DANIEL 1
1
Daniel nookaume kaye vatatu tava tekulwa mouhamba waBabilon
1Momudo omutitatu wepangelo laJehoiakim, ohamba yaJuda, Nebukadnesar, ohamba yaBabilon, oye uya kuJerusalem, ndele tai shi kondeke. 2Ndele Omwene okwa yandja Jehoiakim, ohamba yaJuda, momake aye pamwe nombinga imwe yomoiyuma yomotembeli yaKalunga, ndele ye okwe i twala kedu laSinear motembeli yakalunga kaye, noiyuma okwe i tuvikila melimba lemona lakalunga kaye. 3Opo nee ohamba oya lombwela Aspenas, omukulunhu womalenga, a kufe movana vaIsrael, mwaava vomepata leehamba ile moidale 4ovanyasha ovamati ava vehe noshipo shasha komalutu, ndelenee vawa okutala novanaendunge mounongo aushe, ndele ve neshiivo nomayele nomitwe dipu okutambula omalongo naava va wana okulonga mouhamba wohamba, ndele ye okwa li e noku va longa okushanga nokupopya elaka lOvakaldea. 5Ndele ohamba oya lombwela, vo va pewe efiku keshe eendja domeendja dohamba nomaviinyu aa haa nuwa kohamba. Osho ngaha ve nokutekulwa omido nhatu, opo va shiive okulongela ohamba omido odo ngeenge da pita po.
6Ndele mokati kavo mwa li ovana vaJuda Daniel, Hanania, Mishael naAsaria. 7Ndelenee omukulunhu womalenga okwe va lukulula: Daniel okwe mu luka Beltesasar, Hanania okwe mu luka Sadrak, naMishael Mesak, naAsaria okwe mu luka Abednego. 8Ndele Daniel okwa tokola momutima waye nokutya, ye ite ke linyateka neendja dohamba ile nomaviinyu haa nuwa kuyo, nokwa indila komukulunhu womalenga, a itavelwe okukala ine linyateka. 9Ndele Kalunga okwa itavela Daniel a mone onghenda nohokwe koshipala shomukulunhu womalenga. 10Ndele omukulunhu womalenga okwa tya kuDaniel: “Ame ohandi tila omwene wange ohamba, ou e mu tokolela eendja deni nokunwa kweni, ngeenge ta mono oipala yeni ya vatuka, i dulike koipala yovamati vakweni vepupi leni, osho ngaha tamu twalifa omutwe wange moshiponga kohamba.” 11Ndelenee Daniel okwa lombwela omupashukili ou a tulwa po komukulunhu womalenga okupashukila Daniel, Hanania, Mishael naAsaria, ta ti: 12“Yelekela ovamati voye omafiku omulongo, tu pewe okulya ombidi nokunwa omeva. 13Ove u tu tale nee, oipala yetu noipala yovamati ovo tava li eendja dohamba opo u tokole po pokumona oipala yovamati voye.” 14Moshinima eshi okwe va uda ndele te va yeleke omafiku omulongo. 15Ndele eshi pa pita omafiku omulongo, vo ova monika ve nomalutu a ondoka nove li nawa, ve dule ovamati aveshe ovo va lya eendja dohamba. 16Opo nee omupashukili okwa kaleka eendja davo nomaviinyu avo kwa li ve noku a nwa, ndele te va pe ombidi.
17Ndele ovanyasha ovamati ava vane, Kalunga okwe va pa omayele okukoneka omishangwa adishe nounongo keshe. Daniel okwa li e neendunge dokushiiva omamoniko neendjodi. 18Ndele omafiku enya eshi a pwa ko palombwelo lohamba va li ve nokutwalwa kuye, omukulunhu womalenga okwe va twala nee koshipala shaNebukadnesar. 19Ndele ohamba ya popya navo, ndele mokati kavo aveshe inamu monika nande umwe ngaashi Daniel, Hanania, Mishael naAsaria. Osho ngaha va kala nokuyakula koshipala shohamba. 20Ndele ohamba oye va pula moinima aishe yeendunge noyounongo nokwa koneka, ovo ovanaendunge, ve dule lwomulongo ovanongo neemhule adishe da li mouhamba waye aushe. 21Ndele Daniel okwa kala ko fiyo okomudo wotete wohamba Kores.
Currently Selected:
DANIEL 1: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
