मती 5

टोंगरी रआ सिछा

1ईसु होड़ भीड़ ञेल लअय, दो हुँनि टोंगरी तेङ रे सेनलेनय जोटोः दुड़ूः यानय। चेलाकु हुँनि ठँवरे वेज्‌लेनाकु, 2जोटोः हुँकू सिछा ओवा केते हुँकू नोंका कथावा लिड्कुअय।

3“हुँकू धन्य इदानकुआ जे आतमा रे रंगिज्-तेताङ तेपेआ;

सिरमा राइज हिकु ही तआ हके!”

4 # जसा 61:2 “हुँकू धन्य इदानकुआ जे इयामेआकु;

चितानतआचि हुँकू डीढ ञमोआँ!”

5 # सिरिञ 37:11 “हुँकू धन्य अकु जे सोझाअकु;

चितानतआचि हुँकू नोआँ ओत रेनकु हकदार होयवओकु!”

6 # जसा 55:1,2 “हुँकू धन्य अकु जे धरमिकता तआ रंगिज् जोटोः तेताङ इदानकुआ;

चितानतआचि हुँकू बी कुअय!”

7“हुँकू धन्य अकु जे दयालु इदानकुआ;

चितानतआचि हुँकू तआ मया ञमोआँ!”

8 # सिरिञ 24:3,4 “हुँकू धन्य अकु जेकर रआ मन सुध इदानआँ;

चितानतआचि हुँकू परमेसर ञेलेयाकु!”

9“हुँकू धन्य अकु जे एर जुटाव कुआकु;

चितानतआचि हुँकू परमेसर रेनकु होपोनते तिकु कथायोओकु!”

10 # 1 पत 3:14 “हुँकू धन्य अकु जे परमेसर रआ धरमिकता रे सेनेअकु रआ चलते सताव कुआकु;

चितानतआचि सिरमा राइज हीकु रआ ही हके!”

11 # 1 पत 4:14 “अमः धन्य इदानमिआँ जबकि इञः चलते होड़कु बेइजात मीआँकु जोटोः सताव मीआँकु जोटोः ठक दुखमा कथाकेते अमः रआ बिरोद रे गोटा लेका रआ बुरा दुखमा कथावमा। 12#2 इति 36:16; बि.काम 7:52तब अमः खुस दोहोनमी, जोटोः रिझावमी सिरमा रे अमः तआ नोआँ रआ सेंड़ा इनाम इदानआँ अमः एतेन पहिल रेनकु परमेसर पड़ा एतेन दुखमाय अवलाकु हों ने-नेन लेका हुँकू सताव लिड्कुआकु।”

बुलुङ जोटोः इंजोत

(मरकुस 9:50; लुका 14:34,35)

13 # मर 9:50; लुका 14:34,35 “आपे ओत रेनपे बुलुङ हके। अगर बुलुङ अपन सिबिल सीठा एंडायोः दो होना फिन एरो रुवाड़ अगु बुजालेए, होना फिन चितान काम रे हों एरो वेज्‌लेना। सिरीप नेंकय चि होड़कु होना बहरा रे गिडी एंडायाकु जोटोः होड़ अपन जँगाते एनेआकु।”

14 # जोह 8:12; 9:5 “आपे दुनियाँ रेनपे मरसाल हके। जे सहर पहार रे बसाव तना, होना सहर एरो उकु बुजालेना। 15#मर 4:21; लुका 8:16; 11:33होड़कु ढीबरी जब् केते मावनी रआ भीतारे ककु डबनायाँ, बकिन देहड़ी रे दोहोयकु, जोटोः होना ते ओड़ाः रेनकु गोटे तआ मरसालोओ। 16#1 पत 2:12हेनेन लेका आपे रआ मरसाल होड़कु रआ तला रे लवकावओ चि हुँकू आपे रआ बेस काम ञेल कोते आपे रेनि सिरमा बबा रआ बड़ाइयेएकु।”

