OMUUDIFI 10
10
Omatumbulodiladilo taa popi oinima i lili nai lili
1Eedi da fya tadi mbutike ndele tadi nyono po omaadi omupiluli womiti. Oulai munini u dule eendunge nefimano. 2Omutima womunaendunge u li kolulyo, ndelenee omutima welai okolumosho. 3Heeno, mokweenda kwalo nondjila elai kali neendunge. Tali hololele keshe umwe nokutya, lo elai. 4Ehandu lomupangeli ngeenge tali ku xwamene, ino efa oshilonga shoye, osheshi elididimiko tali kelele omanyono mahapu. 5Oku nomupya nde u mona koshi yetango nokutya, epuko la dja komupangeli: 6Oulai tau tulwa pombada u fimanekwe, noipuna i nokukala omutumba poshi. 7Ame nda mona ovapika va londa eenghambe, ndelenee eehamba da enda ngaashi ovapiya kolupadi pedu. 8Ou ta fe elambo, ota wile mulo, ou ta ngumauna po ekuma, ota lika keyoka.
9Ou ta pande omamanya, ote lilengula nao, ndele ou ta pande oikuni, ta tuwa oipute kuyo. 10Oshivela ngeenge sha fimha, nomunhu ina upika ombinga yeememo, ye e nokulonga neenghono dihapu. Hano okudiinina oilongifo okwo eendunge. 11Eyoka ngeenge tali li omunhu, fimbo inali fipwa, ounongo wokufipa uhe na vali oshilonga.
12Eendjovo domokanya komunamayele odiwa, ndelenee elai tali ponwa po komilungu dalo vene. 13Ehovelo leendjovo dokanya kalo olo oulai, nexulilo lokupopya kwalo oushima. 14Elai tali popi eendjovo dihapu, ndelenee omunhu iha shiiva oshike tashi ke uya. Olyelye te mu hololele osho tashi holoka konima yaye. 15Elai olo itali shiiva okuya koshilando, osheshi la lolokifwa koupyakadi walo. 16Woo ove oshilongo! Ohamba yasho okaana, nomalenga asho eshi taa kala poitelekela eengula dinene nokuli. 17Akutu oshilongo ove shi nelao! Ngeenge ohamba yasho omunedina, ndele ngeenge omalenga asho taa kala poililo pefimbo la wapala ngaashi ovalumenhweelela, hangaashi ovafinyuni. 18Omolwoundede oikonde yongulu tai teka po, nongulu tai lokifwa molwounye womake. 19Oitelekela tai telekelwa okuhafifa, nomaviinyu taa hafifa omwenyo; ndelenee aishe tai etwa po koimaliwa. 20Ino tuka nande ohamba momadiladilo oye, ndele monduda yoye yokunangala, ino tuka oshipuna. Osheshi eedila dokeulu tadi twala ondaka yoye, naai i nomavava tai holola eendjovo doye.
Currently Selected:
OMUUDIFI 10: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
