2 EEHAMBA 9
9
Jehu ta ningi ohamba yaIsrael ndele ta hovele okumana po epata laAhab
1Opo nee Elisa a ifana umwe womovalongwa vomuxunganeki ndele ta ti kuye: “Limanga moshiya, kufa oshanga ei yomaadi meke loye, ndele inda kuRamot shomuGilead. 2Ove eshi wa fika ko, tala apa Jehu yaJosafat yaNimsi e li. Ndele inda mo, mu lombwela na fikame muvakwao, na dje mo ndele ove to mu twala mondjuwo yomeni. 3Kufa hano oshanga yomaadi u a tile komutwe waye ndele to ti: ‘Omwene osho ta ti: Ame ohandi ku vaeke, u ninge ohamba yaIsrael.’ Opo nee to yeulula oshivelo ndele to faduka po, ino ongaonga.” 4Omuxunganeki omunyasha okwa ya kuRamot shomuGilead. 5Ye eshi e uya, ovakulunhu vomatanga ovakwaita va li omutumba oko, ndele ye ta ti: “Ame ondi nondjovo kwoove, omukulunhu.” Ndele Jehu ta pula: “Kulyelye womufye atushe?” Ndele ye ta nyamukula: “Kwoove, omukulunhu!” 6Nokwa fikama ndele ta i meumbo. Opo nee winya ta tile omaadi komutwe waye ndele ta ti kuye: “Omwene Kalunga kaIsrael osho ta ti: ‘Ame ohandi ku vaeke u ninge ohamba yovanhu vOmwene Ovaisraeli. 7Ndele ove oto ka mana po eumbo laAhab, omwene woye, opo ndi dule okuhandukila Isabel ohonde yovapiya vange, ovaxunganeki, nohonde yovapiya aveshe vOmwene 8nepata alishe laAhab tali ka kombwa po, naame ohandi ka mana po sheke muIsrael omulumenhu keshe womepata laAhab. 9Osheshi eumbo laAhab ohandi ka ninga ngaashi keumbo laJerobeam yaNebat, nongaashi keumbo laBaasha yaAhia. 10Ndele eembwa tadi ka lya Isabel poluhaela laJisreel, ndele itapa monika nande umwe ou te mu pake.’ ” Opo nee ye a yeulula oshivelo nokwa faduka po. 11Opo nee Jehu okwa pita mo ndele ta i kovapiya vomwene waye, ndele vo tave mu pula: “Oku li nawa? Omolwashike omunyananghwengu winya e ile pwoove?” Ndele ye te va nyamukula: “Nye vene mu mu shii, nokupopya kwaye!” 12Ndelenee vo tava ti: “Oipupulu! Tu hepaululila!” Nokwe va nyamukula: “Okwa lombwela nge shonhumba nongadi ndele ta ti: Omwene osho ta ti: ‘Ame ohandi ku vaeke u ninge ohamba yaIsrael.’ ” 13Opo nee va kufa diva, keshe umwe, oshikutu shaye ndele ve i yala peemhadi daye meendodo. Ndele va shika enghuma ndele tava ti: “Jehu oye ohamba!”
14Opo nee Jehu yaJosafat yaNimsi naava va li puye va hangakena okukondjifa Joram. Ndele Joram okwa li e noupyakadi okupopila Ramot shomuGilead, ye mwene nOvaisraeli aveshe va lwifa Hasael, ohamba yaAram. 15Ndelenee pefimbo olo ohamba Joram ya shuna kuJisreel, i hakulwe oiveta yo ye i yashwa kOvaarami molwoodi lokulwifa Hasael, ohamba yaAram. Ndele Jehu ta ti: “Ngeenge tashi mu wapalele, inamu efa nande umwe ta i onhapo, ta di moshilando, ehe shi shiivifile muJisreel.” 16Opo nee Jehu a londa metemba loita ndele ta i kuJisreel, osheshi Joram a nangala ko. Ndele Ahasia, ohamba yaJuda, e uya okutalela po Joram.
