1TI 1
1
सेवाद सराव — 1:1-20
दंडाम इंगा खोटा शिक्षण बद्दल चेतावनी
1निन पौल विश्वासला ना खरेम कोडकु तीमथ्यक इदी पत्र रास्तुनान. निन परमेश्वर यवाड मनाद तारण शेस्ताड इंगा ख्रिस्त येशुड यवाड मना आशाद आधार उंडाड वान आज्ञाता ख्रिस्त येशुन प्रेषित उंडान. 2निन प्रार्थना शेस्तान की, मना परमेश्वर आब्बाड इंगा प्रभु येशु ख्रिस्त तीकेल मिक कृपा, दया इंगा शांती उंडाला.
3मासेदोनिया प्रांतकी फोयेताप्पुड यल्ला निन निक समजाय मतींटीन आल्ले इप्पुड पण समजाय मततान की, नु इफिसला निल्चीगास, काही मंदीक आज्ञा इ की, वार इंगोगोरकी खोटा शिक्षण इयाराद. 4इंगा याय परमेश्वर योजनालेका विश्वास जताक संबंधित लेव, पण वादविवादलु निर्माण शेस्ताय इल्लोन कथाल तीकुड इंगा अनंत वंशावळीला तीकुड लक्ष इयाकुंडा. 5इ आज्ञाद उद्देश प्रेम उंडाद, याद शुद्ध अंतकरणता, शिंगार मनता इंगा निष्कपट विश्वासता उत्पन्न आयताद. 6इ माटलान इडशी काही मंदी व्यर्थ माटला तीकुड भटकाशी फोयनार. 7वारकी नियमशास्त्र शिक्षक आय्येद उंडाद, पण वार या माटला बद्दल शेंगेम आत्मविश्वासता माटलाडतार इंगा शपतार, आय वारके तेल्वाव.
8पण माक इदी यरका उंडाद की, जर यवाडाना नियमशास्त्रद शिंगार उपयोग शेशा आंटे आदी शिंगार उंडाद. 9इंगा मनाक इदी यरकाने उंडाद की, नियमशास्त्र इदी नितीमान मंदी इचांग लेद तर आज्ञाभंग शेशेतोर इंगा विद्रोही, पापी, भक्तीहीन, अधर्मी, अशुद्ध, आम्मा आब्बान मतेशेतोर, खुन शेशेतोर 10व्यभिचार, समलैंगिक व्यभिचार, मंदीद व्यापार शेशेतोर, खोटा माटलाडेतोर, खोटा वट्टु येस्कुनेतोर इंगा आ आंता मंदी इचांग उंडाद यवार आ खरेम शिक्षण विरुद्ध उंडार. 11आदी शिक्षण गौरवी सुवार्ताला उंडाद याद धन्यवादीत परमेश्वरदी उंडाद इंगा याद नाक सोपाशी इच्चीनेद उंडाद.
पौलदी साक्ष
12निन मना प्रभु येशु ख्रिस्तक धन्यवाद इस्तान, यवाड नाक शक्ती इच्चीनाड. येनटीक की वाड नन्नु विश्वासयोग्य समजाशी सेवा इचांग निवडाशीनाड. 13निन तर पहिला परमेश्वरदी निंदा शेशेतोड, छळ शेशेतोड इंगा हिंसक उंटीन; पण ना मिंदा दया आय्या, येनटीक अविश्वासता इचांग नाक यरका लेकुंड्या की निन येम शेस्तुनान. 14पण मना प्रभु येशु ख्रिस्तड ना मिंदा शेंगेम कृपा शेशा इंगा वान विश्वासता इंगा प्रेमता नन्नु निंचकाड्या. 15इदी माटा खरेम उंडाद इंगा स्वीकार शेशेदेंक पुर्णपणे योग्य उंडाद की, येशु ख्रिस्त पापी मंदीन ताराशेदेंक दुन्यामलोंग वच्या इंगा आ पापी मंदी लोन्केल आंदार काना फेद्दा पापी निन उंडान. 16पण ना मिंदा दया आय्या की निन आंदार काना फेद्दा पापी उंडी पण ख्रिस्त येशुड वानदी पुर्ण सहनशीलता सुपीच्या, दिनिचांग की या मंदी सार्वकालिक जीवन इचांग वान मिंदा विश्वास फेट्यार, वार इचांग निन उदाहरण बनायाला.
17इप्पुड सनातन राजा यवाड अविनाशी इंगा अदृश्य उंडाड इल्ला वक्का परमेश्वरकी सन्मान इंगा गौरव युगानयुग उंडाला. आमेन.
18हे तीमथ्य, नु ना कोडकु लेका उंडाव, निन नी बद्दल पहिलाने शेशीने भविष्यवानी लेका नीक इदी आज्ञा इस्तुनान की, नु आटलाता शिंगार युद्ध शेय. 19इंगा आ विश्वासनी इंगा शिंगार विवेकनी फट्टी फेट. यादान यंता तरी मंदी धुराम शेशीर आंका वारदी विश्वासरुपी जहाज मुनगी फोया. 20वार दिंटल्या हुमनाय इंगा आलेक्सांद्र इर उंडार वारनी निन शैतानकी इच्काडतीन दिनिचांग की, वार परमेश्वरदी निंदा शेशेद नेरस्कुनाराद.
Currently Selected:
1TI 1: WNT
Highlight
Copy
Compare
Share
Want to have your highlights saved across all your devices? Sign up or sign in
