AMOS 2
2
Moab, Juda naIsrael tai xunganekwa
1Omwene osho ta ti: “Omolwomatauluko atatu naane aMoab, Ame ihandi ka alula ehandukilo. Osheshi vo va xwika omakipa ohamba yaEdom omute. 2Onghee hano Ame ohandi ka tuma omundilo muMoab, ndele tau ka lungwinifa eengulu doupuna domuKeriot. Ndele Moab tashi ka fila mondokosho, eshi onghuwo yolwoodi tai kuu nondaka yenghuma tai ingida. 3Ndele Ame ohandi ka komba po omupangeli mokati kavo, ndele handi ka dipaa omalenga aye aeshe pamwe naye, Omwene ta ti.”
4Omwene osho ta ti: “Omolwomatauluko atatu, naane aJuda, Ame ihandi ka alula ehandukilo. Osheshi vo ohava ekeleshi omhango yOmwene, ndele inava diinina eenghedimhango daye. Ndele oikalunga yavo yoipupulu oye va pukifa, oyo ya shikulwa kooxekulu. 5Onghee hano ohandi ka tuma omundilo muJuda, ndele tau ka lungwinifa eengulu doupuna domuJerusalem.”
6Omwene osho ta ti: “Omolwomatauluko atatu, naane aIsrael, Ame ihandi ka alula ehandukilo. Osheshi hava landifa po omuyuki oimaliwa nohepele eenghaku mbali. 7Vo ohava lyatele mondwi yedu omutwe wohepele nohava ngolyola ondjila yepongo. Ndele omulumenhu naxe tava i komukainhu umwe auke, nosho ngaha hava sheke edina lange liyapuki. 8Ndele poaltari keshe hava nangala kombada yeenhanga da yandjelwa ombabyona oshikwatifo, ndele vo hava nu omaviinyu a futifwa mongulu yakalunga kavo.
9“Ndele Ame nda hanauna po moipafi yavo Ovaamori, ava va li vale ve fike poule womisederi, ndele va li va pama ngaashi omiandi. Ndelenee Ame nda hanauna po oiimati yaye pombada nomidi daye domedu. 10Nosho yo nde mu kufa medu laEgipiti ndele nde mu endifa omido omilongo ine mombuwa, opo mu nangale edu lOvaamori. 11Ndele Ame nda pendula ovaxunganeki movana veni ovamati, nOvanasiri movanyasha veni. Ile hasho, nye ovana vaIsrael? Omwene ta ti. 12Ndelenee nye omwa pa Ovanasiri omaviinyu novaxunganeki mwe va lombwela, tamu ti: Inamu xunganeka vali. 13Tala, Ame handi ka eta ekweno mokati keni, ngaashi etemba tali kwena ofenenge, li yadi oipandi yoilya, 14opo ou e nonhapo, ita dulu okuya onhapo, naau e neenghono, ita shiiva oku di longifa, nomunaenghono ita dulu okuxupifa omwenyo waye. 15Ndele omuumbi ita ka kala ofika naau e nonhapo ita xupifwa, nomulondi wonghambe ita xupifa omwenyo waye. 16Ndele omuladi mokati kovanaenghono ota ka ya onhapo hamunghele mefiku tuu olo, Omwene ta ti.”
Currently Selected:
AMOS 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.