याकुब 5

1ए धनगार कु, ईङ आला बात के आयुमेपे! आपे भोकराव-भोकराव ईयामेपे एता लःअय ची आपे रे बिपाईत हिजोअ वाला एदनाआ! 2#सं.मत्‍ती 6:19आपे आला खरचा सेयाअ ना। आपे आला गेन्दरअ के पिलवा गेर केदाकु। 3आपे आला सोना चाँदी चितयाव ना। हिना चिती आपे आला बिरोध रे गोवाही एम केआय, आउर सेंगेल लकान आपे आला सिकार के जोम केआय। आउर नोःआँ जुग रेनअः अंत हेके आउर आपे खरचा तेंग रे खरचा जवार तदापे। 4#कन 24:14,15नेलेपे, आपे आला ओत रे जे कामी लआकु, आपे हुंकू आला कमाई के कापे एमा लिकुआ। हिना कमाई ताकु आपे बिरोध रे गुल दाय आउर ओत रे ईइर कु आला गोहराअः सवांगिया परभु आला लुतूर जगुत सोदोरोः ताना। 5आपे धरती रे मौज-मस्ती रअः जिनगी जिवीःड तनापे आउर पु-पुजा रअः दिन लःअय अपन मन के खियाव-पियाव केते मोटाव आमिन तदापे। 6आपे धरमी के दोसी ठहराव केते गोएःग लियापे आउर हुनी आपे के एतान होः काय बिरोध लेपेआ।

धीरज दो-दोहो रअः दरकार

7हिना लःअय ए बोयहाकु, परभु हिजोः जगुत धीरज दोहोय पे। किसान के नेलीपे, जे ओत रअः किमती खिती रअः आसरा नेलाय। हुनी के सुरू आउर आखरी बरखा रअः हिजोअ जगुत धीरज दो-दोहो पड़ाआ। 8आपे होः धीरज दोहोय पे। आउर अपन मन के डिढ़े-पे, एता लःअय ची परभु रअः हिजोअ दिन हेनाडा।

9ए बोयहाकु, एटाअः कु बिरोध रे आलपे कुड़कुड़ाव कोअः, जेकर से ची आपे रे होः दोस आलकु लगाव के। नेलेपे, ने-नेयाय वाला भीतरी हिजोः लःअय दुवार दुबाःड़े तिंगु तनाय। 10ए बोयहाकु, जे आगमजानीकु परभु आला नुमू रे कंहड़ी तदाकु, हुंकू के दुख उठाव आउर धीरज रअः अपन नमुना समझाः पे। 11#अयु 1:21,22; 2:10; सिरिंग 103:8ईङ हुंकू के धनया समझाईङ, जे सहायाय। आपे अय्यूब आला धीरज रअः बारे रे आयुम तदापे आउर आपे पड़ीआपे ची परभु हुनी लोः एता लकान आखरी रे बेवहार लःअय, एता लःअय ची परभु सोगाव आउर माया रे पेरेःग उनी हेके।

कसम जो-जोम कोवान चाही

12 # सं.मत्‍ती 5:34–37 ए ईङ आलकु बोयहाकु, जामा तरअः बड़े बात नोःआँ हेके ची सिरमा चाहे ओत रअः चाहे जहान जिनीस रअः किरया आलपे जोम के। आपे आला बात “हाँ” रे हाँ, आउर “कोवान” रे कोवान हुयाअः चाही जेकर से आपे रे परमेसर आला डांड़ आलु हुयाअः कोअः।

बिनती रअः सकती

13जदि आपे मेसे जाहें बिपाईत रे एदानिया दो हुनी बिनतीये। जाहें खुस एदानिया, दो भजन सिरींगे। 14#सं.मर 6:13जदि आपे रआ ताला रे जाहें बेमाराय, दो कलीसिया रिनकु अगुवाकु के राअः कुपे आउर हुंकू परभु आला नुमू रे हुनी रे सुनूम ओजाः केते हुनी लःअय बिनतीये। 15आउर बिसवास रअः बिनती तरअः बेमारहा बंचाव कोआय, आउर परभु हुनी के बेस कियाय, जदि हुनी पाप तदाय होः, दो परमेसर हुनी के छमा कियाय। 16हिना लःअय आपे एटाअः कु मड़ांग रे अपन-अपन पाप के मनाअः पे, आउर हुनी-नुई लःअय बिनती पे, जेकर से बेस जुनोअपे। धरमी होड़कु आला बिनती रेनअः असर तरअः ढेर कुछ हुयाव सकाआ। 17#1 राजा 17:1; 18:1इलियस होः दो आबु लकान गी मियांड होड़ ताहिनाय। हुनी गिड़गिड़ाव केते बिनती लःअय ची दाअः आलु गमा के, आउर पे बरीस छाव मईहना जगुत ओत रे दाअः काय गमा लआ। 18#1 राजा 18:42–45हुनी फिन दोबारा बिनती लःअय, सिरमा तरअः कचर-कुट दाअः गमा लःअय आउर ओत रे खिती पैदा हुयाव नेना।

पपाहा कु आला सुधार

19ए बोयहाकु, आपे मेसे जाहें जदि सचाई तरअः भटकाव जुनोआय, आउर हुनी के आपे मेसे जाहें फिन रूवाड़ियाय, 20#बेव 10:12; 1 पत 4:8दो हुनी नोःआँ पड़ीये ची जे जाहें पापी के पाप रअः होरा तरअः रूवाड़ आगुयाय, हुनी मिहोंड़ आला जीव के मराईन तरअः बंचाईयाय। आउर हुनी आला आउरो पाप कुन तरअः छ-छमा रअः कारन बनाआय।

Currently Selected:

याकुब 5: ASR

Highlight

Copy

Compare