EXODUS 16
16
Omanna noimote
1Vo eshi va dja muElim, eongalo alishe lOvaisraeli ole uya kombuwa yaSin, ei i li pokati kaElim naSinai, mefiku etimulongo netitano mohani onhivali, vo eshi va dile muEgipiti.
2Ndele eongalo alishe lOvaisraeli la tangunina Moses naAron mombuwa yaSin. 3NOvaisraeli ve va lombwela tava ti: “Ngeno twa file muEgipiti keke lOmwene, fimbo twa kala omutumba peembiya dombelela ndele twa lile omingome da wana! Ndelenee onye mwe tu eta kombuwa tuu ei, opo eongalo alishe eli linene li fye kondjala.” 4Opo nee Omwene okwa lombwela Moses ndele ta ti: “Tala, Ame ohandi ke mu lokifila omungome tau di keulu. Opo ovanhu tava dulu okupita mo nokuliongela eendja defiku keshe, Ame ndi shiive oku va yeleka ngeenge tava ende tuu momhango yange ile ahowe. 5Nomefiku etihamano ngeenge tava longekida osho ve shi ongela, tashi ka hapupala luvali, shi dule eshi ngaashi hava toola efiku keshe.” 6Opo nee Moses naAron va lombwela Ovaisraeli aveshe tava ti: “Onguloshi yonena otamu ka shiiva nokutya, Omwene e mu pitifa muEgipiti. 7Nongula inene tamu ka mona oshinge shOmwene, shaashi Ye okwa uda okutangunina kweni Omwene, osheshi fye ovashike mbela mu tu tangunine?” 8Opo nee Moses okwa tya: “Hano opo tuu opo Omwene ngeenge te mu pe onguloshi ombelela yokulya nongula omingome da wana, osheshi Omwene a uda ko eenhangu deni, mwe mu tangunina. Osheshi fye ovashike mbela? Hafye mwa tangunina, ndelenee mwa tangunina Omwene.”
9Ndele Moses okwa lombwela Aron: “Eongalo alishe lOvaisraeli li lombwela: Eheneni oku koshipala shOmwene, shaashi Ye okwa uda eenhangu deni.” 10Ndele Aron eshi a mana oku di popya keongalo alishe lOvaisraeli, vo ova taalela langhele kombuwa, opo tuu opo oshinge shOmwene sha monika moshilemo. 11NOmwene okwa popya yo naMoses ndele ta ti: 12“Ame nda uda ko eenhangu dOvaisraeli. Va lombwela u tye: Onguloshi yonena otamu ka mona ko ombelela yokulya, nongula inene otamu ka kutifwa komungome, ndele tamu ka shiiva nokutya, Aame Omwene Kalunga keni.”
13Nonguloshi oimote ye uya ya tuvika onhanda. Nongula pa li pe nomume ihapu keembinga adishe donhanda. 14Nomume eshi ya dja ko, mombuwa pedu pa li pe nounima vanini ngaashi oupatupatu ngaashi eandu. 15Ovaisraeli eshi ve i mona, ova tongafana tava ti: “Eshi oshike hano?” Osheshi inava shiiva eshi oshike. Opo nee Moses e va lombwela: “Eshi omungome, Omwene te mu pe okulya. 16Nosho Omwene okwa tile: ‘I tooleni, keshe omunhu paemhumbwe daye: eelita mbali komunhu keshe e li metwali loye.’ ” 17NOvaisraeli osho va ninga, ve i toola po, umwe ihapu namukwao inini. 18Ndele vo eshi ve i yeleka noshiyelekifo shagomer, hano ou a toola po ihapu, ina xupifa po, naau a toola po inini, ina tateka. Vo va ongela, keshe umwe paemhumbwe daye. 19Ndele Moses e va lombwela ndele ta ti: “Nande umwe ina xupifa sha shomuyo kefiku lomongula.” 20Ndelenee vo inava pwilikina Moses: vamwe va xupifa sha shomuyo kefiku lomongula. Opo nee omainyo e uya muyo noya nyonauka. Onghee hano Moses okwe va handukila unene. 21Ndele vo va kala noku i ongela keshe ongula, keshe umwe paemhumbwe daye. Nomutenya eshi wa twa oya hengumuka po. 22NomOlomakaya vo ova ongela omungome muhapu wa yeleka oshiyelekifo eelita nhee kukeshe umwe. Novakulunhu aveshe veongalo ve uya oku shi hepaululila Moses. 23Opo nee ye te va lombwele ta ti: “Osho ngaha Omwene a tonga. Mongula efiku letulumuko, Eshabata liyapuki lOmwene. Oyo mwa hala oku i teleka, i telekeni, naayo mwa hala okupaka po, i pakeni po nena. Naaishe ei ya xupa po, i tuvikileni, i xupifileni efiku lomongula.” 24Ndele vo ove i tuvikilila efiku lomongula, ngaashi Moses a tile. Ndele yo inai nyonauka nomuyo inamu holoka omainyo. 25Opo Moses ta ti: “I lyeni nena, osheshi nena Eshabata lOmwene. Nena itamu i mono po pondje. 26Momafiku ahamano nye mu noku i ongela, ndelenee mefiku etiheyali, olo Eshabata, itai ka monika po.”
27Ndele mefiku etiheyali vamwe vomovanhu va ya pondje va ka ongele, ndele inava mona po sha. 28Opo nee Omwene ta ti kuMoses: “Fiyo onaini tamu anye okudiinina oipango yange neemhango dange? 29Taleni, Omwene e mu pa Eshabata, onghee te mu pe omungome womafiku avali mefiku etihamano. Keshe umwe na fyaale apa e li mefiku etiheyali, ye ina pita mo monhele yaye.” 30Osho hano ovanhu va tulumukwa mefiku etiheyali.
31Ndele epata laIsrael le i luka “omanna.” Ndele yo ya li ngaashi eembuto dakoriander, ndele okumakelwa kwayo okwa li ngaashi omungome u nomaadi eenyiki.
32Ndele Moses a tya vali: “Omwene okwa lombwela nge ta ti: ‘Kufa ogomer imwe i yadi, u i tuvikile, i diininwe kepupi nepupi, opo va mone omungome nao Ame nde mu palulifa mombuwa moku mu endifa eshi nde mu pitifa muEgipiti.’ ” 33Ndele Moses okwa lombwela Aron: “Kufa oshiyuma u tule mo omanna eelita mbali, u a tule koshipala shOmwene, a diininwe fiyo okoludalo noludalo.” 34Ngaashi Omwene a lombwela Moses, osho Aron e i tula koshipala shondobwedi, i tuvikilwe mo. 35Ndele Ovaisraeli va lile omanna omido omilongo ine fiyo va fika moshilongo shi novanhu. Vo ova lile omanna fiyo va fika kongaba yedu laKaanan. 36(Ogomer imwe oyo eelita mbali.)
Currently Selected:
EXODUS 16: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