17Ndele fimbo omunangeli ta kala ofika moshungongulu muJisreel, ye ota mono ongudu yaJehu tai uya, ndele ta ti: “Ame ondi wete ongudu tai uya.” Opo nee Joram ta ti: “Kufa omulondi wonghambe u mu tume ko, e mu shakeneke, ndele na pule: ‘Ombili tuu?’ ” 18Nomulondi wonghambe okwe mu shakeneka ndele ta ti: “Ohamba tai pula: ‘Ombili tuu?’ ” Ndelenee Jehu ta nyamukula: “Ove u na shike nombili? Shikule nge!” Omunangeli okwe shi shiivifa ndele ta ti: “Omutumwa okwa fika ko kuvo, ndelenee ina aluka.” 19Opo nee ta tumu ko omulondi omutivali wonghambe. Ye eshi te uya kuvo, ye ta ti: “Ohamba tai pula: ‘Ombili tuu?’ ” Ndelenee Jehu ta nyamukula: “Ove ou na shike nombili? Shikule nge!” 20Nomunangeli okwe shi shiivifa ndele ta ti: “Ye okwa fika kuvo, ndelenee ina aluka. Ndelenee okulonda okwa fa okulonda kwaJehu yaNimsi, oye ta tondokifa onghambe ngaashi omuyanamhwengu.” 21Opo nee Joram ta ti: “Mangeni!” Ndele va manga etemba laye. Ndele Joram, ohamba yaIsrael, naAhasia ohamba yaJuda, keshe imwe metemba layo, va fikama, va ka shakeneke Jehu, ndele ve mu shakeneka mepya laNabot muJisreel. 22Ndele Joram eshi a mona Jehu, ota ti: “Ombili tuu Jehu?” Ndelenee ye ta nyamukula: “Oshike? Ombili yashike, fimbo okuhaelwa kwanyoko Isabel noududu waye u li po uhapu?” 23Opo nee Joram a piluka ndele ta i onhapo ndele ta ti kuAhasia: “Ekengelelo, Ahasia!” 24Ndelenee Jehu okwa shila outa waye nokwa yasha Joram pokati komapepe aye, oshikuti sha tyuula omutima waye, nokwa wila metemba laye. 25Opo nee Jehu ta lombwele elenga laye Bidkar: “Mu kufa po, mu ekela mepya laNabot, Omujisreel, osheshi to dimbulukwa tuu, ndishi, nokutya fimbo twa londa nokweenda twa shaamafana nokushikula xe Ahab, nhumbi Omwene e mu xunganeka, ta ti: 26‘Oshili, Ame nda mona onghela ohonde yaNabot noyovana vaye, Omwene ta ti, ndele mepya eli handi ke ku handukilila, Omwene ta ti.’ Onghee hano, mu kufa, u mu ekele mepya eli, pandjovo yOmwene.” 27Ahasia, ohamba yaJuda, eshi ye shi mona, oya ya onhapo langhele kongulu yoshikokola muBet-Hagan, ndelenee Jehu e mu shikula ndele ta ti: “Mu yasheni yo!” Ndele ve mu yashela metemba koshikulundudu shaGur puJibleam. Ndelenee okwa ya onhapo kuMegido, ndele oko a fila. 28Novapiya vaye ve mu twala kuJerusalem ndele ve mu paka mombila yaye pooxe moshilando shaDavid.
29Ndele momudo omutimulongo naumwe waJoram yaAhab, Ahasia a ninga ohamba yaJuda.
30Ndelenee Jehu okwe uya kuJisreel. Isabel, eshi e shi uda, okwa vaeka omesho aye nomaadi malaula nokwa wapeka omutwe waye, ndele ta talele mombululu yekende. 31Jehu fimbo ta i mo, ta piti moshivelo, winya ta ti: “U li tuu nawa, Simri, omudipai womwene woye?” 32Nokwa tala pombada kombululu yekende, ndele ta pula: “Olyelye a ama kwaame?” Opo nee omalenga avali ile atatu e mu tala. 33Ndele ye ta ti: “Mu undwileni poshi!” Ndele ove mu undwila poshi, nohonde yaye ya nipaukila kekuma nokeenghambe, ndele odo de mu lyataula. 34Ndelenee Jehu eshi a ya mo nokwa lya nokwa nwa, ota ti: “Ngeno mu ka tale ko omutulwa omutima winya, ndele tamu mu pake, osheshi ye omona wohamba.” 35Ndelenee eshi ve uya ve mu pake, inava hanga sha shimwe: oshipongolo shomutwe neemhadi nomake. 36Opo nee va aluka kuye ndele tave shi mu shiivifile. Ndele ye ta ti: “Heeno, moshinima eshi ondjovo yOmwene, e i lombwela Elia, Omutisbi, omupiya waye, oya twa, nokutya: ‘Poluhaela laJisreel eembwa tadi ka lya ombelela yaIsabel. 37Noshimhu shaIsabel tashi ka ninga oushosho mepya lomoluhaela laJisreel, vaha dule okutya: Isabel, oye ou!’ ”
Currently Selected:
2 EEHAMBA 9: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