नियम रआ सिछा

17“नोंका अलोपे समझावोः चि इञः मुसा रआ नियम चहे परमेसर पड़ा एतेन दुखमाय अवलाकु रआ ओल लआ दुखमा चबय तअइञ वेज्‌तना। इञः होना चबय तआ कोवन होना पुराय तआ वेज् तनाइञ। 18#लुका 16:17इञः सनारी आपेइञ कथावायना चि जबरे आकास जोटोः ओत टलाव एंडायोओ, मुसा रआ नियम रआ सबद मी कड़ी हों बनाल दोहोना, होना तब रे बनाल दोहोना जबरे होना गोटा का पुरा एंडायोः। 19हिनाते जे निआँ हुकुम मे से मियड् हुडिञ हुकुम हों तोड़ावेए जोटोः हेंका होड़कु सिखावकुआकु, हुँनि सिरमा राइज रे गोटे एतेन हुडिञ कहलावओय। बकिन जे होना रे सेनेअकु जोटोः एटाःकु होना रे सेने तआ सिछा ओवा कुआकू, हुँकू सिरमा रे महान कहलावो ओकु। 20इञः आपे सनारिञ कथावायतपेआ चि अगर आपे रआ धरमिकता परमेसर रआ बचन सि-सिखावकु जोटोः फरीसीकु रआ धरमिकता एतेन बाइढ़के कोनाआँ दो, आपे सिरमा राइज रे कहियो एरोपे परोम बुजालेना।”

कयरावोः जोटोः गो-गोज्

21 # उठलु 20:13; नियम 5:17 “आपे ठुवावनापे चि अबुन रेनकु बबा-ताताकु एडे कथा दोहोलआ, ‘अलोपे गोज् किकु अगर ओके गोज् कुआकु रेदो हुँकू तआ डन्ड ञमोआँ।’ 22बकिन इञः आपेइञ कथावा यना जे ओके अपन बोको सुधा कयरव ओय, हुँनि तआ डन्ड ञमोआँ जोटोः जे ओके अपन बोयहाते रआ मुरख कथावाइया हुँनि तआ सेंड़ा सभा रे डन्ड ञमोआँ, जोटोः जे ओके कथाय, ‘अरे मुरख!’ दो हुँनि तआ नरक रे डन्ड ञमोआँ। 23हिनाते अगर अमः अपन भेंट वेदी रे रकाबे तआ अगुतदम जोटोः होंडे अमः पहम यतेअम चि अमः रेनि बोको रआ मन रे अमः तआ चितान बिरोद कुन इदानआँ, 24दो अपन भेंट हेनेन वेदी ठँवरे बयअटु केते पहिल अपन बोको एडे सेन कोते मेल-मिलापेमी, तब वेज् कोते भेंट रकाबेमी।”

25“अमः रेनि मुदय कछायरी इदी मिआँय घनी ही होरा रे हुँनि सुधा झटपट मेल-मिलापेमी, नोंका अलो होयावकोः चि हुँनि आपे फयसला एमी ठँव रे ओर इदीयाम, जोटोः फयसला एमी आपे सिपाही एडे सोपावपे जोटोः सिपाही आपे जेहेल रेकु अदेरपे। 26इञः आपे सनारीञ कथावा यतमिआ जबरे आपे कीरी-कीरी टका कापे भरपाइए, तब रे होंडे एतेन एरोपे उडुङ बुजालेना।”

बे-लाज काम

27 # उठलु 20:14; नियम 5:18 “आपे ठुवावनापे चि नोआँ कथा तड्अय, ‘बे-लाज काम अलोपे करावे।’ 28बकिन इञः आपे सनारीञ कथावा यतपेआ चि जे ओके बुरी हिछा ते ओके लंञी बोगाः यातियय, दो हुँनि हेनेन बेरा हुँनि सुधा अपन मन रे बे-लाज काम कराव चुकाव केदय। 29#मती 18:9; मर 9:47अगर आपे रआ जोम होरे रआ मेड् एर पाप यतपे दो होना उडुङ केते गिडी एंडाय चही। चितानतआचि आपे तआ नोआँ अछाआ चि आपे रआ होड़ो रआ मियड् अँग चबा एंडायोः बकिन आपे रआ गोटा होड़ो नरक रे जोड़ावे एतेन बंचावओ। 30#मती 18:8; मर 9:43अगर अमः रआ जोम होरे रआ अती एर पाप यतमी दो होना खंडा केते गिडीमी। चितानतआचि नोआँ अछाआ चि अमः होड़ो रआ मियड् अँग चबा एंडायोः बकिन अमः रआ गोटा होड़ो नरक एतेन बंचावओ।”

बियाह रआ बंधन

(मती 19:9; लुका 16:18)

