2 EEHAMBA 20
20
Oudu waHiskia neveluko laye
1Pomafiku enya Hiskia okwa hangika koudu mudjuu wokufya. Nomuxunganeki Jesaja yaAmos, e uya kuye ndele te mu lombwele, ta ti: “Omwene ta ti: Lilongekida eumbo loye, osheshi oto ka fya, ndee ito kala nomwenyo.” 2Opo nee Hiskia a pungululila oshipala shaye kekuma, ndele ta indile, ta ti: 3“Akutu Omwene, dimbulukwa nhumbi nda kala nokweenda koshipala shoye moudiinini nomutima aushe, ndele nda ninga osho sha wapalela omesho oye.” Ndele Hiskia okwa lila unene. 4Ndele Jesaja fimbo ina dja mo natango mehale lopokati, ondjovo yOmwene ye uya kuye ndele tai ti: 5“Piluka, u lombwele Hiskia, ohamba yoshiwana shange: ‘Omwene Kalunga kaxo David, ta ti ngaha: Ame nda uda eindilo loye. Ame nda mona omahodi oye. Tala, Ame ohandi ke ku velula. Mefiku etitatu ove oto ka ya mongulu yOmwene. 6Ndele Ame ohandi ka wedela ko komido doye omido omulongo nanhano, ndele Ame ohandi ka xupifa ove noshilando eshi momake ohamba yaAsiria, ndele handi ka amena yo oshilando eshi omolwange nomolwomupiya wange David.’ ” 7Jesaja ta ti vali: “Eteni oshikamena sheengwiyu.” Ndele ve ke shi tala. Ve shi nateka poshidinda, ndele ye okwa veluka. 8Hiskia okwa pula Jesaja: “Edidiliko lilipipo tali holola, Omwene ta ka velula nge, ndele ame ndi ye mefiku etitatu kongulu yOmwene?” 9Ndele Jesaja okwa nyamukula: “Edidiliko lOmwene kwoove, Omwene opo a wanife ondjovo yaye, oyo e i tonga, oleli: Omudile otau ka ehena komesho eenghatu omulongo ile okushuna monima eenghatu omulongo?” 10Opo nee Hiskia ta ti: “Omudile tau ehene komesho noupu eenghatu omulongo, ndelenee omudile nau shune monima eenghatu omulongo.” 11Nomuxunganeki Jesaja okwa ifana Omwene ndele Ye okwa shunifa omudile monima eenghatu omulongo odo omudile wa enda nokuli moshiulikifotundi shaAhas.
Hiskia ta ulikile ovatumwa vokuBabilon oinima yaye aishe Okufya kwaHiskia
12Pefimbo linya Merodak-Baladan yaBaladan, ohamba yaBabilon, ya tuma onhumwafo nomulongelo kuHiskia. Osheshi ya uda ye okwa li ta vele. 13Ndele Hiskia okwe va uda nokwe va ulikila ongulu yaye aishe yemona, oshisiliveli noshingoldo noinima yedimba liwa nomaadi e nondilo nongulu yaye yoiti naaishe ya li meengulu daye domamona. Inapa kala nande sha mongulu yaye nomoshilongo ashishe, Hiskia ine va ulikila. 14Opo nee omuxunganeki Jesaja e uya kohamba Hiskia ndele ta ti kuyo: “Ovalumenhu ava va popya shike, ndele va dile peni, eshi ve uya kwoove?” Ndele Hiskia okwa nyamukula: “Va dile moshilongo shokokule, muBabilon!” 15Ndele ye ta ti: “Ova mona shike mongulu yoye?” Ndele Hiskia ta nyamukula: “Va mona aishe oyo i li mongulu yange. Meengulu dange domamona inamu kala sha, vo inave shi ulikilwa kwaame.” 16Ndele Jesaja ta ti kuHiskia: “Uda ondjovo yOmwene: 17Tala, omafiku tae uya, opo nee aishe oyo i li mongulu yoye naayo ooxo ve i ongela fiyo onena eli, tai ka twalwa kuBabilon. Itapa ka xupa nande sha, Omwene osho ta ti. 18Ndele venya tava ka kufa ovana vomovana ovamati voye ovo to ka dala, ndele tava ka ninga ovapiya vomeumbo lohamba yaBabilon.” 19Opo nee Hiskia ta ti kuJesaja: “Ondjovo yOmwene we i popya, oya yuka.” Ota ti vali: “Oyo iwa, osheshi ombili nokukala kuwa, taku ka kala pomafiku ange.”
20Noinima imwe tai hepaulula Hiskia noilonga aishe yaye yeenghono, nanhumbi a ninga etale nomukangha womeva nokwa eta ngaha omeva moshilando, inai shangelwa mbela membo lomafimbo eehamba daJuda? 21Ndele Hiskia okwa ka nangala pooxe, nomona waye Manasse okwa ninga ohamba ponhele yaye.
Currently Selected:
2 EEHAMBA 20: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
