2 EEHAMBA 25
25
Oshilando shaJerusalem sha teywa po
1Ndele momudo omutimugoi wepangelo laye, mohani onhimulongo, mefiku etimulongo lohani, Nebukadnesar, ohamba yaBabilon, ye uya nomatanga aeshe ayo ovakwaita, va homone Jerusalem. Ndele va onga onhanda ndele va tunga ekumaledu la dingilila oshilando. 2Noshilando sha kala sha kondekwa fiyo okomudo omutimulongo naumwe wohamba Sedekia. 3Mefiku etimugoi lohani onhine, ondjala eshi ya ninga inene moshilando novanhu vomoshilongo vehe na vali omungome, 4oshilando sha puminwa, novakwaita aveshe va ya onhapo oufiku, va pita moshivelo pokati keehotekuma mbali di li poshikunino shohamba, fimbo Ovakaldea va dingilila oshilando. Nohamba ya ya nondjila yokoluhaela. 5Ndelenee omatanga Ovakaldea a shikula ohamba, ndele ve i kwata moluhaela laJeriko. Novakwaita vayo aveshe ve lihana po puyo. 6Opo nee va kwata ohamba ndele ve i twala kohamba yaBabilon muRibla. Ndele ve i tokola. 7Ndele va dipaa ovana vaSedekia moipafi yaye. Ndele vo ova twiyula omesho aye, ndele ve mu manga nomalyenge oshikushu ndele ve mu twala kuBabilon.
8Ndele mohani onhinhano mefiku etiheyali lohani nokutya, momudo omutimulongo nomutimugoi wohamba Nebukadnesar, ohamba yaBabilon, Nebusaradan, ondjai yomatanga ovaengeli, omupiya wohamba yaBabilon, e uya kuJerusalem. 9Nokwa xwika po ongulu yOmwene nongulu yohamba. Nosho yo eengulu adishe domuJerusalem, heeno, ongulu keshe inene okwe i xwika po nomundilo. 10Nomatanga aeshe ovakwaita Ovakaldea ovo va li pomukulunhu wovanangeli, ova ngumauna po ohotekuma yaJerusalem keembinga adishe. 11Ndele Nebusaradan, omukulunhu wovanangeli, okwa twala moukwatwa oshixupe shovanhu va fyaala moshilando naavo ve liyandja kohamba yaBabilon, naavo va xupa po vali. 12Ndelenee ovakwanaluhepo vomoshilongo, omukulunhu wovanangeli a efa, va fyaale po, va ninga ovalongi voikokola yomiviinyu novalongi vomapya.
13NOvakaldea va teyaula eengudi doshikushu domongulu yOmwene, noweendifotemba nefuta loshikushu lo la li mongulu yOmwene. Ndele va twala oshikushu osho kuBabilon. 14Vo ova twala yo eembiya noixupulo, omikonda, eenheka noinima aishe yoshikushu, yo ya longifwa melongelokalunga motembeli. 15Nosho omukulunhu wovanangeli a kufa oikwatelwa yomakala nomaholo aa a ningwa oshingoldoelela noshisilivelielela. 16Eengudi mbali nefuta noweendifotemba, oinima oyo Salomo e i ningila ongulu yOmwene, oshikushu osho shomoinima ei aishe sha nyenga okuyelekwa. 17Oule wopombada wongudi imwe wa li eemeta omulongo nahetatu, nomutwe woshikushu wa li kombada yayo, noule womutwe wa li eemeta nhatu. Komutwe wayo kwa li oulenga weenhemo noweendunga tau u dingilile; aishe oyo oshikushu, osho yo kongudi ikwao noulenga wayo.
18Omukulunhu wovanangeli a kufa omupristeli omukulunhu Seraja, nomupristeli omutivali Sefania novanangeli vatatu vopoivelo. 19Ndele moshilando a kufa elenga limwe lohamba la li omupashukili womatanga ovakwaita, novalumenhu vatano va kala meumbo lohamba, ve i kalela, ava va hangika moshilando, nomushangi womukulunhu, ou a ongela ovanhu ve uye koukwaita, novalumenhu omilongo hamano vomovanhu ovo vomoshilongo va hangika moshilando. 20Nebusaradan, omukulunhu wovanangeli, eshi e va kufa, e va twala kohamba yaBabilon muRibla. 21Nohamba yaBabilon ye va dipaa muRibla moshilongo shaHamat. Ndele Juda sha twalwa moukwatwa, sha dja moshilongo shasho.
Gedalja ta dipawa kuIsmael yaNetanja
22Ndele Nebukadnesar, ohamba yaBabilon, ta tula Gedalja yaAhikam yaSafan, a ninge omupangeli wovanhu ovo va fyaala moshilongo shaJuda. 23Ndelenee ovakulunhu aveshe vovakwaita, novalumenhu vavo eshi va uda nokutya, ohamba yaBabilon ya tula Gedalja, a ninge omupangeli, vo ove uya kuGedalja kuMispa, nokutya ava: Ismael yaNetanja, naJohanan yaKarea, naSeraja yaTanhumet, Omunetofa, naJaasanja yaMaakati, vo pamwe novalumenhu vavo. 24Ndele Gedalja okwe va anena novalumenhu vavo ndele ta ti: “Inamu tila ovapiya vOvakaldea; kaleni moshilongo ndele longeleni ohamba yaBabilon, opo nee tamu mono elao.” 25Ndelenee mohani onhiheyali Ismael yaNetanja yaElisama womepata lohamba, e uya pamwe novalumenhu omulongo ndele va dipaa Gedalja, nosho va dipaa Ovajuda nOvakaldea ava va li pamwe naye muMispa. 26Opo nee ovanhu aveshe, ounona novakulunhu ve lilongekida pamwe novakulunhu vomatanga, ndele va ya kuEgipiti. Osheshi va tila Ovakaldea.
Jehoiakin ta filwa onghenda
27Ndele momudo omutimilongo nhatu nomutiheyali woumoukwatwa waJehoiakin, ohamba yaJuda, mohani onhimulongo nonhivali mefiku etimilongo mbali netiheyali lohani, Evil-Merodak, ohamba yaBabilon, momudo wayo yo ya kala omutumba kolukalwapangelo, ya mangulula Jehoiakin, ohamba yaJuda, modolongo. 28Nokwe mu popifa nombili nokwe mu kaleka omutumba koshipundi shi dule oipundi yeehamba dikwao, odo da li puye muBabilon. 29Nokwa itavelwa okulidula oikutu younghwate. Ndele ta li omungome koshipala shohamba omafiku aeshe okukalamwenyo kwaye. 30Nokwa pewa kohamba eendja paemhumbwe defiku keshe, eendja de mu tokolelwa omafiku aye aeshe.
Currently Selected:
2 EEHAMBA 25: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
