HESEKIEL 47
47
Omulonga womeva e nomwenyo
1Opo nee ye okwa shuna nge koshivelo shotembeli, ndele tala, omeva a kunguluka koshi yoshikulo shoposhi shotembeli lwokoushilo, osheshi oshipala shotembeli sha taalela koushilo. Omeva a kungulukila koshi yekuma lokoumbuwanhu wotembeli taa pitile koumbuwanhu woaltari. 2Ndele ye okwa pitifa nge moshivelo shokoumbangalanhu ndele okwa twala nge koshivelo shopondjelela sha taalela koushilo. Ndele tala, omeva a kunguluka mekuma lomomunghulo lokoumbuwanhu. 3Omulumenhu eshi a pita e noshiyelekifongodi meke laye, ndee ta i a yuka koushilo, okwa yeleka omaludimbo eyovi limwe. Ndele ye okwa taulukifa nge momeva, omeva a twa fiyo opeemhando. 4Opo nee ye okwa yeleka vali eyovi limwe ndele okwa taulukifa nge momeva, omeva a twa fiyo opeengolo. Ndele ye okwa yeleka vali eyovi limwe nokwa taulukifa nge momeva, omeva a twa fiyo omoshiya. 5Ye okwa yeleka vali eyovi limwe, ekungulukomulonga, nda nyengwa okutauluka! Osheshi omeva a ninga male, omeva okukaama, ekungulukomulonga, itali taulukwa komunhu. 6Ndele ye okwa lombwela nge ta ti: “We shi mona tuu, kaana komunhu?” Opo nee ye okwa shuna nge ndele ta endifa nge komunghulo womulonga. 7Fimbo nda aluka, tala, ame nda mona pomunghulo womulonga omiti dihapu, keembinga adishe mbali. 8Ndele ye okwa lombwela nge, ta ti: “Omeva aa ta tondokele komikunda dokoushilo notaa tondoka medu lombuwa notaa i kefuta. Omeva ngeenge taa hange efuta, omeva omulo taa ningi mawa. 9Ndele oinamwenyo aishe ei tai linyenganyenga, otai ka kala i nomwenyo keshe apa omulonga tau tu. Noikwameva otai ka kala mo ihapu. Osheshi omeva aa ngeenge taa ka hanga ko, omeva taa ka shituka mawa, naaishe tai ka kala i nomwenyo, keshe apa omulonga tau tu. 10Novayuli veeshi otava ka kala ofika okudja kuEngedi fiyo okuEn-Eglaim. Oyo tai ningi onhele yokulukilila oiyulifo. Nomuo tamu ka kala oikwameva yomaludi e lili naku lili ngaashi oikwameva mEfuta Lopokati, nokutya ihapu. 11Omakango neenhopo muyo itadi ka kala nawa, osheshi da nuninwa omongwa. 12Ndele pomulonga pominghulo adishe mbali omiti di lili nadi lili tadi ka ima oiimati hai liwa. Omafo ado itaa ka lemba noiimati ihai kuka. Mohani keshe tadi ka ima oiimati ipe, osheshi omeva ado taa di motembeli. Noiimati yado tai ka liwa nomafo ado okuvelula.”
Eengaba doshilongo
13Omwene Kalunga ta ti ngaha: “Ongaba oyo ei, oshilongo mu noku shi taulila oitukulwa yefyuululo pamapata omulongo naavali aIsrael. Josef na pewe oitukulwa ivali. 14Ndele nye mu noku shi fyuulula, keshe umwe efyuululo laye mwene, shaashi ame nda li nda yelula eke lange ndi shi pe ooxokulu yeni. Noshilongo tuu eshi tashi ningi efyuululo leni. 15Ndele ongaba yoshilongo ei: kombinga yokoumbangalanhu okudja kEfuta Lopokati nokushikula ondjila yaHetlon fiyo okonhele apa tapa iwa kuSedad: 16Hamat Beerota, Sibraim, ei i li pokati konhele yaDamaskus nonhele yaHamat, omukunda wopokati kaHaser, wa kala kongaba yaHauran. 17Osho ngaha ongaba yokudja kEfuta Lopokati fiyo okuHasar-Enon, onhele yaDamaskus, fiyo okoumbangalanhu kuHamat, oyo ongaba yokoumbangalanhu. 18Kombinga yokoushilo: pokati kaHauran naDamaskus naGilead noshilongo shaIsrael nokushikula Jordan. Okongaba tuu oyo mu nokuyeleka fiyo oTamar kEfuta lokoushilo. Oyo ombinga yokoushilo. 19Ndele kombinga yokoumbuwanhu okudja kuTamar fiyo okomeva aMeriba puKades, nofiyo okokamulonga kaEgipiti nofiyo okEfuta Lopokati. Oyo ongaba yokombinga yokoumbuwanhu. 20Ndele kombinga yokouninginino: Efuta Lopokati, okudja okongaba fiyo okonhele yokuya kuHamat. Ongaba oyo tuu yokouninginino. 21Ndele nye mu nokutaulilafana oshilongo eshi pamapata aIsrael. 22Ndele nye mu noku shi yandja efyuululo kunye vene nokovanailongo ava hava kala mokati keni, ava va dalela mo mokati keni. Ndele vo nava kale kunye ngaashi ovadalelwa mo vomoshilongo mokati kovana vaIsrael. Pamwe nanye ve nokupewa efyuululo mokati komapata aIsrael. 23Ndele mepata tuu olo omunailongo ta kala mo, mulo mu noku mu pa efyuululo, Omwene Kalunga ta ti.”
Currently Selected:
HESEKIEL 47: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
