HESEKIEL 45
45
Oshitukulwalongo shOmwene
1Ndele oshilongo ngeenge tamu shi tukula efyuululo, mu nokupa Omwene onhele iyapuki yomoshilongo ngaashi eyambo; oule wayo omaludimbo omayovi omilongo mbali naatano, nounene omayovi omilongo mbali. Aishe ei ngaashi ya dingilila oyo iyapuki. 2Nomuyo namu tukulilwe otembeli onhele yeembinga nhee, keshe ombinga i fike pomaludimbo omafele atano. Yo oya dingililwa konhele, ounene wayo u fike pomaludimbo omilongo nhano. 3Nomonhele ove we i yeleka, u nokuyeleka vali onhele oule wayo omaludimbo omayovi omilongo mbali naatano, nounene omaludimbo omayovi omulongo. Muyo tamu ka kala otembeli, yapukielela. 4Oyo onhele iyapuki yomoshilongo, oyo oyovapristeli hava yakula motembeli, ava hava ehene va yakule Omwene. Onhele ei oyo onhele yavo yokutungila mo eengulu davo noyo onhele iyapuki yotembeli. 5Nonhele yOvalevi hava yakula moilonga yomotembeli, oule wayo omaludimbo omayovi omilongo mbali naatano nounene omayovi omulongo. Oyo oyavo, ngaashi oilando omo hava kala. 6Ndele oshilando shoovene shi nokupewa onhele, ounene wayo omaludimbo omayovi atano noule omaludimbo omayovi omilongo mbali naatano, i li pomunghulo wonhele iyapuki. Oyo oyeumbo alishe laIsrael. 7Nonhele yohamba: keembinga adishe mbali donhele iyapuki noyonhele yoshilando pomunghulo wonhele iyapuki nopomunghulo wonhele yoshilando kombinga youninginino nokombinga youshilo. Noule wonhele u fike poule wepata limwe okudja kongaba yokouninginino fiyo okongaba yokoushilo. 8Oyo oyayo vene muIsrael, neehamba dange itadi ka fininika vali ovanhu vange, ndelenee oshixupe shoshilongo vo ve noku shi pa eumbo laIsrael pakuvalwa kwomapata.
Oshiyelekifo shefendelo lohamba
9Omwene Kalunga ta ti ngaha: “Sha wana, nye eehamba daIsrael! Efeni enyeko nefininiko, diinineni etokolo la yuka nouyuki. Efeni okutaataa mo ovanhu vange momapya avo, Omwene Kalunga ta ti. 10Nye mu nokukala mu noshiyelekifo sha twa, oshiyelekifo sheefa, sha twa, noshiyelekifo shabat, sha twa. 11Oshiyelekifo sheefa shi kale shi fike poshiyelekifo shabat: nokutya, oiyelekifo omulongo yabat nai yeleke oshiyelekifo shahomer, noiyelekifo omulongo yeefa nai yelekife ikwao. 12Nosekeli i nokuyeleka eegera omilongo mbali. Eesekeli nhano odi nokuyeleka eesekeli nhano, neesekeli omulongo di nokuyeleka eesekeli omulongo, eesekeli omilongo nhano mu noku di yeleka omina.
13“Omayambo nye mu noku a yandja, oo aa: okatata koshitihamano sheefa lakeshe homer yoilya nokatata koshitihamano sheefa lakeshe homer yomahangu. 14Nouhapu womaadi: okatata koshitimulongo shabat shi nokuya mo mukeshe kor (okor ngaashi ohomer ohai yadifwa keebat omulongo). 15Natango meedi: imwe yomomafele avali yomoulifilo womeva mahapu womuIsrael, ngaashi eendjayambo nexwikiloyambo nepanduloyambo i va etele ekwatakanifo, Omwene Kalunga ta ti. 16Ovanhu aveshe vomoshilongo ve nokweetela ohamba yaIsrael omayambo aa. 17Ndelenee ohamba i kale i noshisho shomaxwikiloyambo neendjayambo noikunwayambo moivilo nomefimbo lohani ipe, nomomashabata, momafimbo aeshe oivilo yeumbo laIsrael. Yo i nokulongekida etimbayambo neendjayambo nomaxwikiloyambo nomapanduloyambo, opo a etele eumbo laIsrael ekwatakanifo.”
Oshipango shokuyamba
18Omwene Kalunga ta ti ngaha: “Mohani yotete mefiku lotete lohani nye mu nokukufa omhedi ihe noshipo nokushekifa otembeli. 19Novapristeli ve nokukufa mohonde yetimbayambo noku i vaeka keemhango deenhu dotembeli neembinga nhee dolukambo loaltari nokeemhango deenhu doshivelo sholuumbo lomeni. 20Osho ngaha mu nokuninga yo mefiku etiheyali lohani molwaava va nyona mepuko ile mokuhashiiva. Osho ngaha nye mu nokweetela otembeli ekwatakanifo. 21Mohani yotete mefiku etimulongo netine lohani nye omu noshivilo shaPaasa. Oshivilo shomafiku aheyali, nye mu nokulya omungome inamu ya onhafi. 22Ndele mefiku tuu olo ohamba i nokulilongekidila ye mwene nokulongekidila oshiwana ashishe shoshilongo onhana yondume ngaashi etimbayambo. 23Ndele momafiku aeshe aheyali oshivilo, ye e nokulongekidila Omwene exwikiloyambo: eengobe eemhedi heyali needi eemhedi heyali, dihe noshipo, keshe efiku momafiku aheyali, nefiku keshe oshikombo oshindume ngaashi etimbayambo. 24Nosho yo vali ye e nokulongekida ngaashi eendjayambo eelita omulongo naheyali netata kongobe omhedi neelita omulongo naheyali netata kodi omhedi, nomaadi eelita nhatu. 25Mohani onhiheyali mefiku etimulongo netitano lohani ye e nokulongekida moshivilo momafiku aeshe aheyali, nokutya: etimbayambo tuu eli, exwikiloyambo tuu eli, eendjayambo tuu edi nomaadi tuu aa.”
Currently Selected:
HESEKIEL 45: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
