2 EEHAMBA 22
22
Epangelo laJosia
1Omido daJosia da li omido hetatu ye eshi a ninga ohamba. Nokwa pangela omido omilongo nhatu nomudo umwe muJerusalem. Nedina laina la li Jedida, omona waAdaja womuBoskat. 2Nokwa ninga osho sha yuka momesho Omwene, ndele ta ende moinima aishe nondjila yaxe David, ndele ina kanduka mo nande kolulyo ile kolumosho. 3Ndele momudo omutimulongo nomutihetatu wohamba Josia, ohamba ya tuma omushangi Safan yaAsalia yaMesullam kongulu yOmwene ndele tai ti: 4“Inda komupristeli omukulunhu Hilkia u mu lombwele, a valele kumwe oimaliwa ya etwa kovanhu kotembeli yOmwene, ya ongelwa kovanangeli vopoivelo. 5Ndele vo nave i yandje kovalongifi ava va tulwa po va pashukile oshilonga shongulu yOmwene, opo ve i yandje kwaava hava longo oshilonga, va vandeke eenhele da nyonauka mongulu yOmwene, 6kovapangeli nokovatungi nokovahongi voipilangi, ndele va landele yo ongulu omiti nomamanya a hongwa. 7Ndelenee ava va pewa oimaliwa momake avo, inave i valifwa, osheshi vo ova li ve shi kulineekelwa, ovadiinini.”
Embo lomhango tali monika
8Opo nee omupristeli omukulunhu Hilkia ta ti komushangi Safan: “Ame nda mona embo lomhango mongulu yOmwene.” Ndele Hilkia a yandja embo kuSafan, ndele ye okwe li lesha. 9Opo nee omushangi Safan e uya kohamba nokwa twalela ohamba enyamukulo ndele ta ti: “Ovapiya voye ova kufa mo oimaliwa ya li mongulu ndele ve i yandja kovapashukili voshilonga shomongulu yOmwene.” 10Opo nee omushangi Safan a lombwela ohamba ndele ta ti: “Omupristeli Hilkia okwa pa nge embo limwe.” Ndele Safan okwa leshela mo ohamba. 11Nohamba eshi ya uda eendjovo domembo lomhango, oya pombaula oikutu yayo. 12Nohamba ya lombwela omupristeli Hilkia naAhikam yaSafan naAkbor yaMikaia nomushangi Safan naAsasia, ovapiya vohamba, ndele tai ti: 13“Indeni mu ka pulile nge Omwene nokupulila oshiwana ashishe naJuda ashishe molweendjovo domembo eli la monika. Osheshi oupyuhandu waKalunga owo munene, tau tu xwamene, shaashi ootate inava dulika keendjovo domembo eli, va ninge ngaashi sha shangwa mo.”
14Opo nee omupristeli Hilkia naAhikam naAkbor naSafan naAsasia va ya komuxunganeki omukainhu Hulda, omwalikadi waSallum yaTikva yaHarhas, omudiinini woikutu, ye a kala muJerusalem mOshilando Shipe, ndele va popya naye. 15Ndele ye ta ti kuvo: “Omwene Kalunga kaIsrael ta ti ngaha: ‘Lombweleni omulumenhu ou e mu tuma kwaame: 16Omwene ta ti ngaha: “Tala, Ame ohandi tumine onhele ei noonakukalamo omupya, heeno, eendjovo adishe domembo, ohamba yaJuda ye li lesha. 17Shaashi ve liteeka nge ndele va twimina oikalunga imwe, va handukifa nge noilonga aishe yomake avo. Onghee hano oupyuhandu wange tau ka xwamena onhele ei, ndele itau ka dima. 18Ndelenee lombweleni ohamba yaJuda, oyo ye mu tuma okupula kOmwene, mu tye: Omwene Kalunga kaIsrael ta ti ngaha molweendjovo we di uda, 19osheshi omutima woye wa pupalekwa keendjovo we di uda, ndele we lininipika koshipala shOmwene, eshi wa uda osho nde shi popya konhele ei noonakukalamo vayo, nokutya vo otava ka ninga oitilifa netumbulo lokutula omutima, ndele ove eshi wa pombaula oikutu yoye ndele wa lila koshipala shange, onghee hano nde ku uda, Omwene ta ti. 20Onghee hano, tala, Ame ohandi ku ongele pooxo, ndele oto ka nangala nombili mombila yoye, nomesho oye itaa ka tala omupya ou Ame ohandi ka tumina onhele ei.” ’ ” Ndele va etela ohamba enyamukulo olo.
Currently Selected:
2 EEHAMBA 22: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
