2 EEHAMBA 4
4
Omaadi omufiyekadi
1Ndele omukainhu umwe, omwalikadi womulongwa womuxunganeki okwa lombwela Elisa, ta ti: “Omulumenhu wange, omupiya woye, okwa fya, ndele u shi shii nokutya, omupiya woye kwa li omulumenhu ha tila Kalunga. Paife nakulilwa oikolo te uya okukufa po ovana vange vavali, va ninge ovapika vaye.” 2Opo nee Elisa e mu lombwela: “Ame ohandi dulu oku ku ningila shike? Lombwele nge osho u shi na meumbo loye.” Ye okwa nyamukula: “Omupiya woye omukainhu ehe na sha shimwe meumbo, oshanga yomaadi aike.” 3Ndele ye ta ti: “Inda u ke likongele oiyuma momukunda, kovashiinda voye aveshe, oiyuma i li hamungaho, ihapu i wane nawa. 4Opo nee to i mo, idila po oshivelo konima yoye noyovana voye ovamati, ndele tila mo moiyuma oyo aishe. Ndele oshiyuma osho sha yada, shi lipakela.” 5Opo nee ye a dja puye nokwa idila po oshivelo konima yaye noyovana vaye ovamati. Ndele venya fimbo tave mu etele, ye ta tile mo. 6Oiyuma eshi ya yadifwa, ye ta ti komona waye omumati: “Etele nge natango oshiyuma.” Ndelenee ye te mu nyamukula: “Kape na vali oshiyuma.” Opo nee omaadi inae uya vali. 7Opo nee ye e uya oku shi shiivifila omulumenhu waKalunga, ndele ye ta ti: “Inda u ka landife po omaadi u fute oikolo yoye. Osho tashi xupu po, tashi mu xupifa nye novana voye.”
Omukainhu Omusunem nomona waye
8Ndele efiku limwe Elisa okwa ya kuSunem, ndele oko kwa li omwalikadi umwe oshipuna, okwe mu ifana e mu pakele po omungome. Ndele keshe tuu efiku a enda po, ye okwa ya mo a ka lye. 9Ndele ye okwa lombwela omulumenhu waye: “Tala, ame nda dimbulukwa omulumenhu ou ta ende po pufye luhapu, ye omulumenhu waKalunga. 10Natu mu tungile okandjuwo kopombada, ndele tu mu tulile mo ombete noshitaafula noshipundi nolamba. Opo nee ngeenge te uya, ye a kale mo.” 11Ndele ye eshi e uya efiku limwe, okwa ya mokandjuwo kopombada a ka nangale, 12ndele ta ti komupiya waye Gehasi: “Ifana omwalikadi Omushunemi.” Winya eshi a ifanwa ndele ta kala ofika koshipala shaye. 13Ye ta ti komupiya: “Mu lombwela: Tala, ove we tu lipyakidila oupyakadi aushe u fike apa. Fye ohatu dulu oku ku ningila ouwa washike? Ope na eshi wa hala ndi ku popile koshipala shohamba ile koshipala shondjai?” Ndelenee okwa nyamukula: “Ame handi kala mokati kovanhu vange.” 14Opo nee ye ta ti: “Oshike hano hatu dulu oku mu ningila?” Ndele Gehasi ta nyamukula: “Oshili, ye ke nomona omumati, nomulumenhu a kulupa.” 15Ndele ye ta ti: “Mu ifana.” Ndele ye eshi e mu ifana, nawinya ta kala ofika poshivelo, 16Elisa ta ti: “Mefimbo tuu eli momudo tau uya, ove to ukata okaana okamati mekolo.” Ndele ye ta nyamukula: “Ahowe, omwene wange, omulumenhu waKalunga, ino fufya omupiya woye omukainhu!” 17Nomwalikadi a ninga oufimba nokwa dala okaana okamati mefimbo tuu olo lomudo, ngaashi Elisa e mu lombwela.
