AMOS 9
9
Ehanauno lotembeli
1Ame onda mona Omwene e li ofika poaltari, ndele Ye ta ti: “Denga peefingo deengudi opo oikulo yeenhu i kakame noixwandu nai wile kombada yomitwe daaveshe. Ndele ava tava xupu, Ame ohandi ke va mana neongamukonda: ou womuvo ta i onhapo, ite lixupifa, ndele nande umwe wavo a dja mo ita ka xupa. 2Nande va pumine moshovafi, eke lange otali ke va shila mo. Nonande va londe keulu, Ame ohandi ke va undulila poshi. 3Nonande va hondame koxulo yaKarmel, Ame ohandi ke va konga ko noku va kufa ko. Nonande va hondame momesho ange moule wefuta, Ame ohandi ka lombwela eyoka li va lumatele mo. 4Ndele nande va ende ngaashi eenghwate komesho yovatondadi vavo, Ame ohandi ka lombwela, eongamukonda li va dipae. Ndele eisho lange tali ke va tala nai, hanouwa.”
5Heeno, Omwene Kalunga komatanga ovakwaita ota kumu edu, olo tali kakama (hengumuka po) ndele aveshe ava ve li kombada yalo ohava nyika oufiye; ndele tali ke litumba naashishe shi li mo, ngaashi Nil nokushuna mo ngaashi omeva omulonga waEgipiti. 6Oye tuu ou te litungile omalimba aye momaulu, ndele ta pameke ewangadja laye kombada yedu. Oye ou ta ifana omeva efuta ndele te a tileshi kombada yedu, edina laye Omwene.
7Omwene ta ti: “Nye ovana vaIsrael, kamu fi kwaame ngaashi ovana vaEtiopia? Israel inandi shi pitifa mo mbela medu laEgipiti nOvafilisti muKaftor nOvaarami muKir? 8Taleni, omesho Omwene Kalunga taa taalele oshilongo oshilunde, ndele Ame ohandi ke shi komba po kombada yedu. Ndelenee eumbo laJakob itandi li hanauna po sheke, Omwene ta ti. 9Osheshi tala, Ame ohandi yandje ondaka ndele handi ka fifa Israel mokati koiwana aishe ngaashi tapa fifwa nomushalo. 10Ovalunde aveshe vomoshiwana shange ava hava ti: ‘Omupya itau ke tu hanga noitau ke tu shakeneka, otava ka fya keongamukonda.’ 11Mefiku tuu olo ohandi ka dikulula onduda ya nyonauka yaDavid. Ame ohandi ka fitika po omifya dayo nokutungulula omakulukuma ayo, ndele handi ke i tungulula i kale ngaashi ya li mefimbo lonale. 12Opo va kale ve noshixupe shaEdom noiwana aishe ya ifanenwa edina lange,” Omwene, ou te shi ningi, ta ti.
13Taleni, omafiku tae uya, Omwene ta ti, omutei ta shikula omupululi nomulyati woshikolelo ta shikula omukuni wombuto. Ndele eemhunda tadi ka xungauka omaviinyu noikulundudu aishe otai ka eta oiimati. 14Ndele Ame ohandi ka lundulula okukala kwaIsrael, ndele vo otava ka tungulula oilando ya ninga omaputu ndele tava ka tula mo. Vo otava ka twika oikokola yomiviinyu nokunwa omaviinyu ayo, nokudika oikunino nokulya oiimati yayo. 15Ndele Ame ohandi ke va twika medu lavo ndele vo itava ka kufwa mo vali medu lavo, eli Ame nde li va pa, Omwene Kalunga koye osho ta ti.
Currently Selected:
AMOS 9: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
