EXODUS 14
14
Ovaisraeli tava tauluka Efuta Litilyana
1Opo nee Omwene okwa lombwela Moses ndele ta ti: 2“Lombwela Ovaisraeli nava aluke ko, va ka onge onhanda puPi-hahirot, pokati kaMigdol nefuta opuBaal-Sefon; opopepi navo mu nokwoonga onhanda opefuta. 3Shaashi Farao ta diladila Ovaisraeli ndele ta ti: ‘Vo ova pukila moshilongo, nombuwa ye va kwatela mo.’ 4Ndele Ame ohandi ka kukutika omutima waFarao, opo venya ve va shikule. Ndele Ame nda hala okulifimanekifila muFarao nomeenghono adishe domatanga ovakwaita vaye, nOvaegipiti tava ka shiiva nokutya, Aame Omwene.” Nosho va ninga.
5Ohamba yaEgipiti eshi ya uda onghundana nokutya, ovanhu va ya onhapo, omutima waFarao nomitima dovapiya vaye oda lundulukila oshiwana, ndele tava ti: “Fye otwa ninga ngahelipi, eshi twa efa Ovaisraeli va dje mo, vehe tu longele vali?” 6Opo nee ye a mangifa omatemba aye oita nokwa ya ko novakwaita vaye. 7Ndele ye okwa kufa omatemba omafele ahamano oita nomatemba aeshe makwao oita omuEgipiti novakwaita va hoololwa mukeshe etemba. 8NOmwene okwa kukutika omutima waFarao, ohamba yaEgipiti, opo va shikule Ovaisraeli manga Ovaisraeli va dja mo keameno leke li neenghono. 9NOvaegipiti ve va shikula, eenghambe adishe daFarao nomatemba oita novalondi vaye veenghambe neenghono domatanga ovakwaita, ndele vo ove va hokela fimbo ve li monhanda pefuta muPi-hahirot, popepi naBaal-Sefon. 10Farao eshi a ehena po, Ovaisraeli va yelula omesho avo, ndele tala, Ovaegipiti ove uya tave va shikula. Ndele va kwatwa koumbada munene. Opo Ovaisraeli va kuwa kOmwene. 11Ndele vo va pula Moses, tava ti: “MuEgipiti inamu monika eembila hamba, eshi ove we tu ongela noku tu eta oku, tu file mombuwa? Ove we tu ninga ngahelipi eshi we tu kufa muEgipiti? 12Fye inatu shi ku lombwela muEgipiti? Tu shii eshi twa tya: Tu efa, tu kale nombili, tu longele Ovaegipiti. Osheshi okulongela Ovaegipiti ku dule okufila mombuwa.” 13Ndelenee Moses okwa nyamukula ovanhu, ndele ta ti: “Inamu tila nande! Kaleni mu neyombamo mu tale exupifo li fike peni Omwene te li mu ningile nena eli. Osheshi ngaashi tamu mono ko Ovaegipiti nena eli, itamu ke va mona ko vali fiyo alushe. 14Omwene te ke mu kondjela, nye mu nokukala nokumwena filu.”
15Opo nee Omwene okwa pula kuMoses: “Ove oho ingidile nge shike? Lombwela Ovaisraeli va fikame. 16Ndele ove, yelula onhaili u nane eke loye kombada yefuta u li tukule pokati, Ovaisraeli opo va shiive okutaulula efuta poukukutu. 17NAame ohandi ka kukutika omitima dOvaegipiti, opo tave uya tave mu shikula. Ndele Ame ohandi ke lifimanekifila muFarao nomeenghono adishe daye dovakwaita nomomatemba aye oita nomovalondi vaye veenghambe. 18NOvaegipiti tava ka shiiva nokutya, Aame Omwene, Aame, ngeenge handi lifimanekifa koshipala shaFarao, momatemba aye oita nomovalondi vaye veenghambe.”
Ovaegipiti tava file mEfuta lOmanenge
19Nomweengeli wOmwene ou a kwatela etanga lOvaisraeli komesho okwa dja po opo ndele a tula konima yavo. Noluudi loshilemo yo eli le va kwatela komesho la dja po opo nola kala konima yavo. 20Osho hano lo le uya pokati keemhunga dOvaegipiti neemhunga dOvaisraeli. Noshilemo osha li shilaula kwaavenya, ndelenee sha minikila oufiku kwaava. Onghee hano eemhunga dimwe da nyengwa okweehena kudikwao oufiku.
21Opo nee Moses okwa yelula eke laye kombada yefuta, nOmwene okwa pepifa omhepo idjuu yokoushilo oufiku aushe nokwa pwiininika efuta. Efuta la ninga edu likukutu nomeva e litukuka. 22NOvaisraeli ova enda pokati kefuta medu likukutu. Nomeva a li ekuma kombinga yokolulyo lavo noyokolumosho lavo. 23Opo nee Ovaegipiti ve va shikula, va ya mo pokati komeva nomeva konima yavo, neenghambe nomatemba oita novalondi. 24Ndele menangelo longula, Omwene okwa vandamena moluudi lomundilo noloshilemo, Ye a tala etanga lovakwaita Ovaegipiti nokwa dongakanifa etanga lovakwaita Ovaegipiti. 25Ndele Ye okwa damifa omaulu omatemba ndele va nyengwa okweendelela nokweehena komesho. Opo Ovaegipiti ova tya: “Natu yeni onhapo Ovaisraeli, osheshi Omwene te va kondjele mokulwifa Ovaegipiti!” 26Opo nee Omwene okwa lombwela Moses ndele ta ti: “Nana eke loye kombada yefuta, omeva opo a shiive okwaalukila kombada yOvaegipiti, kombada yomatemba avo oita nokombada yovalondi vavo veenghambe.” 27Ndele Moses okwa nana eke laye kombada yefuta, neluwa eshi la tenda, efuta ola tondokela monhele yalo fimbo Ovaegipiti va ya onhapo ve li shakeneka. Osho ngaha hano Omwene okwe va nguda mokati kefuta. 28Nomeva eshi a alukila mo, oo a tuvika omatemba oita novalondi neenghono adishe doita yaFarao, ava ve va shikula mefuta konima yavo. Nande umwe muvo a xupa po. 29Ndelenee Ovaisraeli va enda poukukutu va taulula efuta. Nomeva a li ekuma kombinga yokolulyo lavo nokombinga yokolumosho lavo. 30Osho ngaha hano Omwene a xupifa Israel mefiku olo momake Ovaegipiti. NOvaisraeli va mona ovafi Ovaegipiti komunghulo wefuta. 31Israel okwa mona yo oshilonga shinene eshi shi neenghono, Omwene eshi a nyonauna po Ovaegipiti. Opo nee oshiwana sha tila Omwene, nosha itavela Omwene naMoses, omupiya waye.
Currently Selected:
EXODUS 14: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
