रोमी 2
2
परमेसर रआ नेयय
1 #
मती 7:1; लुका 6:37 हिनाते ओय दोस लगावी, चहे अमः ओके हों हके, अमः अडे बहना कोनाआँ; चितानतआचि जे दुखमा रे अमः एटाःकु दोस ठहराव कुआम हेनेना दुखमा रे अपन अप दोसी ठहराव ओम, चितानतआचि अमः जे एटाःकु दोस लगावकुअम हेनेना काम अमः खुद करावेअम। 2अबुन ठुवा वनाबुन चि नोंकन-नोंकन काम कराव अवलाकु तेङरे सनारी परमेसर पड़ा एतेन डन्ड ञमोआँ। 3ओय मनवाँ, अमः जे नोंकन-नोंकन काम कराव अवलाकु तेङरे दोस जोटोः खुद हेनेना काम करावेअम; दो तना अमः सोचाव यतेअम चि अमः परमेसर रआ डन्ड एतेन बंचाव कोओम? 4तना अमः परमेसर रआ मया, जोटोः सहावे रआ सकती जोटोः धीरज तुछ समझावओम? तना नोआँ कम समझावओ चि परमेसर रआ मया मन रुवाड़ पड़ाते अमः इदियमय? 5बकिन अमः रआ कठोरता जोटोः हठी मन रआ चलते परमेसर कयरावोः रआ दिन, जेकर रे हुँनि रआ सनारी नेयाय दिसतारोओ, अपन तआ कयराव जवार यतेअम। 6#सिरिञ 62:12; बेव 24:12परमेसर गोटे तआ हुँकू रआ काम मोताबिक जोओ ओवा कुअय। 7जे होड़ लगजोर बढ़ियाँ काम करावे रे थीर दोहो कोते बड़ाइ, इजात, जोटोः का गोजोः अवला जीवन ञ-ञम रे लगाल दोहोनकु, परमेसर हुँकू का अन्तोः जीवन ओवा कुअय। 8बकिन जे सोवारथी ते सनारी ककु मनावेए, मनेकी बेधरमी काम करावेअकु, हुँकू तेङरे परमेसर कयराव बढावओ जोटोः अगम कयराव बढावओ। 9जोटोः हुँकू मनवाँ तेङरे जे बुराईएअकु दुख जोटोः संकट वेजोआ, पहिल जहुदी तेङरे फिन गैर-जहुदीकु तेङरे; 10जे बढ़ियाँ करावेअकु हुँकू तआ बड़ाइ, इजात जोटोः सांति ञमोआँ, पहिल जहुदीकु तआ फिन गैर-जहुदी तआ। 11#नियम 10:17चितानतआचि परमेसर ओकेरआ मेड्अहा ञेल केते पछ काय अंगावेए।
12हिनाते जे बेगर मुसा रआ नियम ञम ते पाप लआकु, हुँकू बेगर मुसा रआ नियम रआ नासोअकु; जोटोः जे नियम ञम केते पाप लआकु, हुँकू रआ डन्ड नियम मोताबिक होयावओ; 13चितानतआचि नियम आयुम अवलाकु परमेसर रआ नजाइर रे धरमी न लगे, बकिन नियम पालन करेक अवलाकु धरमी ठहरावकुआ। 14फिन जब गैर-जहुदीकु रे जेकर अडे नियम कोनाआँ, सोवाभव ही ते होना हुकुम पालन नेआकु, दो हुँकू अडे नियम का दोहोन रे हों हुँकू अपन तआ अकु ही नियम हके। 15हुँकू अकु रआ चल चलन ते एरञेलेअकु, चि मुसा रआ नियम रआ दुखमा अपन-अपन हिरदय रे ओल लआ इदानआँ, जोटोः हुँकू रआ भीतरी मन हों गोवाही एमेअय, जोटोः हुँकू रआ बिचार कभी दोस कभी बेदोस ठहराव कुअय; 16होना हिला परमेसर इञः रआ बढ़ियाँ दुखमा रआ मोताबिक ईसु मसी दोवसते मनवाँकु रआ उकु लेना दुखमा रआ नेययेअय।
जहुदी जोटोः नियम
17अगर आपे जहुदी कहलाव ओपे, जोटोः मुसा रआ नियम तेङरे सारियोओपे, जोटोः परमेसर रआ बारे रे घमंडेअपे, 18जोटोः आपे परमेसर रआ हिछा ठुवायतेअपे जोटोः नियम रआ सिछा ठुवाकेते बढ़ियाँ-बढ़ियाँ दुखमा सनारी मनावओपे; 19-20गेयान, जोटोः सनारी रआ नमुना, जे नियम रेए, होना आपे अडे इदानआँ हिनाते आपे नोआँ मनाव ओपे चि इञः अँधराकु रेनकु अगुवा हके, जे ञोता रेकु भटकाव ओना हुँकू तआ इञः दीया हके, जोटोः सोरडोंडोकु सिखाव अवला, जोटोः सेंगोज्कु उपनीत ओवा अवला हके; 21दो चिताना आपे एटाःकु परचार वकुआपे, अपन अप कपे सिखावओ? चिताना आपे जे अलो लोकड़े तआ उपनीत एमेअपे, आपे खुदे लोकड़ेयपे? 22आपे जे कथायपे, “बे-लाज काम अलो कामे,” तना आपे ही खुद बेलाज कमेअपे? आपे जे मुरती सुधा घीनाव ओपे, तना आपे ही मंदिर रेजेअपे? 23आपे जे नियम रआ बारे रे घमंडेअपे, जोटोः नियम रआ उलंघन केते परमेसर एर लाजेयापे? 24#जसा 52:5“चितानतआचि जे लेका धरम पोथी रे ओल लआ हों इदानआँ, आपे चलते, गैर-जहुदीकु रे परमेसर रआ ञुमुन रआ निंदायोओना,”
25अगर आपे मुसा रआ नियम मनव कोतेपे सेने दो खतना ते फयदा दो इदानआँ, बदे अगर आपे नियम तोड़ावे दो आपे रआ खतना बेगर खतना लेका ठहराव लेना। 26हिनाते अगर ओके गैर-जहुदी होड़कु जेकर खतना का होयावतना नियम रआ बिधि मोताबिक सेनेअकु, दो तना हुँकू बेगर खतना रआ दसा रे हो खतना लेना लेका परमेसर एरोय लेखा लेए? 27जोटोः जे मनवाँ गतार रे काय खतना तना, अगर हुँनि नियम पुरायय, दो आपे जे नियम तोड़ाव अवलाकु दोसी ठहरावकुआ, चितानतआचि आपे खतना तड्पेआ जोटोः आपे अडे ओल लआ मुसा रआ नियम इदानआँ सेकरोरे आपे नियम तोड़ाव यतेअपे। 28चितानतआचि हुँकू जहुदी न लगे जे बाहरी रुप ञेञेल रे जहुदी हके; जोटोः न होना खतना हके जे बाहरी रुप ञेञेल रे इदानआँ जोटोः गतार रे इदानआँ। 29#नियम 30:6बकिन असली जहुदी हिकु हके जे भीतर एतेन इदानकुआ; जोटोः खतना हिना हके जे हिरदाय रआ जोटोः आतमा रेआ, न कि मुसा रआ नियम रे ओल लआ, नोंकनकु रआ बखनाव मनवाँकु पड़ा एतेन कोवन, बकिन परमेसर पड़ा एतेन होयावओ।
© 2023 NLCI CC BY-NC-ND 4.0