nokutya, Ame tuu ou nde mu pele oilya nomaviinyu nomaadi, nosho yo Ame nde mu hapupalifila oisiliveli noingoldo, ei ve i yambela Baal. 9Onghee handi ka kufa mo vali oilya mefimbo layo nomaviinyu ange mefimbo la tokolwa, ndele handi vakula olududi leedi dange nomindele dange, nda li ndi noku di uvikilifa olutu laye lahamunghele. 10Paife ohandi ka holola ohoni yaye moipafi yovaholike vaye, ndele kape na ou te mu xupifa meke lange. 11Ndele Ame handi xulifa ehafo laye keshe: oivilo yaye, noivilo yaye yohani ipe nomashabata aye, heeno, nomafiku aye aeshe manene. 12Ndele Ame ohandi ka hanauna po omiviinyu nomikwiyu daye, e di popya nokutya: odo ondjabi youmbwada wange, nde i pewa kovaholike vange. Ame ohandi ke di shitukifa ofuka di liwe koifitukuti yomofuka. 13Osho ngaha handi mu handukilile omafiku ooBaal fimbo e di twiminina omatwiminoyambo, nokwe liwapeka noulinga vomeyulu noilanda vomofingo, ndele a lambalala ovaholike vaye, ndelenee ye a dimbwa nge, Omwene osho ta ti.
14Onghee tala, ohandi ke mu heka, ndi mu twale mofuka ndi mu hekeleke momutima. 15Okudja oko ohandi ke mu pa oikokola yomiviinyu daye, nefilu laAkor li ninge oshivilo sheteelelo, ndele ye ota ka dulika ngaashi nale pomafiku ounyasha waye nongaashi mefiku linya a dja medu laEgipiti. 16Mefiku tuu eli, Omwene osho ta ti, ove oto ka ifana nge: Omulumenhu wange, ndele ito ifana nge vali: Baal yange. 17Ame ohandi kufa mo omadina ooBaal mokanya kaye, opo omadina avo itaa tumbulwa vali.
18Ndele mefiku olo ohandi ningi ehangano omolwavo noifitukuti yomofuka needila dokeulu noinamwenyo yopedu ei tai alangata; heeno, outa neongamukonda noita ohandi i kukifa moshilongo, ndele Ame handi va tulumukifa va kale nombili. 19Ndele Ame handi ke ku valeka fiyo alushe, ndele ohandi ku valeke nouyuki nonetokolo nononghenda nonolukeno. 20Ndele Ame ohandi ke ku valeka noudiinini, ndele ove oto ka shiiva Omwene. 21Ndele mefiku tuu olo ohandi udu ko, Omwene osho ta ti, Ame ohandi ka uda eulu, ndele lo tali ka uda edu. 22Ndele edu tali ka uda oilya nomaviinyu nomaadi, ndele yo otai ka uda Jisreel. 23Ndele handi ke mu likuninina moshilongo, ndele handi filonghenda Lo-Ruhama, ndele handi lombwele Lo-Ammi: “Oove oshiwana shange.” Ndele ye ota itavele: “Kalunga kange.”
Currently Selected:
HOSEA 2: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