18Ndelenee okaana eshi ka kula, oka ya efiku limwe kuxe, ou a li povatei voilya, 19ndele taka ti kuxe: “Omutwe wange! Omutwe wange!” Xe okwa lombwela omupiya umwe: “Ka twalela ina!” 20Nokwe ka twala, ndele te ka eta kuina. Ndele oko ka li omutumba komatundji aye fiyo pokati komutenya ndele taka fi. 21Ndele ina okwa londa kondjuwo yopombada nokwe ka nangeka mombete yomulumenhu waKalunga, nokwa idila po ndele ta di po. 22Opo nee ye ta ifana omulumenhu waye ndele ta ti: “Tumine nge omupiya umwe nondongi imwe, ndi shiive okuya diva komulumenhu waKalunga nokwaaluka.” 23Ndele ye ta ti: “Omolwashike to i kuye nena? Nena kape nohani ipe ile Eshabata.” Ndele e mu nyamukula: “Ino kala noshisho!” 24Opo nee ye ta mange ondongi ndele ta lombwele omupiya waye: “Inda nokweendelela. Ino kateka nge mokweenda kwange, ngeenge ihandi ku lombwele.” 25Ye okwa ya ndele te uya komulumenhu waKalunga komhunda yaKarmel. Omulumenhu waKalunga eshi e mu monena kokule, ta ti komupiya waye Gehasi: “Tala, omwalikadi Omushunemi ota di kwinya.” 26Endelela u mu shakeneke u tye kuye: “Ou li tuu nawa? Omulumenhu woye oku li tuu nawa? Okaana koye oke li tuu nawa?” Ndele ye ta nyamukula: “Otu li nawa!” 27Ndele ye eshi e uya komhunda, komulumenhu waKalunga, ye okwa kwata eemhadi daye. Ndele Gehasi e uya e mu kandule po. Ndelenee omulumenhu waKalunga ta ti: “Mu efa, osheshi omwenyo waye wa nyika oufiye unene muye, nOmwene e shi holeka nge, ndele ine shi shiivifila nge.” 28Ndele ye ta ti: “Ame nda indila ngeno okaana okamati komwene wange? Inandi tya, ino fufya nge ngaho?” 29Ndele ye ta ti kuGehasi: “Lilongekida, kufa onhaili yange meke loye, u ye ko. Ngeenge to shakeneke umwe, ino mu kunda. Ndele umwe ngeenge te ku kundu, ino mu nyamukula. Ndele tula onhaili poshipala shokaana okamati.” 30Ndelenee ina yokaana ta ti: “Oshili, ngaashi Omwene e nomwenyo, nave u nomwenyo, itandi ku fii po.” Ndele Elisa okwa fikama ndele te mu shikula.
31Ndele Gehasi okwe va pitila komesho nokwa tula onhaili poshipala shokaana okamati, ndelenee inapa udika ondaka ile omufudo. Opo nee ye a shuna ndele te mu shakeneke ndele te mu lombwele ta ti: “Okaana okamati inaka penduka.” 32Ndele Elisa eshi te uya meumbo, okaana okamati ka li ka fya ndele ka nangekwa mombete yaye. 33Nokwa ya mo nokwa idila po oshivelo konima yavo vavali ndele ta ilikana Omwene. 34Opo nee ye a londa kombete nokwa nangala kombaba yokaana, nokwa tula okanya kaye kokanya kako nomesho aye komesho ako nomake aye komake ako, ndele e linyongamena kuko. Nolutu lokaana la pupyala. 35Opo nee ye a dja mo nokwa endaenda neumbo, ndele ta i ko vali, ta londo ko ndele te linyongamene kuko. Nokaana okamati ka twa onghisha luheyali. Nokaana ka pashuka. 36Opo nee a ifana Gehasi ndele ta ti: “Ifana omwalikadi Omushunemi.” Ye eshi e mu ifana, ndele winya e uya kuye, Elisa ta ti: “Kufa po okaana koye!” 37Nokwe uya mo ndele ta wile poshi peemhadi daye ndele te linyongamene poshi. Nokwa kufa okaana kaye ndele ta i.
Efyo mombiya Omingome dinini tadi hapupalekwa
38Elisa okwe uya vali kuGilgal, ndele moshilongo mwa li ondjala. Ndele fimbo ovalongwa vomuxunganeki va li omutumba moipafi yaye, ye ta ti komupiya waye: “Tula po ombiya inene ndele telekela ovalongwa vomuxunganeki.” 39Opo nee umwe a ya a ka ke ombidi. Nokwa hanga okatanga kamufifi nokwa kufa ko nokwa yadifa oshikutu shaye nako, ndele te ka tetele mombiya, ashike vo inave ka shiiva. 40Opo nee ve ka pimha mo ndele tava yandje kovalumenhu va lye. Ndelenee eshi tava li osho sha pakwa po, va haluka ndele tava ingida: “Omulumenhu waKalunga, efyo oli li mombiya!” Ndele va nyengwa oku li lya. 41Ndelenee ye ta ti: “Indeni mu ka tale oufila.” Ndele ye ote u dikile mo mombiya ndele ta ti: “Pimheni mo, ovalumenhu va lye!” Ndele mombiya inamu kala vali oshiponga shasha.
42Nomulumenhu umwe womuBaal-Salisa e uya ndele ta etele omulumenhu waKalunga omingome doilya ipe; omingome omilongo mbali domufimbaxwa, noilya ya fengwa moshimbaba, ndele Elisa ta ti: “Yandja kovanhu va lye!” 43Nomupiya waye ta nyamukula: “Ame ohandi dulu ngahelipi oku i yandjela ovalumenhu efele limwe?” Ndelenee ye ta ti: “Pa ovanhu va lye, osheshi Omwene ota ti ngaha: ‘Vo otava ka lya nokufiya po.’ ” 44Nokwe di tula pomesho yavo, ndele va lya ndele tava fii po pandjovo yOmwene.
Currently Selected:
2 EEHAMBA 4: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