31 # नियम 24:1–4; मती 19:7; मर 10:4 “नोंका हो कथा लआ इदानआँ, ‘जे अपन लंञी बयेयाकु दो हुँकू अपन लंञी तआ बये रआ चिठी ओल केते ओवाकु चही।’ 32#मती 19:9; मर 10:11,12; लुका 16:18; 1 कोरि 7:10,11बकिन इञः आपेइञ कथावायना चि अगर ओके बे-लाज काम रआ कारन ते कोवन बकिन एटाः कारन ते, अपन लंञी बयेयाय दो हुँनि अपन लंञी बे-लाज काम बनाव यतियय, जोटोः जे होड़ हुँनि लंञी सुधा बियाह योओय हुँनि बे-लाज काम यतेअय।”

किरया

33 # लेबी 19:12; लेखा 30:2; नियम 23:21 “आपे नोंका हों अयुम तड्अपे चि अबुन रेनकु बबा-ताताकु एडे कथा तड्आ, ‘आपे ठक किरया अलोपे जोम के बकिन परभु एतेन जोम लआ किरया पुरायपे।’ 34#जाकु 5:12; जसा 66:1; मती 23:22बकिन इञः आपेइञ कथावायना चि ओका हिला हों किरया अलोपे जोम के, न सिरमा रआ चितानतआचि होना परमेसर रआ राजगदी हके; 35#जसा 66:1; सिरिञ 48:2न ओत रआ चितानतआचि होना परमेसर रआ जँगा दोहोय रआ ठँव हके, न दो जेरुसलेम रआ चितानतआचि होना महाराजा रआ सहर हके। 36जोटोः न अपन बोहोः रआ किरया पे जोम के, चितानतआचि आपे मियड् ऊब् हों न पुंडी न कड़िया बेजा केएपे। 37बकिन आपे रआ दुखमा नोंकायोः चही ‘आँ’ दो ‘आँ’ ‘कोवन’ दो ‘कोवन’ चितानतआचि जे नोआँ रआ अलावा होयावओ होना दुस्ट सयतान पड़ा एतेन होयावओ।”

बदला एम रआ अलोपे भावनाएँ

(लुका 6:29,30)

38 # उठलु 21:24; लेबी 24:20; नियम 19:21 “आपे अयुम चुकाव तड्अपे चि कथा दोहोलआ, ‘मेड् रआ बदली मेड् जोटोः डटा रआ बदली रे डटा।’ 39बकिन इञः कथावा यतमिअइञ चि ओके बुरा होड़ रआ अलोम बिरोद के, बकिन अगर ओकेकुन अमः रआ जोम होर जोहा रे थपड़ावमी दो कोंजरा होर हों हुँनि पड़ा चुवेर वाइपे। 40जे केस-फाउदारी केते अमः रआ झुला इदी तआ अरावओय दो अपन चदार हों इकाएर इदीवायमी। 41जोटोः ओकेकुन अमः मी कोस इदीमी दो हुँनि सुधा बार कोस सेनोःमी। 42जे ओकेकुन अमः एतेन कोयेअकु हुँकू ओवाकुमी, जोटोः जे अमः एतेन उधरा अँगावे चहावओय, हुँनि अलोम बरजाव की।”

बाइरीकु तुली दुलारे

(लुका 6:27,28,32–36)

43“आपे अयुम तड्अपे चि कथा दोहोलआ ‘आपे अपन खुड़ी रेनकु सुधा दुलारेपे जोटोः अपन बयरीकु सुधा बइर दोहोनपे।’ 44बकिन इञः कथा यतेअइञ चि बयरीकु तुली दुलारेपे जोटोः जे आपे सुधा बिरोदेअकु, हुँकू तआ बिनतीपे, 45जेकर से आपे सिरमा रेनि बबा रेनि होपोन कथायोओपे। चितानतआचि परमेसर बढ़ियाँ क-करावी जोटोः बुरा बनार तआ बोंगा तुर केते एर मारसालेए जोटोः धरमी जोटोः बेधरमी बनार तआ गमायय। 46अगर अमः अपन दुलार करेक अवलाकु तुलीम दुलारे दो अमः तआ चितान फयदा! तना मलगुजारी अँगावकु हों नोंका ककु दुलारेआ? 47जोटोः अगर अमः सिरीप अपन बोकोम तिकु हीम जोहारवा, दो चिताना सेंड़ा काम लअम? तना गैर-जहुदीकु हों नोंका ककु करावेए! 48#लेबी 19:2; नियम 18:13हिना तआ अमः पोकता पड़ीयोमी, जे लेका अमः रेनि सिरमा रेनि बबा पोकता इदानियाँ!”

Currently Selected:

मती 5: BIX

Highlight

Copy

Compare